೨. ವಕ್ಕಲಿತ್ಥೇರಅಪದಾನಂ

೨೮. ‘‘ಇತೋ ಸತಸಹಸ್ಸಮ್ಹಿ, ಕಪ್ಪೇ ಉಪ್ಪಜ್ಜಿ ನಾಯಕೋ;

ಅನೋಮನಾಮೋ ಅಮಿತೋ, ನಾಮೇನ ಪದುಮುತ್ತರೋ.

೨೯. ‘‘ಪದುಮಾಕಾರವದನೋ, ಪದುಮಾಮಲಸುಚ್ಛವೀ;

ಲೋಕೇನಾನುಪಲಿತ್ತೋವ ತೋಯೇನ ಪದುಮಂ ಯಥಾ.

೩೦. ‘‘ವೀರೋ ಪದುಮಪತ್ತಕ್ಖೋ, ಕನ್ತೋ ಚ ಪದುಮಂ ಯಥಾ;

ಪದುಮುತ್ತರಗನ್ಧೋವ, ತಸ್ಮಾ ಸೋ ಪದುಮುತ್ತರೋ.

೩೧. ‘‘ಲೋಕಜೇಟ್ಠೋ ಚ ನಿಮ್ಮಾನೋ, ಅನ್ಧಾನಂ ನಯನೂಪಮೋ;

ಸನ್ತವೇಸೋ ಗುಣನಿಧಿ, ಕರುಣಾಮತಿಸಾಗರೋ.

೩೨. ‘‘ಸ ಕದಾಚಿ ಮಹಾವೀರೋ, ಬ್ರಹ್ಮಾಸುರಸುರಚ್ಚಿತೋ;

ಸದೇವಮನುಜಾಕಿಣ್ಣೇ, ಜನಮಜ್ಝೇ ಜಿನುತ್ತಮೋ [ಜನುತ್ತಮೋ (ಸ್ಯಾ. ಪೀ.), ಅನುತ್ತಮೋ (ಕ.) ವಙ್ಗೀಸತ್ಥೇರಾಪದಾನೇಪಿ].

೩೩. ‘‘ವದನೇನ ಸುಗನ್ಧೇನ, ಮಧುರೇನ ರುತೇನ ಚ;

ರಞ್ಜಯಂ ಪರಿಸಂ ಸಬ್ಬಂ, ಸನ್ಥವೀ ಸಾವಕಂ ಸಕಂ.

೩೪. ‘‘ಸದ್ಧಾಧಿಮುತ್ತೋ ಸುಮತಿ, ಮಮ ದಸ್ಸನಲಾಲಸೋ [ದಸ್ಸನಸಾಲಯೋ (ಸ್ಯಾ.)];

ನತ್ಥಿ ಏತಾದಿಸೋ ಅಞ್ಞೋ, ಯಥಾಯಂ ಭಿಕ್ಖು ವಕ್ಕಲಿ.

೩೫. ‘‘ತದಾಹಂ ಹಂಸವತಿಯಂ, ನಗರೇ ಬ್ರಾಹ್ಮಣತ್ರಜೋ;

ಹುತ್ವಾ ಸುತ್ವಾ ಚ ತಂ ವಾಕ್ಯಂ, ತಂ ಠಾನಮಭಿರೋಚಯಿಂ.

೩೬. ‘‘ಸಸಾವಕಂ ತಂ ವಿಮಲಂ, ನಿಮನ್ತೇತ್ವಾ ತಥಾಗತಂ;

ಸತ್ತಾಹಂ ಭೋಜಯಿತ್ವಾನ, ದುಸ್ಸೇಹಚ್ಛಾದಯಿಂ ತದಾ.

೩೭. ‘‘ನಿಪಚ್ಚ ಸಿರಸಾ ತಸ್ಸ, ಅನನ್ತಗುಣಸಾಗರೇ;

ನಿಮುಗ್ಗೋ ಪೀತಿಸಮ್ಪುಣ್ಣೋ, ಇದಂ ವಚನಮಬ್ರವಿಂ.

೩೮. ‘‘‘ಯೋ ಸೋ ತಯಾ ಸನ್ಥವಿತೋ, ಇತೋ ಸತ್ತಮಕೇ ಮುನಿ [ಇಧ ಸದ್ಧಾಧಿಮುತ್ತೋ ಇಸಿ (ಸ್ಯಾ.), ಇತೋ ಸತ್ತಮಕೇಹನಿ (ಸೀ. ಪೀ.)];

ಭಿಕ್ಖು ಸದ್ಧಾವತಂ ಅಗ್ಗೋ, ತಾದಿಸೋ ಹೋಮಹಂ ಮುನೇ’.

೩೯. ‘‘ಏವಂ ವುತ್ತೇ ಮಹಾವೀರೋ, ಅನಾವರಣದಸ್ಸನೋ;

ಇಮಂ ವಾಕ್ಯಂ ಉದೀರೇಸಿ, ಪರಿಸಾಯ ಮಹಾಮುನಿ.

೪೦. ‘‘‘ಪಸ್ಸಥೇತಂ ಮಾಣವಕಂ, ಪೀತಮಟ್ಠನಿವಾಸನಂ;

ಹೇಮಯಞ್ಞೋಪಚಿತಙ್ಗಂ [ಹೇಮಯಞ್ಞೋಪವೀತಙ್ಗಂ (ಸೀ.)], ಜನನೇತ್ತಮನೋಹರಂ.

೪೧. ‘‘‘ಏಸೋ ಅನಾಗತದ್ಧಾನೇ, ಗೋತಮಸ್ಸ ಮಹೇಸಿನೋ;

ಅಗ್ಗೋ ಸದ್ಧಾಧಿಮುತ್ತಾನಂ, ಸಾವಕೋಯಂ ಭವಿಸ್ಸತಿ.

೪೨. ‘‘‘ದೇವಭೂತೋ ಮನುಸ್ಸೋ ವಾ, ಸಬ್ಬಸನ್ತಾಪವಜ್ಜಿತೋ;

ಸಬ್ಬಭೋಗಪರಿಬ್ಯೂಳ್ಹೋ, ಸುಖಿತೋ ಸಂಸರಿಸ್ಸತಿ.

೪೩. ‘‘‘ಸತಸಹಸ್ಸಿತೋ ಕಪ್ಪೇ, ಓಕ್ಕಾಕಕುಲಸಮ್ಭವೋ;

ಗೋತಮೋ ನಾಮ ಗೋತ್ತೇನ, ಸತ್ಥಾ ಲೋಕೇ ಭವಿಸ್ಸತಿ.

೪೪. ‘‘‘ತಸ್ಸ ಧಮ್ಮೇಸು ದಾಯಾದೋ, ಓರಸೋ ಧಮ್ಮನಿಮ್ಮಿತೋ;

ವಕ್ಕಲಿ ನಾಮ ನಾಮೇನ, ಹೇಸ್ಸತಿ ಸತ್ಥು ಸಾವಕೋ’.

೪೫. ‘‘ತೇನ ಕಮ್ಮವಿಸೇಸೇನ, ಚೇತನಾಪಣಿಧೀಹಿ ಚ;

ಜಹಿತ್ವಾ ಮಾನುಸಂ ದೇಹಂ, ತಾವತಿಂಸಮಗಚ್ಛಹಂ.

೪೬. ‘‘ಸಬ್ಬತ್ಥ ಸುಖಿತೋ ಹುತ್ವಾ, ಸಂಸರನ್ತೋ ಭವಾಭವೇ;

ಸಾವತ್ಥಿಯಂ ಪುರೇ ಜಾತೋ, ಕುಲೇ ಅಞ್ಞತರೇ ಅಹಂ.

೪೭. ‘‘ನೋನೀತಸುಖುಮಾಲಂ ಮಂ, ಜಾತಪಲ್ಲವಕೋಮಲಂ;

ಮನ್ದಂ ಉತ್ತಾನಸಯನಂ, ಪಿಸಾಚಭಯತಜ್ಜಿತಾ.

೪೮. ‘‘ಪಾದಮೂಲೇ ಮಹೇಸಿಸ್ಸ, ಸಾಯೇಸುಂ ದೀನಮಾನಸಾ;

ಇಮಂ ದದಾಮ ತೇ ನಾಥ, ಸರಣಂ ಹೋಹಿ ನಾಯಕ.

೪೯. ‘‘ತದಾ ಪಟಿಗ್ಗಹಿ ಸೋ ಮಂ, ಭೀತಾನಂ ಸರಣೋ ಮುನಿ;

ಜಾಲಿನಾ ಚಕ್ಕಙ್ಕಿತೇನ [ಸಙ್ಕಲಙ್ಕೇನ (ಸೀ.)], ಮುದುಕೋಮಲಪಾಣಿನಾ.

೫೦. ‘‘ತದಾ ಪಭುತಿ ತೇನಾಹಂ, ಅರಕ್ಖೇಯ್ಯೇನ ರಕ್ಖಿತೋ;

ಸಬ್ಬವೇರವಿನಿಮುತ್ತೋ [ಸಬ್ಬಬ್ಯಾಧಿವಿನಿಮುತ್ತೋ (ಸ್ಯಾ.), ಸಬ್ಬೂಪಧಿವಿನಿಮುತ್ತೋ (ಪೀ.)], ಸುಖೇನ ಪರಿವುದ್ಧಿತೋ.

೫೧. ‘‘ಸುಗತೇನ ವಿನಾ ಭೂತೋ, ಉಕ್ಕಣ್ಠಾಮಿ ಮುಹುತ್ತಕಂ;

ಜಾತಿಯಾ ಸತ್ತವಸ್ಸೋಹಂ, ಪಬ್ಬಜಿಂ ಅನಗಾರಿಯಂ.

೫೨. ‘‘ಸಬ್ಬಪಾರಮಿಸಮ್ಭೂತಂ, ನೀಲಕ್ಖಿನಯನಂ [ಲಙ್ಕಿನೀಲಯನಂ (ಸೀ.)] ವರಂ;

ರೂಪಂ ಸಬ್ಬಸುಭಾಕಿಣ್ಣಂ, ಅತಿತ್ತೋ ವಿಹರಾಮಹಂ [ವಿಹಯಾಮಹಂ (ಸೀ. ಪೀ.)].

೫೩. ‘‘ಬುದ್ಧರೂಪರತಿಂ [ಬುದ್ಧೋ ರೂಪರತಿಂ (ಸೀ.)] ಞತ್ವಾ, ತದಾ ಓವದಿ ಮಂ ಜಿನೋ;

‘ಅಲಂ ವಕ್ಕಲಿ ಕಿಂ ರೂಪೇ, ರಮಸೇ ಬಾಲನನ್ದಿತೇ.

೫೪. ‘‘‘ಯೋ ಹಿ ಪಸ್ಸತಿ ಸದ್ಧಮ್ಮಂ, ಸೋ ಮಂ ಪಸ್ಸತಿ ಪಣ್ಡಿತೋ;

ಅಪಸ್ಸಮಾನೋ ಸದ್ಧಮ್ಮಂ, ಮಂ ಪಸ್ಸಮ್ಪಿ ನ ಪಸ್ಸತಿ.

೫೫. ‘‘‘ಅನನ್ತಾದೀನವೋ ಕಾಯೋ, ವಿಸರುಕ್ಖಸಮೂಪಮೋ;

ಆವಾಸೋ ಸಬ್ಬರೋಗಾನಂ, ಪುಞ್ಜೋ ದುಕ್ಖಸ್ಸ ಕೇವಲೋ.

೫೬. ‘‘‘ನಿಬ್ಬಿನ್ದಿಯ ತತೋ ರೂಪೇ, ಖನ್ಧಾನಂ ಉದಯಬ್ಬಯಂ;

ಪಸ್ಸ ಉಪಕ್ಕಿಲೇಸಾನಂ, ಸುಖೇನನ್ತಂ ಗಮಿಸ್ಸತಿ’.

೫೭. ‘‘ಏವಂ ತೇನಾನುಸಿಟ್ಠೋಹಂ, ನಾಯಕೇನ ಹಿತೇಸಿನಾ;

ಗಿಜ್ಝಕೂಟಂ ಸಮಾರುಯ್ಹ, ಝಾಯಾಮಿ ಗಿರಿಕನ್ದರೇ.

೫೮. ‘‘ಠಿತೋ ಪಬ್ಬತಪಾದಮ್ಹಿ, ಅಸ್ಸಾಸಯಿ [ಮಮಾಹಸೋ (ಸೀ.)] ಮಹಾಮುನಿ;

ವಕ್ಕಲೀತಿ ಜಿನೋ ವಾಚಂ, ತಂ ಸುತ್ವಾ ಮುದಿತೋ ಅಹಂ.

೫೯. ‘‘ಪಕ್ಖನ್ದಿಂ ಸೇಲಪಬ್ಭಾರೇ, ಅನೇಕಸತಪೋರಿಸೇ;

ತದಾ ಬುದ್ಧಾನುಭಾವೇನ, ಸುಖೇನೇವ ಮಹಿಂ ಗತೋ.

೬೦. ‘‘ಪುನೋಪಿ [ಪುನಾಪಿ (ಸ್ಯಾ.), ಮುನಿ ಮಂ (ಕ.)] ಧಮ್ಮಂ ದೇಸೇತಿ, ಖನ್ಧಾನಂ ಉದಯಬ್ಬಯಂ;

ತಮಹಂ ಧಮ್ಮಮಞ್ಞಾಯ, ಅರಹತ್ತಮಪಾಪುಣಿಂ.

೬೧. ‘‘ಸುಮಹಾಪರಿಸಮಜ್ಝೇ, ತದಾ ಮಂ ಚರಣನ್ತಗೋ;

ಅಗ್ಗಂ ಸದ್ಧಾಧಿಮುತ್ತಾನಂ, ಪಞ್ಞಪೇಸಿ ಮಹಾಮತಿ.

೬೨. ‘‘ಸತಸಹಸ್ಸಿತೋ ಕಪ್ಪೇ, ಯಂ ಕಮ್ಮಮಕರಿಂ ತದಾ;

ದುಗ್ಗತಿಂ ನಾಭಿಜಾನಾಮಿ, ಬುದ್ಧಪೂಜಾಯಿದಂ ಫಲಂ.

೬೩. ‘‘ಕಿಲೇಸಾ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವೋ.

೬೪. ‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.

೬೫. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ವಕ್ಕಲಿತ್ಥೇರೋ ಇಮಾ ಗಾಥಾಯೋ

ಅಭಾಸಿತ್ಥಾತಿ.

ವಕ್ಕಲಿತ್ಥೇರಸ್ಸಾಪದಾನಂ ದುತಿಯಂ.