೮. ಯಾಗುದಾಯಕತ್ಥೇರಅಪದಾನಂ

೧೪೯. ‘‘ಅತಿಥಿಂ [ಅತೀತಂ (ಕ.)] ಮೇ ಗಹೇತ್ವಾನ, ಅಗಚ್ಛಿಂ ಗಾಮಕಂ ತದಾ;

ಸಮ್ಪುಣ್ಣನದಿಕಂ ದಿಸ್ವಾ, ಸಙ್ಘಾರಾಮಂ ಉಪಾಗಮಿಂ.

೧೫೦. ‘‘ಆರಞ್ಞಕಾ ಧುತಧರಾ, ಝಾಯಿನೋ ಲೂಖಚೀವರಾ;

ವಿವೇಕಾಭಿರತಾ ಧೀರಾ, ಸಙ್ಘಾರಾಮೇ ವಸನ್ತಿ ತೇ.

೧೫೧. ‘‘ಗತಿ ತೇಸಂ ಉಪಚ್ಛಿನ್ನಾ, ಸುವಿಮುತ್ತಾನ ತಾದಿನಂ;

ಪಿಣ್ಡಾಯ ತೇ ನ ಗಚ್ಛನ್ತಿ, ಓರುದ್ಧನದಿತಾಯ ಹಿ [ಓರುದ್ಧನದಿಕಾಯತಿಂ (ಸ್ಯಾ.)].

೧೫೨. ‘‘ಪಸನ್ನಚಿತ್ತೋ ಸುಮನೋ, ವೇದಜಾತೋ ಕತಞ್ಜಲೀ;

ತಣ್ಡುಲಂ ಮೇ ಗಹೇತ್ವಾನ, ಯಾಗುದಾನಂ ಅದಾಸಹಂ.

೧೫೩. ‘‘ಪಞ್ಚನ್ನಂ ಯಾಗುಂ ದತ್ವಾನ, ಪಸನ್ನೋ ಸೇಹಿ ಪಾಣಿಭಿ;

ಸಕಕಮ್ಮಾಭಿರದ್ಧೋಹಂ, ತಾವತಿಂಸಮಗಚ್ಛಹಂ.

೧೫೪. ‘‘ಮಣಿಮಯಞ್ಚ ಮೇ ಬ್ಯಮ್ಹಂ, ನಿಬ್ಬತ್ತಿ ತಿದಸೇ ಗಣೇ;

ನಾರೀಗಣೇಹಿ ಸಹಿತೋ, ಮೋದಾಮಿ ಬ್ಯಮ್ಹಮುತ್ತಮೇ.

೧೫೫. ‘‘ತೇತ್ತಿಂಸಕ್ಖತ್ತುಂ ದೇವಿನ್ದೋ, ದೇವರಜ್ಜಮಕಾರಯಿಂ;

ತಿಂಸಕ್ಖತ್ತುಂ ಚಕ್ಕವತ್ತೀ, ಮಹಾರಜ್ಜಮಕಾರಯಿಂ.

೧೫೬. ‘‘ಪದೇಸರಜ್ಜಂ ವಿಪುಲಂ, ಗಣನಾತೋ ಅಸಙ್ಖಿಯಂ;

ದೇವಲೋಕೇ ಮನುಸ್ಸೇ ವಾ, ಅನುಭೋತ್ವಾ ಸಯಂ [ಯಸಂ (ಸ್ಯಾ.)] ಅಹಂ.

೧೫೭. ‘‘ಪಚ್ಛಿಮೇ ಭವೇ ಸಮ್ಪತ್ತೇ, ಪಬ್ಬಜಿಂ ಅನಗಾರಿಯಂ;

ಸಹ ಓರೋಪಿತೇ ಕೇಸೇ, ಸಬ್ಬಂ ಸಮ್ಪಟಿವಿಜ್ಝಹಂ.

೧೫೮. ‘‘ಖಯತೋ ವಯತೋ ಚಾಪಿ, ಸಮ್ಮಸನ್ತೋ ಕಳೇವರಂ;

ಪುರೇ ಸಿಕ್ಖಾಪದಾದಾನಾ, ಅರಹತ್ತಮಪಾಪುಣಿಂ.

೧೫೯. ‘‘ಸುದಿನ್ನಂ ಮೇ ದಾನವರಂ, ವಾಣಿಜ್ಜಂ ಸಮ್ಪಯೋಜಿತಂ;

ತೇನೇವ ಯಾಗುದಾನೇನ, ಪತ್ತೋಮ್ಹಿ ಅಚಲಂ ಪದಂ.

೧೬೦. ‘‘ಸೋಕಂ ಪರಿದ್ದವಂ ಬ್ಯಾಧಿಂ, ದರಥಂ ಚಿತ್ತತಾಪನಂ;

ನಾಭಿಜಾನಾಮಿ ಉಪ್ಪನ್ನಂ, ಯಾಗುದಾನಸ್ಸಿದಂ ಫಲಂ.

೧೬೧. ‘‘ಯಾಗುಂ ಸಙ್ಘಸ್ಸ ದತ್ವಾನ, ಪುಞ್ಞಕ್ಖೇತ್ತೇ ಅನುತ್ತರೇ;

ಪಞ್ಚಾನಿಸಂಸೇ ಅನುಭೋಮಿ, ಅಹೋ ಯಾಗುಸುಯಿಟ್ಠತಾ.

೧೬೨. ‘‘ಅಬ್ಯಾಧಿತಾ ರೂಪವತಾ, ಖಿಪ್ಪಂ ಧಮ್ಮನಿಸನ್ತಿತಾ [ನಿಬುಜ್ಝಿತಾ (ಸ್ಯಾ.)];

ಲಾಭಿತಾ ಅನ್ನಪಾನಸ್ಸ, ಆಯು ಪಞ್ಚಮಕಂ ಮಮ.

೧೬೩. ‘‘ಯೋ ಕೋಚಿ ವೇದಂ ಜನಯಂ, ಸಙ್ಘೇ ಯಾಗುಂ ದದೇಯ್ಯ ಸೋ;

ಇಮಾನಿ ಪಞ್ಚ ಠಾನಾನಿ, ಪಟಿಗಣ್ಹೇಯ್ಯ ಪಣ್ಡಿತೋ.

೧೬೪. ‘‘ಕರಣೀಯಂ ಕತಂ ಸಬ್ಬಂ, ಭವಾ ಉಗ್ಘಾಟಿತಾ ಮಯಾ;

ಸಬ್ಬಾಸವಾ ಪರಿಕ್ಖೀಣಾ, ನತ್ಥಿ ದಾನಿ ಪುನಬ್ಭವೋ.

೧೬೫. ‘‘ಸೋ ಅಹಂ ವಿಚರಿಸ್ಸಾಮಿ, ಗಾಮಾ ಗಾಮಂ ಪುರಾ ಪುರಂ;

ನಮಸ್ಸಮಾನೋ ಸಮ್ಬುದ್ಧಂ, ಧಮ್ಮಸ್ಸ ಚ ಸುಧಮ್ಮತಂ.

೧೬೬. ‘‘ತಿಂಸಕಪ್ಪಸಹಸ್ಸಮ್ಹಿ, ಯಂ ದಾನಮದದಿಂ ತದಾ;

ದುಗ್ಗತಿಂ ನಾಭಿಜಾನಾಮಿ, ಯಾಗುದಾನಸ್ಸಿದಂ ಫಲಂ.

೧೬೭. ‘‘ಕಿಲೇಸಾ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವೋ.

೧೬೮. ‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.

೧೬೯. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ಯಾಗುದಾಯಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.

ಯಾಗುದಾಯಕತ್ಥೇರಸ್ಸಾಪದಾನಂ ಅಟ್ಠಮಂ.