೧೦. ಸುಗನ್ಧತ್ಥೇರಅಪದಾನಂ

೮೧. ‘‘ಇಮಮ್ಹಿ ಭದ್ದಕೇ ಕಪ್ಪೇ, ಬ್ರಹ್ಮಬನ್ಧು ಮಹಾಯಸೋ;

ಕಸ್ಸಪೋ ನಾಮ ಗೋತ್ತೇನ [ನಾಮೇನ (ಸಬ್ಬತ್ಥ)], ಉಪ್ಪಜ್ಜಿ ವದತಂ ವರೋ.

೮೨. ‘‘ಅನುಬ್ಯಞ್ಜನಸಮ್ಪನ್ನೋ, ಬಾತ್ತಿಂಸವರಲಕ್ಖಣೋ;

ಬ್ಯಾಮಪ್ಪಭಾಪರಿವುತೋ, ರಂಸಿಜಾಲಸಮೋತ್ಥಟೋ [ರಂಸಿಜಾಲಸಮೋಸಟೋ (ಸೀ. ಪೀ.)].

೮೩. ‘‘ಅಸ್ಸಾಸೇತಾ ಯಥಾ ಚನ್ದೋ, ಸೂರಿಯೋವ ಪಭಙ್ಕರೋ;

ನಿಬ್ಬಾಪೇತಾ ಯಥಾ ಮೇಘೋ, ಸಾಗರೋವ ಗುಣಾಕರೋ.

೮೪. ‘‘ಧರಣೀರಿವ ಸೀಲೇನ, ಹಿಮವಾವ ಸಮಾಧಿನಾ;

ಆಕಾಸೋ ವಿಯ ಪಞ್ಞಾಯ, ಅಸಙ್ಗೋ ಅನಿಲೋ ಯಥಾ.

೮೫. ‘‘ಸ ಕದಾಚಿ ಮಹಾವೀರೋ, ಪರಿಸಾಸು ವಿಸಾರದೋ;

ಸಚ್ಚಾನಿ ಸಮ್ಪಕಾಸೇತಿ, ಉದ್ಧರನ್ತೋ ಮಹಾಜನಂ.

೮೬. ‘‘ತದಾ ಹಿ ಬಾರಾಣಸಿಯಂ, ಸೇಟ್ಠಿಪುತ್ತೋ ಮಹಾಯಸೋ;

ಆಸಹಂ ಧನಧಞ್ಞಸ್ಸ [ಅನನ್ತಧನಧಞ್ಞಸ್ಸ (ಕ.)], ಪಹೂತಸ್ಸ ಬಹೂ ತದಾ.

೮೭. ‘‘ಜಙ್ಘಾವಿಹಾರಂ ವಿಚರಂ, ಮಿಗದಾಯಮುಪೇಚ್ಚಹಂ [ಮುಪೇಸಹಂ (ಕ.)];

ಅದ್ದಸಂ ವಿರಜಂ ಬುದ್ಧಂ, ದೇಸೇನ್ತಂ ಅಮತಂ ಪದಂ.

೮೮. ‘‘ವಿಸಟ್ಠಕನ್ತವಚನಂ, ಕರವೀಕಸಮಸ್ಸರಂ;

ಹಂಸರುತೇಹಿ [ಹಂಸದುನ್ದುಭಿ (ಸ್ಯಾ. ಪೀ.)] ನಿಗ್ಘೋಸಂ, ವಿಞ್ಞಾಪೇನ್ತಂ ಮಹಾಜನಂ.

೮೯. ‘‘ದಿಸ್ವಾ ದೇವಾತಿದೇವಂ ತಂ, ಸುತ್ವಾವ ಮಧುರಂ ಗಿರಂ;

ಪಹಾಯನಪ್ಪಕೇ ಭೋಗೇ, ಪಬ್ಬಜಿಂ ಅನಗಾರಿಯಂ.

೯೦. ‘‘ಏವಂ ಪಬ್ಬಜಿತೋ ಚಾಹಂ, ನ ಚಿರೇನ ಬಹುಸ್ಸುತೋ;

ಅಹೋಸಿಂ ಧಮ್ಮಕಥಿಕೋ, ವಿಚಿತ್ತಪಟಿಭಾಣವಾ.

೯೧. ‘‘ಮಹಾಪರಿಸಮಜ್ಝೇಹಂ, ಹಟ್ಠಚಿತ್ತೋ ಪುನಪ್ಪುನಂ;

ವಣ್ಣಯಿಂ ಹೇಮವಣ್ಣಸ್ಸ, ವಣ್ಣಂ ವಣ್ಣವಿಸಾರದೋ.

೯೨. ‘‘ಏಸ ಖೀಣಾಸವೋ ಬುದ್ಧೋ, ಅನೀಘೋ ಛಿನ್ನಸಂಸಯೋ;

ಸಬ್ಬಕಮ್ಮಕ್ಖಯಂ ಪತ್ತೋ, ವಿಮುತ್ತೋಪಧಿಸಙ್ಖಯೇ.

೯೩. ‘‘ಏಸ ಸೋ ಭಗವಾ ಬುದ್ಧೋ, ಏಸ ಸೀಹೋ ಅನುತ್ತರೋ;

ಸದೇವಕಸ್ಸ ಲೋಕಸ್ಸ, ಬ್ರಹ್ಮಚಕ್ಕಪ್ಪವತ್ತಕೋ.

೯೪. ‘‘ದನ್ತೋ ದಮೇತಾ ಸನ್ತೋ ಚ, ಸಮೇತಾ ನಿಬ್ಬುತೋ ಇಸಿ;

ನಿಬ್ಬಾಪೇತಾ ಚ ಅಸ್ಸತ್ಥೋ, ಅಸ್ಸಾಸೇತಾ ಮಹಾಜನಂ.

೯೫. ‘‘ವೀರೋ ಸೂರೋ ಚ ವಿಕ್ಕನ್ತೋ [ಧೀರೋ ಚ (ಸೀ. ಪೀ.)], ಪಞ್ಞೋ ಕಾರುಣಿಕೋ ವಸೀ;

ವಿಜಿತಾವೀ ಚ ಸ ಜಿನೋ, ಅಪ್ಪಗಬ್ಬೋ ಅನಾಲಯೋ.

೯೬. ‘‘ಅನೇಞ್ಜೋ ಅಚಲೋ ಧೀಮಾ, ಅಮೋಹೋ ಅಸಮೋ ಮುನಿ;

ಧೋರಯ್ಹೋ ಉಸಭೋ ನಾಗೋ, ಸೀಹೋ ಸಕ್ಕೋ ಗರೂಸುಪಿ.

೯೭. ‘‘ವಿರಾಗೋ ವಿಮಲೋ ಬ್ರಹ್ಮಾ, ವಾದೀ ಸೂರೋ ರಣಞ್ಜಹೋ;

ಅಖಿಲೋ ಚ ವಿಸಲ್ಲೋ ಚ, ಅಸಮೋ ಸಂಯತೋ [ವುಸಭೋ (ಸ್ಯಾ.), ಪಯತೋ (ಪೀ.)] ಸುಚಿ.

೯೮. ‘‘ಬ್ರಾಹ್ಮಣೋ ಸಮಣೋ ನಾಥೋ, ಭಿಸಕ್ಕೋ ಸಲ್ಲಕತ್ತಕೋ;

ಯೋಧೋ ಬುದ್ಧೋ ಸುತಾಸುತೋ [ಸುತೋ ಸುತೋ (ಸೀ. ಪೀ.)], ಅಚಲೋ ಮುದಿತೋ ಸಿತೋ [ದಿತೋ (ಸೀ.)].

೯೯. ‘‘ಧಾತಾ ಧತಾ ಚ ಸನ್ತಿ ಚ, ಕತ್ತಾ ನೇತಾ ಪಕಾಸಿತಾ;

ಸಮ್ಪಹಂಸಿತಾ ಭೇತ್ತಾ ಚ, ಛೇತ್ತಾ ಸೋತಾ ಪಸಂಸಿತಾ.

೧೦೦. ‘‘ಅಖಿಲೋ ಚ ವಿಸಲ್ಲೋ ಚ, ಅನೀಘೋ ಅಕಥಂಕಥೀ;

ಅನೇಜೋ ವಿರಜೋ ಕತ್ತಾ, ಗನ್ಧಾ ವತ್ತಾ ಪಸಂಸಿತಾ.

೧೦೧. ‘‘ತಾರೇತಾ ಅತ್ಥಕಾರೇತಾ, ಕಾರೇತಾ ಸಮ್ಪದಾರಿತಾ;

ಪಾಪೇತಾ ಸಹಿತಾ ಕನ್ತಾ, ಹನ್ತಾ ಆತಾಪೀ ತಾಪಸೋ [ಹನ್ತಾ, ತಾಪಿತಾ ಚ ವಿಸೋಸಿತಾ (ಸ್ಯಾ.)].

೧೦೨. ‘‘ಸಮಚಿತ್ತೋ [ಸಚ್ಚಟ್ಠಿತೋ (ಸ್ಯಾ.)] ಸಮಸಮೋ, ಅಸಹಾಯೋ ದಯಾಲಯೋ [ದಯಾಸಯೋ (ಸೀ.)];

ಅಚ್ಛೇರಸತ್ತೋ [ಅಚ್ಛೇರಮನ್ತೋ (ಸ್ಯಾ.)] ಅಕುಹೋ, ಕತಾವೀ ಇಸಿಸತ್ತಮೋ.

೧೦೩. ‘‘ನಿತ್ತಿಣ್ಣಕಙ್ಖೋ ನಿಮ್ಮಾನೋ, ಅಪ್ಪಮೇಯ್ಯೋ ಅನೂಪಮೋ;

ಸಬ್ಬವಾಕ್ಯಪಥಾತೀತೋ, ಸಚ್ಚ ನೇಯ್ಯನ್ತಗೂ [ಸಬ್ಬನೇಯ್ಯನ್ತಿಕೋ (ಸ್ಯಾ.)] ಜಿನೋ.

೧೦೪. ‘‘ಸತ್ತಸಾರವರೇ [ಸತರಂಸೀವರೇ (ಸ್ಯಾ.)] ತಸ್ಮಿಂ, ಪಸಾದೋ ಅಮತಾವಹೋ;

ತಸ್ಮಾ ಬುದ್ಧೇ ಚ ಧಮ್ಮೇ ಚ, ಸಙ್ಘೇ ಸದ್ಧಾ ಮಹತ್ಥಿಕಾ [ಮಹಿದ್ಧಿಕಾ (ಸೀ. ಕ.)].

೧೦೫. ‘‘ಗುಣೇಹಿ ಏವಮಾದೀಹಿ, ತಿಲೋಕಸರಣುತ್ತಮಂ;

ವಣ್ಣೇನ್ತೋ ಪರಿಸಾಮಜ್ಝೇ, ಅಕಂ [ಕಥಿಂ (ಸ್ಯಾ.)] ಧಮ್ಮಕಥಂ ಅಹಂ.

೧೦೬. ‘‘ತತೋ ಚುತಾಹಂ ತುಸಿತೇ, ಅನುಭೋತ್ವಾ ಮಹಾಸುಖಂ;

ತತೋ ಚುತೋ ಮನುಸ್ಸೇಸು, ಜಾತೋ ಹೋಮಿ ಸುಗನ್ಧಿಕೋ.

೧೦೭. ‘‘ನಿಸ್ಸಾಸೋ ಮುಖಗನ್ಧೋ ಚ, ದೇಹಗನ್ಧೋ ತಥೇವ ಮೇ;

ಸೇದಗನ್ಧೋ ಚ ಸತತಂ, ಸಬ್ಬಗನ್ಧೋವ ಹೋತಿ ಮೇ [ಸಬ್ಬಗನ್ಧೋತಿಸೇತಿ ಮೇ (ಸೀ. ಪೀ.)].

೧೦೮. ‘‘ಮುಖಗನ್ಧೋ ಸದಾ ಮಯ್ಹಂ, ಪದುಮುಪ್ಪಲಚಮ್ಪಕೋ;

ಪರಿಸನ್ತೋ [ಆದಿಸನ್ತೋ (ಸೀ.), ಅತಿಕನ್ತೋ (ಸ್ಯಾ.), ಅತಿಸನ್ತೋ (ಪೀ.)] ಸದಾ ವಾತಿ, ಸರೀರೋ ಚ ತಥೇವ ಮೇ.

೧೦೯. ‘‘ಗುಣತ್ಥವಸ್ಸ ಸಬ್ಬನ್ತಂ, ಫಲಂ ತು [ಫಲನ್ತಂ (ಸ್ಯಾ.)] ಪರಮಬ್ಭುತಂ;

ಏಕಗ್ಗಮನಸಾ ಸಬ್ಬೇ, ವಣ್ಣಯಿಸ್ಸಂ [ಭಾಸಿತಸ್ಸ (ಸ್ಯಾ.)] ಸುಣಾಥ ಮೇ.

೧೧೦. ‘‘ಗುಣಂ ಬುದ್ಧಸ್ಸ ವತ್ವಾನ, ಹಿತಾಯ ಚ ನ ಸದಿಸಂ [ಹಿತಾಯ ಜನಸನ್ಧಿಸು (ಸೀ. ಪೀ.), ಹಿತಾಯ ನಂ ಸುಖಾವಹಂ (ಸ್ಯಾ.)];

ಸುಖಿತೋ [ಸುಚಿತ್ತೋ (ಸ್ಯಾ.)] ಹೋಮಿ ಸಬ್ಬತ್ಥ, ಸಙ್ಘೋ ವೀರಸಮಾಯುತೋ [ಸರದ್ಧನಿಸಮಾಯುತೋ (ಸೀ.)].

೧೧೧. ‘‘ಯಸಸ್ಸೀ ಸುಖಿತೋ ಕನ್ತೋ, ಜುತಿಮಾ ಪಿಯದಸ್ಸನೋ;

ವತ್ತಾ ಅಪರಿಭೂತೋ ಚ, ನಿದ್ದೋಸೋ ಪಞ್ಞವಾ ತಥಾ.

೧೧೨. ‘‘ಖೀಣೇ ಆಯುಸಿ [ಪಾಸುಸಿ (ಸ್ಯಾ.)] ನಿಬ್ಬಾನಂ, ಸುಲಭಂ ಬುದ್ಧಭತ್ತಿನೋ;

ತೇಸಂ ಹೇತುಂ ಪವಕ್ಖಾಮಿ, ತಂ ಸುಣಾಥ ಯಥಾತಥಂ.

೧೧೩. ‘‘ಸನ್ತಂ ಯಸಂ ಭಗವತೋ, ವಿಧಿನಾ ಅಭಿವಾದಯಂ;

ತತ್ಥ ತತ್ಥೂಪಪನ್ನೋಪಿ [ಯತ್ಥ ತತ್ಥೂಪಪನ್ನೋಪಿ (ಸೀ. ಪೀ.)], ಯಸಸ್ಸೀ ತೇನ ಹೋಮಹಂ.

೧೧೪. ‘‘ದುಕ್ಖಸ್ಸನ್ತಕರಂ ಬುದ್ಧಂ, ಧಮ್ಮಂ ಸನ್ತಮಸಙ್ಖತಂ;

ವಣ್ಣಯಂ ಸುಖದೋ ಆಸಿಂ, ಸತ್ತಾನಂ ಸುಖಿತೋ ತತೋ.

೧೧೫. ‘‘ಗುಣಂ ವದನ್ತೋ ಬುದ್ಧಸ್ಸ, ಬುದ್ಧಪೀತಿಸಮಾಯುತೋ;

ಸಕನ್ತಿಂ ಪರಕನ್ತಿಞ್ಚ, ಜನಯಿಂ ತೇನ ಕನ್ತಿಮಾ.

೧೧೬. ‘‘ಜಿನೋ ತೇ ತಿತ್ಥಿಕಾಕಿಣ್ಣೇ [ಜನೋಘೇ ತಿತ್ಥಕಾಕಿಣ್ಣೇ (ಸೀ. ಪೀ.), ಜಿನೋ ಯೋ ತಿತ್ಥಿಕಾತಿಣ್ಣೋ (ಸ್ಯಾ.)], ಅಭಿಭುಯ್ಯ ಕುತಿತ್ಥಿಯೇ;

ಗುಣಂ ವದನ್ತೋ ಜೋತೇಸಿಂ [ಥೋಮೇಸಿಂ (ಸ್ಯಾ.)], ನಾಯಕಂ ಜುತಿಮಾ ತತೋ.

೧೧೭. ‘‘ಪಿಯಕಾರೀ ಜನಸ್ಸಾಪಿ, ಸಮ್ಬುದ್ಧಸ್ಸ ಗುಣಂ ವದಂ;

ಸರದೋವ ಸಸಙ್ಕೋಹಂ, ತೇನಾಸಿಂ ಪಿಯದಸ್ಸನೋ.

೧೧೮. ‘‘ಯಥಾಸತ್ತಿವಸೇನಾಹಂ, ಸಬ್ಬವಾಚಾಹಿ ಸನ್ಥವಿಂ;

ಸುಗತಂ ತೇನ ವಾಗಿಸೋ, ವಿಚಿತ್ತಪಟಿಭಾನವಾ.

೧೧೯. ‘‘ಯೇ ಬಾಲಾ ವಿಮತಿಂ ಪತ್ತಾ, ಪರಿಭೋನ್ತಿ ಮಹಾಮುನಿಂ;

ನಿಗ್ಗಹಿಂ ತೇ ಸದ್ಧಮ್ಮೇನ, ಪರಿಭೂತೋ ನ ತೇನಹಂ [ಪರಿಭೂತೇನ ತೇನಹಂ (ಸ್ಯಾ.)].

೧೨೦. ‘‘ಬುದ್ಧವಣ್ಣೇನ ಸತ್ತಾನಂ, ಕಿಲೇಸೇ ಅಪನೇಸಹಂ;

ನಿಕ್ಕಿಲೇಸಮನೋ ಹೋಮಿ, ತಸ್ಸ ಕಮ್ಮಸ್ಸ ವಾಹಸಾ.

೧೨೧. ‘‘ಸೋತೂನಂ ವುದ್ಧಿಮಜನಿಂ [ಬುದ್ಧಿಮಜನಿಂ (ಸೀ. ಪೀ.)], ಬುದ್ಧಾನುಸ್ಸತಿದೇಸಕೋ;

ತೇನಾಹಮಾಸಿಂ [ತೇನಾಪಿ ಚಾಸಿಂ (ಸ್ಯಾ.)] ಸಪ್ಪಞ್ಞೋ, ನಿಪುಣತ್ಥವಿಪಸ್ಸಕೋ.

೧೨೨. ‘‘ಸಬ್ಬಾಸವಪರಿಕ್ಖೀಣೋ, ತಿಣ್ಣಸಂಸಾರಸಾಗರೋ;

ಸಿಖೀವ ಅನುಪಾದಾನೋ, ಪಾಪುಣಿಸ್ಸಾಮಿ ನಿಬ್ಬುತಿಂ.

೧೨೩. ‘‘ಇಮಸ್ಮಿಂಯೇವ ಕಪ್ಪಸ್ಮಿಂ, ಯಮಹಂ ಸನ್ಥವಿಂ ಜಿನಂ;

ದುಗ್ಗತಿಂ ನಾಭಿಜಾನಾಮಿ, ಬುದ್ಧವಣ್ಣಸ್ಸಿದಂ ಫಲಂ.

೧೨೪. ‘‘ಕಿಲೇಸಾ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವೋ.

೧೨೫. ‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.

೧೨೬. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ಸುಗನ್ಧೋ ಥೇರೋ ಇಮಾ ಗಾಥಾಯೋ

ಅಭಾಸಿತ್ಥಾತಿ.

ಸುಗನ್ಧತ್ಥೇರಸ್ಸಾಪದಾನಂ ದಸಮಂ.

ತಿಣದಾಯಕವಗ್ಗೋ ತೇಪಞ್ಞಾಸಮೋ.