೫. ಪಞ್ಚಹತ್ಥಿಯತ್ಥೇರಅಪದಾನಂ

೭೭. ‘‘ಸುಮೇಧೋ ನಾಮ ಸಮ್ಬುದ್ಧೋ, ಗಚ್ಛತೇ ಅನ್ತರಾಪಣೇ;

ಓಕ್ಖಿತ್ತಚಕ್ಖು [ಖಿತ್ತಚಕ್ಖು (ಕ. ಸೀ. ಕ.)] ಮಿತಭಾಣೀ, ಸತಿಮಾ ಸಂವುತಿನ್ದ್ರಿಯೋ.

೭೮. ‘‘ಪಞ್ಚ ಉಪ್ಪಲಹತ್ಥಾನಿ, ಆವೇಳತ್ಥಂ ಅಹಂಸು ಮೇ;

ತೇನ ಬುದ್ಧಂ ಅಪೂಜೇಸಿಂ, ಪಸನ್ನೋ ಸೇಹಿ ಪಾಣಿಭಿ.

೭೯. ‘‘ಆರೋಪಿತಾ ಚ ತೇ ಪುಪ್ಫಾ, ಛದನಂ ಅಸ್ಸು ಸತ್ಥುನೋ;

ಸಮಾಧಿಂಸು [ಸಂಸಾವಿಂಸು (ಸೀ.)] ಮಹಾನಾಗಂ, ಸಿಸ್ಸಾ ಆಚರಿಯಂ ಯಥಾ.

೮೦. ‘‘ತಿಂಸಕಪ್ಪಸಹಸ್ಸಮ್ಹಿ, ಯಂ ಪುಪ್ಫಮಭಿರೋಪಯಿಂ;

ದುಗ್ಗತಿಂ ನಾಭಿಜಾನಾಮಿ, ಬುದ್ಧಪೂಜಾಯಿದಂ ಫಲಂ.

೮೧. ‘‘ಇತೋ ವೀಸಕಪ್ಪಸತೇ, ಅಹೇಸುಂ ಪಞ್ಚ ಖತ್ತಿಯಾ;

ಹತ್ಥಿಯಾ ನಾಮ ನಾಮೇನ, ಚಕ್ಕವತ್ತೀ ಮಹಬ್ಬಲಾ.

೮೨. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ಪಞ್ಚಹತ್ಥಿಯೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.

ಪಞ್ಚಹತ್ಥಿಯತ್ಥೇರಸ್ಸಾಪದಾನಂ ಪಞ್ಚಮಂ.