೭. ಸೀಹಾಸನಿಕತ್ಥೇರಅಪದಾನಂ

೪೨. ‘‘ಪದುಮುತ್ತರಸ್ಸ ಭಗವತೋ, ಸಬ್ಬಭೂತಹಿತೇಸಿನೋ;

ಪಸನ್ನಚಿತ್ತೋ ಸುಮನೋ, ಸೀಹಾಸನಮದಾಸಹಂ.

೪೩. ‘‘ದೇವಲೋಕೇ ಮನುಸ್ಸೇ ವಾ, ಯತ್ಥ ಯತ್ಥ ವಸಾಮಹಂ;

ಲಭಾಮಿ ವಿಪುಲಂ ಬ್ಯಮ್ಹಂ, ಸೀಹಾಸನಸ್ಸಿದಂ ಫಲಂ.

೪೪. ‘‘ಸೋಣ್ಣಮಯಾ ರೂಪಿಮಯಾ, ಲೋಹಿತಙ್ಗಮಯಾ [ಲೋಹಿತಙ್ಕಮಯಾ (ಸೀ. ಸ್ಯಾ. ಪೀ.)] ಬಹೂ;

ಮಣಿಮಯಾ ಚ ಪಲ್ಲಙ್ಕಾ, ನಿಬ್ಬತ್ತನ್ತಿ ಮಮಂ ಸದಾ.

೪೫. ‘‘ಬೋಧಿಯಾ ಆಸನಂ ಕತ್ವಾ, ಜಲಜುತ್ತಮನಾಮಿನೋ;

ಉಚ್ಚೇ ಕುಲೇ ಪಜಾಯಾಮಿ, ಅಹೋ ಧಮ್ಮಸುಧಮ್ಮತಾ.

೪೬. ‘‘ಸತಸಹಸ್ಸಿತೋ ಕಪ್ಪೇ, ಸೀಹಾಸನಮಕಾಸಹಂ;

ದುಗ್ಗತಿಂ ನಾಭಿಜಾನಾಮಿ, ಸೀಹಾಸನಸ್ಸಿದಂ ಫಲಂ.

೪೭. ‘‘ಕಿಲೇಸಾ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವೋ.

೪೮. ‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.

೪೯. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ಸೀಹಾಸನಿಕೋ ಥೇರೋ ಇಮಾ ಗಾಥಾಯೋ

ಅಭಾಸಿತ್ಥಾತಿ.

ಸೀಹಾಸನಿಕತ್ಥೇರಸ್ಸಾಪದಾನಂ ಸತ್ತಮಂ.