೮. ಬೋಧಿಸಮ್ಮಜ್ಜಕತ್ಥೇರಅಪದಾನಂ

೪೮. ‘‘ಅಹಂ ಪುರೇ ಬೋಧಿಪತ್ತಂ, ಉಜ್ಝಿತಂ ಚೇತಿಯಙ್ಗಣೇ;

ತಂ ಗಹೇತ್ವಾನ ಛಡ್ಡೇಸಿಂ, ಅಲಭಿಂ ವೀಸತೀಗುಣೇ.

೪೯. ‘‘ತಸ್ಸ ಕಮ್ಮಸ್ಸ ತೇಜೇನ, ಸಂಸರನ್ತೋ ಭವಾಭವೇ;

ದುವೇ ಭವೇ ಸಂಸರಾಮಿ, ದೇವತ್ತೇ ಚಾಪಿ ಮಾನುಸೇ.

೫೦. ‘‘ದೇವಲೋಕಾ ಚವಿತ್ವಾನ, ಆಗನ್ತ್ವಾ ಮಾನುಸಂ ಭವಂ;

ದುವೇ ಕುಲೇ ಪಜಾಯಾಮಿ, ಖತ್ತಿಯೇ ಚಾಪಿ ಬ್ರಾಹ್ಮಣೇ.

೫೧. ‘‘ಅಙ್ಗಪಚ್ಚಙ್ಗಸಮ್ಪನ್ನೋ, ಆರೋಹಪರಿಣಾಹವಾ;

ಅಭಿರೂಪೋ ಸುಚಿ ಹೋಮಿ, ಸಮ್ಪುಣ್ಣಙ್ಗೋ ಅನೂನಕೋ.

೫೨. ‘‘ದೇವಲೋಕೇ ಮನುಸ್ಸೇ ವಾ, ಜಾತೋ ವಾ ಯತ್ಥ ಕತ್ಥಚಿ;

ಭವೇ ಸುವಣ್ಣವಣ್ಣೋ ಚ, ಉತ್ತತ್ತಕನಕೂಪಮೋ.

೫೩. ‘‘ಮುದುಕಾ ಮದ್ದವಾ ಸ್ನಿದ್ಧಾ [ಮುದು ಮದ್ದವಾ ಸಿನಿದ್ಧಾ (ಸ್ಯಾ.)], ಸುಖುಮಾ ಸುಕುಮಾರಿಕಾ;

ಛವಿ ಮೇ ಸಬ್ಬದಾ ಹೋತಿ, ಬೋಧಿಪತ್ತೇ ಸುಛಡ್ಡಿತೇ [ಸುಛಡ್ಡಿನೇ (ಸೀ.)].

೫೪. ‘‘ಯತೋ ಕುತೋಚಿ ಗತೀಸು, ಸರೀರೇ ಸಮುದಾಗತೇ;

ನ ಲಿಮ್ಪತಿ ರಜೋಜಲ್ಲಂ, ವಿಪಾಕೋ ಪತ್ತಛಡ್ಡಿತೇ.

೫೫. ‘‘ಉಣ್ಹೇ ವಾತಾತಪೇ ತಸ್ಸ, ಅಗ್ಗಿತಾಪೇನ ವಾ ಪನ;

ಗತ್ತೇ ಸೇದಾ ನ ಮುಚ್ಚನ್ತಿ, ವಿಪಾಕೋ ಪತ್ತಛಡ್ಡಿತೇ.

೫೬. ‘‘ಕುಟ್ಠಂ ಗಣ್ಡೋ ಕಿಲಾಸೋ ಚ, ತಿಲಕಾ ಪಿಳಕಾ ತಥಾ;

ನ ಹೋನ್ತಿ ಕಾಯೇ ದದ್ದು ಚ, ವಿಪಾಕೋ ಪತ್ತಛಡ್ಡಿತೇ.

೫೭. ‘‘ಅಪರಮ್ಪಿ ಗುಣಂ ತಸ್ಸ, ನಿಬ್ಬತ್ತತಿ ಭವಾಭವೇ;

ರೋಗಾ ನ ಹೋನ್ತಿ ಕಾಯಸ್ಮಿಂ, ವಿಪಾಕೋ ಪತ್ತಛಡ್ಡಿತೇ.

೫೮. ‘‘ಅಪರಮ್ಪಿ ಗುಣಂ ತಸ್ಸ, ನಿಬ್ಬತ್ತತಿ ಭವಾಭವೇ;

ನ ಹೋತಿ ಚಿತ್ತಜಾ ಪೀಳಾ, ವಿಪಾಕೋ ಪತ್ತಛಡ್ಡಿತೇ.

೫೯. ‘‘ಅಪರಮ್ಪಿ ಗುಣಂ ತಸ್ಸ, ನಿಬ್ಬತ್ತತಿ ಭವಾಭವೇ;

ಅಮಿತ್ತಾ ನ ಭವನ್ತಸ್ಸ, ವಿಪಾಕೋ ಪತ್ತಛಡ್ಡಿತೇ.

೬೦. ‘‘ಅಪರಮ್ಪಿ ಗುಣಂ ತಸ್ಸ, ನಿಬ್ಬತ್ತತಿ ಭವಾಭವೇ;

ಅನೂನಭೋಗೋ ಭವತಿ, ವಿಪಾಕೋ ಪತ್ತಛಡ್ಡಿತೇ.

೬೧. ‘‘ಅಪರಮ್ಪಿ ಗುಣಂ ತಸ್ಸ, ನಿಬ್ಬತ್ತತಿ ಭವಾಭವೇ;

ಅಗ್ಗಿರಾಜೂಹಿ ಚೋರೇಹಿ, ನ ಹೋತಿ ಉದಕೇ ಭಯಂ.

೬೨. ‘‘ಅಪರಮ್ಪಿ ಗುಣಂ ತಸ್ಸ, ನಿಬ್ಬತ್ತತಿ ಭವಾಭವೇ;

ದಾಸಿದಾಸಾ ಅನುಚರಾ, ಹೋನ್ತಿ ಚಿತ್ತಾನುವತ್ತಕಾ.

೬೩. ‘‘ಯಮ್ಹಿ ಆಯುಪ್ಪಮಾಣಮ್ಹಿ, ಜಾಯತೇ ಮಾನುಸೇ ಭವೇ;

ತತೋ ನ ಹಾಯತೇ ಆಯು, ತಿಟ್ಠತೇ ಯಾವತಾಯುಕಂ.

೬೪. ‘‘ಅಬ್ಭನ್ತರಾ ಚ ಬಾಹಿರಾ [ಬಹಿಚರಾ (ಸೀ. ಪೀ. ಕ.)], ನೇಗಮಾ ಚ ಸರಟ್ಠಕಾ;

ನುಯುತ್ತಾ ಹೋನ್ತಿ ಸಬ್ಬೇಪಿ, ವುದ್ಧಿಕಾಮಾ ಸುಖಿಚ್ಛಕಾ.

೬೫. ‘‘ಭೋಗವಾ ಯಸವಾ ಹೋಮಿ, ಸಿರಿಮಾ ಞಾತಿಪಕ್ಖವಾ;

ಅಪೇತಭಯಸನ್ತಾಸೋ, ಭವೇಹಂ ಸಬ್ಬತೋ ಭವೇ.

೬೬. ‘‘ದೇವಾ ಮನುಸ್ಸಾ ಅಸುರಾ, ಗನ್ಧಬ್ಬಾ ಯಕ್ಖರಕ್ಖಸಾ;

ಸಬ್ಬೇ ತೇ ಪರಿರಕ್ಖನ್ತಿ, ಭವೇ ಸಂಸರತೋ ಸದಾ.

೬೭. ‘‘ದೇವಲೋಕೇ ಮನುಸ್ಸೇ ಚ, ಅನುಭೋತ್ವಾ ಉಭೋ ಯಸೇ;

ಅವಸಾನೇ ಚ ನಿಬ್ಬಾನಂ, ಸಿವಂ ಪತ್ತೋ ಅನುತ್ತರಂ.

೬೮. ‘‘ಸಮ್ಬುದ್ಧಮುದ್ದಿಸಿತ್ವಾನ, ಬೋಧಿಂ ವಾ ತಸ್ಸ ಸತ್ಥುನೋ;

ಯೋ ಪುಞ್ಞಂ ಪಸವೇ ಪೋಸೋ, ತಸ್ಸ ಕಿಂ ನಾಮ ದುಲ್ಲಭಂ.

೬೯. ‘‘ಮಗ್ಗೇ ಫಲೇ ಆಗಮೇ ಚ, ಝಾನಾಭಿಞ್ಞಾಗುಣೇಸು ಚ;

ಅಞ್ಞೇಸಂ ಅಧಿಕೋ ಹುತ್ವಾ, ನಿಬ್ಬಾಯಾಮಿ ಅನಾಸವೋ.

೭೦. ‘‘ಪುರೇಹಂ ಬೋಧಿಯಾ ಪತ್ತಂ, ಛಡ್ಡೇತ್ವಾ ಹಟ್ಠಮಾನಸೋ;

ಇಮೇಹಿ ವೀಸತಙ್ಗೇಹಿ, ಸಮಙ್ಗೀ ಹೋಮಿ ಸಬ್ಬದಾ.

೭೧. ‘‘ಕಿಲೇಸಾ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವೋ.

೭೨. ‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.

೭೩. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ಬೋಧಿಸಮ್ಮಜ್ಜಕೋ ಥೇರೋ ಇಮಾ ಗಾಥಾಯೋ

ಅಭಾಸಿತ್ಥಾತಿ.

ಬೋಧಿಸಮ್ಮಜ್ಜಕತ್ಥೇರಸ್ಸಾಪದಾನಂ ಅಟ್ಠಮಂ.