೯. ವೇದಿಕಾರಕತ್ಥೇರಅಪದಾನಂ

೬೧. ‘‘ಪದುಮುತ್ತರಸ್ಸ ಭಗವತೋ, ಬೋಧಿಯಾ ಪಾದಪುತ್ತಮೇ;

ವೇದಿಕಂ ಸುಕತಂ ಕತ್ವಾ, ಸಕಂ ಚಿತ್ತಂ ಪಸಾದಯಿಂ.

೬೨. ‘‘ಅತೋಳಾರಾನಿ [ಅಥೋಳಾರಾನಿ (ಸೀ. ಪೀ.), ಅಗ್ಗೋಳಾರಾನಿ (ಸ್ಯಾ.)] ಭಣ್ಡಾನಿ, ಕತಾನಿ ಅಕತಾನಿ ಚ;

ಅನ್ತಲಿಕ್ಖಾ ಪವಸ್ಸನ್ತಿ, ವೇದಿಕಾಯ ಇದಂ ಫಲಂ.

೬೩. ‘‘ಉಭತೋ ಬ್ಯೂಳ್ಹಸಙ್ಗಾಮೇ, ಪಕ್ಖನ್ದನ್ತೋ ಭಯಾನಕೇ;

ಭಯಭೇರವಂ ನ ಪಸ್ಸಾಮಿ, ವೇದಿಕಾಯ ಇದಂ ಫಲಂ.

೬೪. ‘‘ಮಮ ಸಙ್ಕಪ್ಪಮಞ್ಞಾಯ, ಬ್ಯಮ್ಹಂ ನಿಬ್ಬತ್ತತೇ ಸುಭಂ;

ಸಯನಾನಿ ಮಹಗ್ಘಾನಿ, ವೇದಿಕಾಯ ಇದಂ ಫಲಂ.

೬೫. ‘‘ಸತಸಹಸ್ಸಿತೋ ಕಪ್ಪೇ, ಯಂ ವೇದಿಕಮಕಾರಯಿಂ;

ದುಗ್ಗತಿಂ ನಾಭಿಜಾನಾಮಿ, ವೇದಿಕಾಯ ಇದಂ ಫಲಂ.

೬೬. ‘‘ಕಿಲೇಸಾ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವೋ.

೬೭. ‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.

೬೮. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ವೇದಿಕಾರಕೋ ಥೇರೋ ಇಮಾ ಗಾಥಾಯೋ

ಅಭಾಸಿತ್ಥಾತಿ.

ವೇದಿಕಾರಕತ್ಥೇರಸ್ಸಾಪದಾನಂ ನವಮಂ.