೩. ಮಹಾಕಪ್ಪಿನತ್ಥೇರಅಪದಾನಂ

೬೬. ‘‘ಪದುಮುತ್ತರೋ ನಾಮ ಜಿನೋ, ಸಬ್ಬಧಮ್ಮಾನ ಪಾರಗೂ;

ಉದಿತೋ ಅಜಟಾಕಾಸೇ [ಜಗದಾಕಾಸೇ (ಸೀ.), ಜಲದಾಕಾಸೇ (ಪೀ.)], ರವೀವ ಸರದಮ್ಬರೇ.

೬೭. ‘‘ವಚನಾಭಾಯ ಬೋಧೇತಿ, ವೇನೇಯ್ಯಪದುಮಾನಿ ಸೋ;

ಕಿಲೇಸಪಙ್ಕಂ ಸೋಸೇತಿ, ಮತಿರಂಸೀಹಿ ನಾಯಕೋ.

೬೮. ‘‘ತಿತ್ಥಿಯಾನಂ ಯಸೇ [ಯಸೋ (ಸೀ. ಪೀ.)] ಹನ್ತಿ, ಖಜ್ಜೋತಾಭಾ ಯಥಾ ರವಿ;

ಸಚ್ಚತ್ಥಾಭಂ ಪಕಾಸೇತಿ, ರತನಂವ ದಿವಾಕರೋ.

೬೯. ‘‘ಗುಣಾನಂ ಆಯತಿಭೂತೋ, ರತನಾನಂವ ಸಾಗರೋ;

ಪಜ್ಜುನ್ನೋರಿವ ಭೂತಾನಿ, ಧಮ್ಮಮೇಘೇನ ವಸ್ಸತಿ.

೭೦. ‘‘ಅಕ್ಖದಸ್ಸೋ ತದಾ ಆಸಿಂ, ನಗರೇ ಹಂಸಸವ್ಹಯೇ;

ಉಪೇಚ್ಚ ಧಮ್ಮಮಸ್ಸೋಸಿಂ, ಜಲಜುತ್ತಮನಾಮಿನೋ.

೭೧. ‘‘ಓವಾದಕಸ್ಸ ಭಿಕ್ಖೂನಂ, ಸಾವಕಸ್ಸ ಕತಾವಿನೋ;

ಗುಣಂ ಪಕಾಸಯನ್ತಸ್ಸ, ತಪ್ಪಯನ್ತಸ್ಸ [ತೋಸಯನ್ತಸ್ಸ (ಸೀ.), ಹಾಸಯನ್ತಸ್ಸ (ಸ್ಯಾ.), ವಾಸಯನ್ತಸ್ಸ (ಪೀ.)] ಮೇ ಮನಂ.

೭೨. ‘‘ಸುತ್ವಾ ಪತೀತೋ ಸುಮನೋ, ನಿಮನ್ತೇತ್ವಾ ತಥಾಗತಂ;

ಸಸಿಸ್ಸಂ ಭೋಜಯಿತ್ವಾನ, ತಂ ಠಾನಮಭಿಪತ್ಥಯಿಂ.

೭೩. ‘‘ತದಾ ಹಂಸಸಮಭಾಗೋ, ಹಂಸದುನ್ದುಭಿನಿಸ್ಸನೋ [ಹಂಸದುನ್ದುಭಿಸುಸ್ಸರೋ (ಸೀ.)];

ಪಸ್ಸಥೇತಂ ಮಹಾಮತ್ತಂ, ವಿನಿಚ್ಛಯವಿಸಾರದಂ.

೭೪. ‘‘ಪತಿತಂ ಪಾದಮೂಲೇ ಮೇ, ಸಮುಗ್ಗತತನೂರುಹಂ;

ಜೀಮೂತವಣ್ಣಂ ಪೀಣಂಸಂ, ಪಸನ್ನನಯನಾನನಂ.

೭೫. ‘‘ಪರಿವಾರೇನ ಮಹತಾ, ರಾಜಯುತ್ತಂ ಮಹಾಯಸಂ;

ಏಸೋ ಕತಾವಿನೋ ಠಾನಂ, ಪತ್ಥೇತಿ ಮುದಿತಾಸಯೋ.

೭೬. ‘‘‘ಇಮಿನಾ ಪಣಿಪಾತೇನ, ಚಾಗೇನ ಪಣಿಧೀಹಿ ಚ [ಪಿಣ್ಡಪಾತೇನ, ಚೇತನಾ ಪಣಿಧೀಹಿ ಚ (ಸೀ.)];

ಕಪ್ಪಸತಸಹಸ್ಸಾನಿ, ನುಪಪಜ್ಜತಿ ದುಗ್ಗತಿಂ.

೭೭. ‘‘‘ದೇವೇಸು ದೇವಸೋಭಗ್ಗಂ, ಮನುಸ್ಸೇಸು ಮಹನ್ತತಂ;

ಅನುಭೋತ್ವಾನ ಸೇಸೇನ [ಅಭುತ್ವಾವ ಸೇಸೇನ (ಸೀ.), ಅನುಭೋತ್ವಾವ ಸೇಸೇನ (ಸ್ಯಾ.)], ನಿಬ್ಬಾನಂ ಪಾಪುಣಿಸ್ಸತಿ.

೭೮. ‘‘‘ಸತಸಹಸ್ಸಿತೋ ಕಪ್ಪೇ, ಓಕ್ಕಾಕಕುಲಸಮ್ಭವೋ;

ಗೋತಮೋ ನಾಮ ಗೋತ್ತೇನ, ಸತ್ಥಾ ಲೋಕೇ ಭವಿಸ್ಸತಿ.

೭೯. ‘‘‘ತಸ್ಸ ಧಮ್ಮೇಸು ದಾಯಾದೋ, ಓರಸೋ ಧಮ್ಮನಿಮ್ಮಿತೋ;

ಕಪ್ಪಿನೋ ನಾಮ ನಾಮೇನ, ಹೇಸ್ಸತಿ ಸತ್ಥು ಸಾವಕೋ’.

೮೦. ‘‘ತತೋಹಂ ಸುಕತಂ ಕಾರಂ, ಕತ್ವಾನ ಜಿನಸಾಸನೇ;

ಜಹಿತ್ವಾ ಮಾನುಸಂ ದೇಹಂ, ತುಸಿತಂ ಅಗಮಾಸಹಂ.

೮೧. ‘‘ದೇವಮಾನುಸರಜ್ಜಾನಿ, ಸತಸೋ ಅನುಸಾಸಿಯ;

ಬಾರಾಣಸಿಯಮಾಸನ್ನೇ, ಜಾತೋ ಕೇನಿಯಜಾತಿಯಂ.

೮೨. ‘‘ಸಹಸ್ಸಪರಿವಾರೇನ [ಸತಸಹಸ್ಸಪರಿವಾರೋ (ಸ್ಯಾ.)], ಸಪಜಾಪತಿಕೋ ಅಹಂ;

ಪಞ್ಚ ಪಚ್ಚೇಕಬುದ್ಧಾನಂ, ಸತಾನಿ ಸಮುಪಟ್ಠಹಿಂ.

೮೩. ‘‘ತೇಮಾಸಂ ಭೋಜಯಿತ್ವಾನ, ಪಚ್ಛಾದಮ್ಹ ತಿಚೀವರಂ;

ತತೋ ಚುತಾ ಮಯಂ ಸಬ್ಬೇ, ಅಹುಮ್ಹ ತಿದಸೂಪಗಾ.

೮೪. ‘‘ಪುನೋ ಸಬ್ಬೇ ಮನುಸ್ಸತ್ತಂ, ಅಗಮಿಮ್ಹ ತತೋ ಚುತಾ;

ಕುಕ್ಕುಟಮ್ಹಿ ಪುರೇ ಜಾತಾ, ಹಿಮವನ್ತಸ್ಸ ಪಸ್ಸತೋ.

೮೫. ‘‘ಕಪ್ಪಿನೋ ನಾಮಹಂ ಆಸಿಂ, ರಾಜಪುತ್ತೋ ಮಹಾಯಸೋ;

ಸೇಸಾಮಚ್ಚಕುಲೇ ಜಾತಾ, ಮಮೇವ ಪರಿವಾರಯುಂ.

೮೬. ‘‘ಮಹಾರಜ್ಜಸುಖಂ ಪತ್ತೋ, ಸಬ್ಬಕಾಮಸಮಿದ್ಧಿಮಾ;

ವಾಣಿಜೇಹಿ ಸಮಕ್ಖಾತಂ, ಬುದ್ಧುಪ್ಪಾದಮಹಂ ಸುಣಿಂ.

೮೭. ‘‘‘ಬುದ್ಧೋ ಲೋಕೇ ಸಮುಪ್ಪನ್ನೋ, ಅಸಮೋ ಏಕಪುಗ್ಗಲೋ;

ಸೋ ಪಕಾಸೇತಿ ಸದ್ಧಮ್ಮಂ, ಅಮತಂ ಸುಖಮುತ್ತಮಂ.

೮೮. ‘‘‘ಸುಯುತ್ತಾ ತಸ್ಸ ಸಿಸ್ಸಾ ಚ, ಸುಮುತ್ತಾ ಚ ಅನಾಸವಾ’;

‘‘ಸುತ್ವಾ ನೇಸಂ ಸುವಚನಂ, ಸಕ್ಕರಿತ್ವಾನ ವಾಣಿಜೇ.

೮೯. ‘‘ಪಹಾಯ ರಜ್ಜಂ ಸಾಮಚ್ಚೋ, ನಿಕ್ಖಮಿಂ ಬುದ್ಧಮಾಮಕೋ;

ನದಿಂ ದಿಸ್ವಾ ಮಹಾಚನ್ದಂ, ಪೂರಿತಂ ಸಮತಿತ್ತಿಕಂ.

೯೦. ‘‘ಅಪ್ಪತಿಟ್ಠಂ ಅನಾಲಮ್ಬಂ, ದುತ್ತರಂ ಸೀಘವಾಹಿನಿಂ;

ಗುಣಂ ಸರಿತ್ವಾ ಬುದ್ಧಸ್ಸ, ಸೋತ್ಥಿನಾ ಸಮತಿಕ್ಕಮಿಂ.

೯೧. ‘‘‘ಭವಸೋತಂ ಸಚೇ ಬುದ್ಧೋ, ತಿಣ್ಣೋ ಲೋಕನ್ತಗೂ ವಿದೂ [ವಿಭೂ (ಕ.)];

ಏತೇನ ಸಚ್ಚವಜ್ಜೇನ, ಗಮನಂ ಮೇ ಸಮಿಜ್ಝತು.

೯೨. ‘‘‘ಯದಿ ಸನ್ತಿಗಮೋ ಮಗ್ಗೋ, ಮೋಕ್ಖೋ ಚಚ್ಚನ್ತಿಕಂ [ಮೋಕ್ಖದಂ ಸನ್ತಿಕಂ (ಸ್ಯಾ.)] ಸುಖಂ;

ಏತೇನ ಸಚ್ಚವಜ್ಜೇನ, ಗಮನಂ ಮೇ ಸಮಿಜ್ಝತು.

೯೩. ‘‘‘ಸಙ್ಘೋ ಚೇ ತಿಣ್ಣಕನ್ತಾರೋ, ಪುಞ್ಞಕ್ಖೇತ್ತೋ ಅನುತ್ತರೋ;

ಏತೇನ ಸಚ್ಚವಜ್ಜೇನ, ಗಮನಂ ಮೇ ಸಮಿಜ್ಝತು’.

೯೪. ‘‘ಸಹ ಕತೇ ಸಚ್ಚವರೇ, ಮಗ್ಗಾ ಅಪಗತಂ ಜಲಂ;

ತತೋ ಸುಖೇನ ಉತ್ತಿಣ್ಣೋ, ನದೀತೀರೇ ಮನೋರಮೇ.

೯೫. ‘‘ನಿಸಿನ್ನಂ ಅದ್ದಸಂ ಬುದ್ಧಂ, ಉದೇನ್ತಂವ ಪಭಙ್ಕರಂ;

ಜಲನ್ತಂ ಹೇಮಸೇಲಂವ, ದೀಪರುಕ್ಖಂವ ಜೋತಿತಂ.

೯೬. ‘‘ಸಸಿಂವ ತಾರಾಸಹಿತಂ, ಸಾವಕೇಹಿ ಪುರಕ್ಖತಂ;

ವಾಸವಂ ವಿಯ ವಸ್ಸನ್ತಂ, ದೇಸನಾಜಲದನ್ತರಂ [ದೇವೇನ ಜಲನನ್ದನಂ (ಸ್ಯಾ. ಪೀ.)].

೯೭. ‘‘ವನ್ದಿತ್ವಾನ ಸಹಾಮಚ್ಚೋ, ಏಕಮನ್ತಮುಪಾವಿಸಿಂ;

ತತೋ ನೋ ಆಸಯಂ [ತತೋ ಅಜ್ಝಾಸಯಂ (ಸ್ಯಾ.)] ಞತ್ವಾ, ಬುದ್ಧೋ ಧಮ್ಮಮದೇಸಯಿ.

೯೮. ‘‘ಸುತ್ವಾನ ಧಮ್ಮಂ ವಿಮಲಂ, ಅವೋಚುಮ್ಹ ಮಯಂ ಜಿನಂ;

‘ಪಬ್ಬಾಜೇಹಿ ಮಹಾವೀರ, ನಿಬ್ಬಿನ್ದಾಮ್ಹ [ನಿಬ್ಬಿನ್ನಾಮ್ಹ (ಸೀ. ಪೀ.), ಓತಿಣ್ಣಮ್ಹ (ಸ್ಯಾ.)] ಮಯಂ ಭವೇ’.

೯೯. ‘‘‘ಸ್ವಕ್ಖಾತೋ ಭಿಕ್ಖವೇ ಧಮ್ಮೋ, ದುಕ್ಖನ್ತಕರಣಾಯ ವೋ;

ಚರಥ ಬ್ರಹ್ಮಚರಿಯಂ’, ಇಚ್ಚಾಹ ಮುನಿಸತ್ತಮೋ.

೧೦೦. ‘‘ಸಹ ವಾಚಾಯ ಸಬ್ಬೇಪಿ, ಭಿಕ್ಖುವೇಸಧರಾ ಮಯಂ;

ಅಹುಮ್ಹ ಉಪಸಮ್ಪನ್ನಾ, ಸೋತಾಪನ್ನಾ ಚ ಸಾಸನೇ.

೧೦೧. ‘‘ತತೋ ಜೇತವನಂ ಗನ್ತ್ವಾ, ಅನುಸಾಸಿ ವಿನಾಯಕೋ;

ಅನುಸಿಟ್ಠೋ ಜಿನೇನಾಹಂ, ಅರಹತ್ತಮಪಾಪುಣಿಂ.

೧೦೨. ‘‘ತತೋ ಭಿಕ್ಖುಸಹಸ್ಸಾನಿ [ಭಿಕ್ಖುಸಹಸ್ಸಂ ತಂ (ಸೀ. ಪೀ.)], ಅನುಸಾಸಿಮಹಂ ತದಾ;

ಮಮಾನುಸಾಸನಕರಾ, ತೇಪಿ ಆಸುಂ ಅನಾಸವಾ.

೧೦೩. ‘‘ಜಿನೋ ತಸ್ಮಿಂ ಗುಣೇ ತುಟ್ಠೋ, ಏತದಗ್ಗೇ ಠಪೇಸಿ ಮಂ;

ಭಿಕ್ಖುಓವಾದಕಾನಗ್ಗೋ, ಕಪ್ಪಿನೋತಿ ಮಹಾಜನೇ.

೧೦೪. ‘‘ಸತಸಹಸ್ಸೇ ಕತಂ ಕಮ್ಮಂ, ಫಲಂ ದಸ್ಸೇಸಿ ಮೇ ಇಧ;

ಪಮುತ್ತೋ ಸರವೇಗೋವ, ಕಿಲೇಸೇ ಝಾಪಯಿಂ [ಝಾಪಯೀ (ಸೀ.)] ಮಮ.

೧೦೫. ‘‘ಕಿಲೇಸಾ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವೋ.

೧೦೬. ‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.

೧೦೭. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ಮಹಾಕಪ್ಪಿನೋ ಥೇರೋ ಇಮಾ ಗಾಥಾಯೋ

ಅಭಾಸಿತ್ಥಾತಿ.

ಮಹಾಕಪ್ಪಿನತ್ಥೇರಸ್ಸಾಪದಾನಂ ತತಿಯಂ.