೮. ಪಾದಪೀಠಿಯತ್ಥೇರಅಪದಾನಂ

೫೦. ‘‘ಸುಮೇಧೋ ನಾಮ ಸಮ್ಬುದ್ಧೋ, ಅಗ್ಗೋ ಕಾರುಣಿಕೋ ಮುನಿ;

ತಾರಯಿತ್ವಾ ಬಹೂ ಸತ್ತೇ, ನಿಬ್ಬುತೋ ಸೋ ಮಹಾಯಸೋ.

೫೧. ‘‘ಸೀಹಾಸನಸ್ಸ ಸಾಮನ್ತಾ, ಸುಮೇಧಸ್ಸ ಮಹೇಸಿನೋ;

ಪಸನ್ನಚಿತ್ತೋ ಸುಮನೋ, ಪಾದಪೀಠಮಕಾರಯಿಂ.

೫೨. ‘‘ಕತ್ವಾನ ಕುಸಲಂ ಕಮ್ಮಂ, ಸುಖಪಾಕಂ ಸುಖುದ್ರಯಂ;

ಪುಞ್ಞಕಮ್ಮೇನ ಸಂಯುತ್ತೋ, ತಾವತಿಂಸಮಗಚ್ಛಹಂ.

೫೩. ‘‘ತತ್ಥ ಮೇ ವಸಮಾನಸ್ಸ, ಪುಞ್ಞಕಮ್ಮಸಮಙ್ಗಿನೋ;

ಪದಾನಿ ಉದ್ಧರನ್ತಸ್ಸ, ಸೋಣ್ಣಪೀಠಾ ಭವನ್ತಿ ಮೇ.

೫೪. ‘‘ಲಾಭಾ ತೇಸಂ ಸುಲದ್ಧಂ ವೋ, ಯೇ ಲಭನ್ತಿ ಉಪಸ್ಸುತಿಂ;

ನಿಬ್ಬುತೇ ಕಾರಂ ಕತ್ವಾನ, ಲಭನ್ತಿ ವಿಪುಲಂ ಸುಖಂ.

೫೫. ‘‘ಮಯಾಪಿ ಸುಕತಂ ಕಮ್ಮಂ, ವಾಣಿಜ್ಜಂ ಸುಪ್ಪಯೋಜಿತಂ;

ಪಾದಪೀಠಂ ಕರಿತ್ವಾನ, ಸೋಣ್ಣಪೀಠಂ ಲಭಾಮಹಂ.

೫೬. ‘‘ಯಂ ಯಂ ದಿಸಂ ಪಕ್ಕಮಾಮಿ, ಕೇನಚಿ ಕಿಚ್ಚಯೇನಹಂ [ಪಚ್ಚಯೇನಹಂ (ಸೀ. ಪೀ.)];

ಸೋಣ್ಣಪೀಠೇ ಅಕ್ಕಮಾಮಿ [ಸೋಣ್ಣಪೀಠೇನ ಕಮಾಮಿ (ಕ.)], ಪುಞ್ಞಕಮ್ಮಸ್ಸಿದಂ ಫಲಂ.

೫೭. ‘‘ತಿಂಸಕಪ್ಪಸಹಸ್ಸಮ್ಹಿ, ಯಂ ಕಮ್ಮಮಕರಿಂ ತದಾ;

ದುಗ್ಗತಿಂ ನಾಭಿಜಾನಾಮಿ, ಪಾದಪೀಠಸ್ಸಿದಂ ಫಲಂ.

೫೮. ‘‘ಕಿಲೇಸಾ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವೋ.

೫೯. ‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.

೬೦. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ಪಾದಪೀಠಿಯೋ ಥೇರೋ ಇಮಾ ಗಾಥಾಯೋ

ಅಭಾಸಿತ್ಥಾತಿ.

ಪಾದಪೀಠಿಯತ್ಥೇರಸ್ಸಾಪದಾನಂ ಅಟ್ಠಮಂ.