೯. ಆಮಣ್ಡಫಲದಾಯಕತ್ಥೇರಅಪದಾನಂ

೭೪. ‘‘ಪದುಮುತ್ತರೋ ನಾಮ ಜಿನೋ, ಸಬ್ಬಧಮ್ಮಾನ ಪಾರಗೂ;

ವುಟ್ಠಹಿತ್ವಾ ಸಮಾಧಿಮ್ಹಾ, ಚಙ್ಕಮೀ ಲೋಕನಾಯಕೋ.

೭೫. ‘‘ಖಾರಿಭಾರಂ ಗಹೇತ್ವಾನ, ಆಹರನ್ತೋ ಫಲಂ ತದಾ;

ಅದ್ದಸಂ ವಿರಜಂ ಬುದ್ಧಂ, ಚಙ್ಕಮನ್ತಂ ಮಹಾಮುನಿಂ.

೭೬. ‘‘ಪಸನ್ನಚಿತ್ತೋ ಸುಮನೋ, ಸಿರೇ ಕತ್ವಾನ ಅಞ್ಜಲಿಂ;

ಸಮ್ಬುದ್ಧಂ ಅಭಿವಾದೇತ್ವಾ, ಆಮಣ್ಡಮದದಿಂ ಫಲಂ.

೭೭. ‘‘ಸತಸಹಸ್ಸಿತೋ ಕಪ್ಪೇ, ಯಂ ಫಲಂ ಅದದಿಂ ತದಾ;

ದುಗ್ಗತಿಂ ನಾಭಿಜಾನಾಮಿ, ಆಮಣ್ಡಸ್ಸ ಇದಂ ಫಲಂ.

೭೮. ‘‘ಕಿಲೇಸಾ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವೋ.

೭೯. ‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.

೮೦. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ಆಮಣ್ಡಫಲದಾಯಕೋ ಥೇರೋ ಇಮಾ

ಗಾಥಾಯೋ ಅಭಾಸಿತ್ಥಾತಿ.

ಆಮಣ್ಡಫಲದಾಯಕತ್ಥೇರಸ್ಸಾಪದಾನಂ ನವಮಂ.