೩. ಉಕ್ಕಾಸತಿಕತ್ಥೇರಅಪದಾನಂ

೩೦. ‘‘ಕೋಸಿಕೋ ನಾಮ ಭಗವಾ, ಚಿತ್ತಕೂಟೇ ವಸೀ ತದಾ;

ಝಾಯೀ ಝಾನರತೋ ಬುದ್ಧೋ, ವಿವೇಕಾಭಿರತೋ ಮುನಿ.

೩೧. ‘‘ಅಜ್ಝೋಗಾಹೇತ್ವಾ [ಅಜ್ಝೋಗಹೇತ್ವಾ (ಸೀ. ಸ್ಯಾ. ಪೀ.)] ಹಿಮವನ್ತಂ, ನಾರೀಗಣಪುರಕ್ಖತೋ;

ಅದ್ದಸಂ ಕೋಸಿಕಂ ಬುದ್ಧಂ, ಪುಣ್ಣಮಾಯೇವ ಚನ್ದಿಮಂ.

೩೨. ‘‘ಉಕ್ಕಾಸತೇ ಗಹೇತ್ವಾನ, ಪರಿವಾರೇಸಹಂ ತದಾ;

ಸತ್ತರತ್ತಿನ್ದಿವಂ ಠತ್ವಾ [ಬುದ್ಧೋ (ಸ್ಯಾ. ಕ.)], ಅಟ್ಠಮೇನ ಅಗಚ್ಛಹಂ.

೩೩. ‘‘ವುಟ್ಠಿತಂ ಕೋಸಿಕಂ ಬುದ್ಧಂ, ಸಯಮ್ಭುಂ ಅಪರಾಜಿತಂ;

ಪಸನ್ನಚಿತ್ತೋ ವನ್ದಿತ್ವಾ, ಏಕಂ ಭಿಕ್ಖಂ ಅದಾಸಹಂ.

೩೪. ‘‘ತೇನ ಕಮ್ಮೇನ ದ್ವಿಪದಿನ್ದ, ಲೋಕಜೇಟ್ಠ ನರಾಸಭ;

ಉಪ್ಪಜ್ಜಿಂ ತುಸಿತೇ ಕಾಯೇ, ಏಕಭಿಕ್ಖಾಯಿದಂ ಫಲಂ.

೩೫. ‘‘ದಿವಸಞ್ಚೇವ ರತ್ತಿಞ್ಚ, ಆಲೋಕೋ ಹೋತಿ ಮೇ ಸದಾ;

ಸಮನ್ತಾ ಯೋಜನಸತಂ, ಓಭಾಸೇನ ಫರಾಮಹಂ.

೩೬. ‘‘ಪಞ್ಚಪಞ್ಞಾಸಕಪ್ಪಮ್ಹಿ, ಚಕ್ಕವತ್ತೀ ಅಹೋಸಹಂ;

ಚಾತುರನ್ತೋ ವಿಜಿತಾವೀ, ಜಮ್ಬುಮಣ್ಡಸ್ಸ [ಜಮ್ಬುಸಣ್ಡಸ್ಸ (ಪೀ.)] ಇಸ್ಸರೋ.

೩೭. ‘‘ತದಾ ಮೇ ನಗರಂ ಆಸಿ, ಇದ್ಧಂ ಫೀತಂ ಸುನಿಮ್ಮಿತಂ;

ತಿಂಸಯೋಜನಮಾಯಾಮಂ, ವಿತ್ಥಾರೇನ ಚ ವೀಸತಿ.

೩೮. ‘‘ಸೋಭಣಂ ನಾಮ ನಗರಂ, ವಿಸ್ಸಕಮ್ಮೇನ ಮಾಪಿತಂ;

ದಸಸದ್ದಾವಿವಿತ್ತಂ ತಂ, ಸಮ್ಮತಾಳಸಮಾಹಿತಂ.

೩೯. ‘‘ನ ತಮ್ಹಿ ನಗರೇ ಅತ್ಥಿ, ವಲ್ಲಿಕಟ್ಠಞ್ಚ ಮತ್ತಿಕಾ;

ಸಬ್ಬಸೋಣ್ಣಮಯಂಯೇವ, ಜೋತತೇ ನಿಚ್ಚಕಾಲಿಕಂ.

೪೦. ‘‘ಚತುಪಾಕಾರಪರಿಕ್ಖಿತ್ತಂ, ತಯೋ ಆಸುಂ ಮಣಿಮಯಾ;

ವೇಮಜ್ಝೇ ತಾಲಪನ್ತೀ ಚ, ವಿಸ್ಸಕಮ್ಮೇನ ಮಾಪಿತಾ.

೪೧. ‘‘ದಸಸಹಸ್ಸಪೋಕ್ಖರಞ್ಞೋ, ಪದುಮುಪ್ಪಲಛಾದಿತಾ;

ಪುಣ್ಡರೀಕೇಹಿ [ಪುಣ್ಡರೀಕಾದಿ (ಸ್ಯಾ.)] ಸಞ್ಛನ್ನಾ, ನಾನಾಗನ್ಧಸಮೀರಿತಾ.

೪೨. ‘‘ಚತುನ್ನವುತಿತೋ ಕಪ್ಪೇ, ಯಂ ಉಕ್ಕಂ ಧಾರಯಿಂ ಅಹಂ;

ದುಗ್ಗತಿಂ ನಾಭಿಜಾನಾಮಿ, ಉಕ್ಕಧಾರಸ್ಸಿದಂ ಫಲಂ.

೪೩. ‘‘ಕಿಲೇಸಾ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವೋ.

೪೪. ‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.

೪೫. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ಉಕ್ಕಾಸತಿಕೋ ಥೇರೋ ಇಮಾ ಗಾಥಾಯೋ

ಅಭಾಸಿತ್ಥಾತಿ.

ಉಕ್ಕಾಸತಿಕತ್ಥೇರಸ್ಸಾಪದಾನಂ ತತಿಯಂ.