೨. ಮಣಿಪೂಜಕತ್ಥೇರಅಪದಾನಂ

೮. ‘‘ಪದುಮುತ್ತರೋ ನಾಮ ಜಿನೋ, ಸಬ್ಬಧಮ್ಮಾನ ಪಾರಗೂ;

ವಿವೇಕಕಾಮೋ ಸಮ್ಬುದ್ಧೋ, ಗಚ್ಛತೇ ಅನಿಲಞ್ಜಸೇ.

೯. ‘‘ಅವಿದೂರೇ ಹಿಮವನ್ತಸ್ಸ, ಮಹಾಜಾತಸ್ಸರೋ ಅಹು;

ತತ್ಥ ಮೇ ಭವನಂ ಆಸಿ, ಪುಞ್ಞಕಮ್ಮೇನ ಸಂಯುತಂ.

೧೦. ‘‘ಭವನಾ ಅಭಿನಿಕ್ಖಮ್ಮ, ಅದ್ದಸಂ ಲೋಕನಾಯಕಂ;

ಇನ್ದೀವರಂವ ಜಲಿತಂ, ಆದಿತ್ತಂವ ಹುತಾಸನಂ.

೧೧. ‘‘ವಿಚಿನಂ ನದ್ದಸಂ ಪುಪ್ಫಂ, ಪೂಜಯಿಸ್ಸನ್ತಿ ನಾಯಕಂ;

ಸಕಂ ಚಿತ್ತಂ ಪಸಾದೇತ್ವಾ, ಅವನ್ದಿಂ ಸತ್ಥುನೋ ಅಹಂ.

೧೨. ‘‘ಮಮ ಸೀಸೇ ಮಣಿಂ ಗಯ್ಹ, ಪೂಜಯಿಂ ಲೋಕನಾಯಕಂ;

ಇಮಾಯ ಮಣಿಪೂಜಾಯ, ವಿಪಾಕೋ ಹೋತು ಭದ್ದಕೋ.

೧೩. ‘‘ಪದುಮುತ್ತರೋ ಲೋಕವಿದೂ, ಆಹುತೀನಂ ಪಟಿಗ್ಗಹೋ;

ಅನ್ತಲಿಕ್ಖೇ ಠಿತೋ ಸತ್ಥಾ, ಇಮಂ ಗಾಥಂ ಅಭಾಸಥ.

೧೪. ‘ಸೋ ತೇ ಇಜ್ಝತು ಸಙ್ಕಪ್ಪೋ, ಲಭಸ್ಸು ವಿಪುಲಂ ಸುಖಂ;

ಇಮಾಯ ಮಣಿಪೂಜಾಯ, ಅನುಭೋಹಿ ಮಹಾಯಸಂ’.

೧೫. ‘‘ಇದಂ ವತ್ವಾನ ಭಗವಾ, ಜಲಜುತ್ತಮನಾಮಕೋ;

ಅಗಮಾಸಿ ಬುದ್ಧಸೇಟ್ಠೋ, ಯತ್ಥ ಚಿತ್ತಂ ಪಣೀಹಿತಂ.

೧೬. ‘‘ಸಟ್ಠಿಕಪ್ಪಾನಿ ದೇವಿನ್ದೋ, ದೇವರಜ್ಜಮಕಾರಯಿಂ;

ಅನೇಕಸತಕ್ಖತ್ತುಞ್ಚ, ಚಕ್ಕವತ್ತೀ ಅಹೋಸಹಂ.

೧೭. ‘‘ಪುಬ್ಬಕಮ್ಮಂ ಸರನ್ತಸ್ಸ, ದೇವಭೂತಸ್ಸ ಮೇ ಸತೋ;

ಮಣಿ ನಿಬ್ಬತ್ತತೇ ಮಯ್ಹಂ, ಆಲೋಕಕರಣೋ ಮಮಂ.

೧೮. ‘‘ಛಳಸೀತಿಸಹಸ್ಸಾನಿ, ನಾರಿಯೋ ಮೇ ಪರಿಗ್ಗಹಾ;

ವಿಚಿತ್ತವತ್ಥಾಭರಣಾ, ಆಮುಕ್ಕಮಣಿಕುಣ್ಡಲಾ [ಆಮುತ್ತಮಣಿಕುಣ್ಡಲಾ (ಸೀ. ಸ್ಯಾ. ಪೀ.)].

೧೯. ‘‘ಅಳಾರಪಮ್ಹಾ ಹಸುಲಾ, ಸುಸಞ್ಞಾ ತನುಮಜ್ಝಿಮಾ;

ಪರಿವಾರೇನ್ತಿ ಮಂ ನಿಚ್ಚಂ, ಮಣಿಪೂಜಾಯಿದಂ ಫಲಂ.

೨೦. ‘‘ಸೋಣ್ಣಮಯಾ ಮಣಿಮಯಾ, ಲೋಹಿತಙ್ಗಮಯಾ ತಥಾ;

ಭಣ್ಡಾ ಮೇ ಸುಕತಾ ಹೋನ್ತಿ, ಯದಿಚ್ಛಸಿ [ಯದಿಚ್ಛಾಯ (ಸೀ. ಪೀ.)] ಪಿಳನ್ಧನಾ.

೨೧. ‘‘ಕೂಟಾಗಾರಾ ಗಹಾರಮ್ಮಾ, ಸಯನಞ್ಚ ಮಹಾರಹಂ;

ಮಮ ಸಙ್ಕಪ್ಪಮಞ್ಞಾಯ, ನಿಬ್ಬತ್ತನ್ತಿ ಯದಿಚ್ಛಕಂ.

೨೨. ‘‘ಲಾಭಾ ತೇಸಂ ಸುಲದ್ಧಞ್ಚ, ಯೇ ಲಭನ್ತಿ ಉಪಸ್ಸುತಿಂ;

ಪುಞ್ಞಕ್ಖೇತ್ತಂ ಮನುಸ್ಸಾನಂ, ಓಸಧಂ ಸಬ್ಬಪಾಣಿನಂ.

೨೩. ‘‘ಮಯ್ಹಮ್ಪಿ ಸುಕತಂ ಕಮ್ಮಂ, ಯೋಹಂ ಅದಕ್ಖಿ ನಾಯಕಂ;

ವಿನಿಪಾತಾ ಪಮುತ್ತೋಮ್ಹಿ, ಪತ್ತೋಮ್ಹಿ ಅಚಲಂ ಪದಂ.

೨೪. ‘‘ಯಂ ಯಂ ಯೋನುಪಪಜ್ಜಾಮಿ, ದೇವತ್ತಂ ಅಥ ಮಾನುಸಂ;

ದಿವಸಞ್ಚೇವ ರತ್ತಿಞ್ಚ [ಸಮನ್ತಾ ಸತ್ತರತನಾ (ಸೀ. ಪೀ. ಕ.)], ಆಲೋಕೋ ಹೋತಿ ಮೇ ಸದಾ.

೨೫. ‘‘ತಾಯೇವ ಮಣಿಪೂಜಾಯ, ಅನುಭೋತ್ವಾನ ಸಮ್ಪದಾ;

ಞಾಣಾಲೋಕೋ ಮಯಾ ದಿಟ್ಠೋ, ಪತ್ತೋಮ್ಹಿ ಅಚಲಂ ಪದಂ.

೨೬. ‘‘ಸತಸಹಸ್ಸಿತೋ ಕಪ್ಪೇ, ಯಂ ಮಣಿಂ ಅಭಿಪೂಜಯಿಂ;

ದುಗ್ಗತಿಂ ನಾಭಿಜಾನಾಮಿ, ಮಣಿಪೂಜಾಯಿದಂ ಫಲಂ.

೨೭. ‘‘ಕಿಲೇಸಾ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವೋ.

೨೮. ‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.

೨೯. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ಮಣಿಪೂಜಕೋ ಥೇರೋ ಇಮಾ ಗಾಥಾಯೋ

ಅಭಾಸಿತ್ಥಾತಿ.

ಮಣಿಪೂಜಕತ್ಥೇರಸ್ಸಾಪದಾನಂ ದುತಿಯಂ.