೭. ಉಚ್ಛಙ್ಗಪುಪ್ಫಿಯತ್ಥೇರಅಪದಾನಂ

೧೪೨. ‘‘ನಗರೇ ಬನ್ಧುಮತಿಯಾ, ಅಹೋಸಿಂ ಮಾಲಿಕೋ ತದಾ;

ಉಚ್ಛಙ್ಗಂ ಪೂರಯಿತ್ವಾನ, ಅಗಮಂ ಅನ್ತರಾಪಣಂ.

೧೪೩. ‘‘ಭಗವಾ ತಮ್ಹಿ ಸಮಯೇ, ಭಿಕ್ಖುಸಙ್ಘಪುರಕ್ಖತೋ;

ಮಹತಾ ಆನುಭಾವೇನ, ನಿಯ್ಯಾತಿ ಲೋಕನಾಯಕೋ.

೧೪೪. ‘‘ದಿಸ್ವಾನ ಲೋಕಪಜ್ಜೋತಂ, ವಿಪಸ್ಸಿಂ ಲೋಕತಾರಣಂ;

ಪುಪ್ಫಂ ಪಗ್ಗಯ್ಹ ಉಚ್ಛಙ್ಗಾ, ಬುದ್ಧಸೇಟ್ಠಂ ಅಪೂಜಯಿಂ.

೧೪೫. ‘‘ಏಕನವುತಿತೋ ಕಪ್ಪೇ, ಯಂ ಪುಪ್ಫಮಭಿಪೂಜಯಿಂ;

ದುಗ್ಗತಿಂ ನಾಭಿಜಾನಾಮಿ, ಬುದ್ಧಪೂಜಾಯಿದಂ ಫಲಂ.

೧೪೬. ‘‘ಕಿಲೇಸಾ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವೋ.

೧೪೭. ‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.

೧೪೮. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ಉಚ್ಛಙ್ಗಪುಪ್ಫಿಯೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.

ಉಚ್ಛಙ್ಗಪುಪ್ಫಿಯತ್ಥೇರಸ್ಸಾಪದಾನಂ ಸತ್ತಮಂ.