೬. ಏಕದೀಪಿಯತ್ಥೇರಅಪದಾನಂ

೧೨೪. ‘‘ಪರಿನಿಬ್ಬುತೇ ಸುಗತೇ, ಸಿದ್ಧತ್ಥೇ ಲೋಕನಾಯಕೇ;

ಸದೇವಮಾನುಸಾ ಸಬ್ಬೇ, ಪೂಜೇನ್ತಿ ದ್ವಿಪದುತ್ತಮಂ.

೧೨೫. ‘‘ಆರೋಪಿತೇ ಚ ಚಿತಕೇ, ಸಿದ್ಧತ್ಥೇ ಲೋಕನಾಯಕೇ;

ಯಥಾಸಕೇನ ಥಾಮೇನ, ಚಿತಂ ಪೂಜೇನ್ತಿ ಸತ್ಥುನೋ.

೧೨೬. ‘‘ಅವಿದೂರೇ ಚಿತಕಸ್ಸ, ದೀಪಂ ಉಜ್ಜಾಲಯಿಂ ಅಹಂ;

ಯಾವ ಉದೇತಿ ಸೂರಿಯೋ, ದೀಪಂ ಮೇ ತಾವ ಉಜ್ಜಲಿ.

೧೨೭. ‘‘ತೇನ ಕಮ್ಮೇನ ಸುಕತೇನ, ಚೇತನಾಪಣಿಧೀಹಿ ಚ;

ಜಹಿತ್ವಾ ಮಾನುಸಂ ದೇಹಂ, ತಾವತಿಂಸಮಗಚ್ಛಹಂ.

೧೨೮. ‘‘ತತ್ಥ ಮೇ ಸುಕತಂ ಬ್ಯಮ್ಹಂ, ಏಕದೀಪೀತಿ ಞಾಯತಿ;

ದೀಪಸತಸಹಸ್ಸಾನಿ, ಬ್ಯಮ್ಹೇ ಪಜ್ಜಲರೇ ಮಮ.

೧೨೯. ‘‘ಉದಯನ್ತೋವ ಸೂರಿಯೋ, ದೇಹೋ ಮೇ ಜೋತತೇ ಸದಾ;

ಸಪ್ಪಭಾಹಿ ಸರೀರಸ್ಸ, ಆಲೋಕೋ ಹೋತಿ ಮೇ ಸದಾ.

೧೩೦. ‘‘ತಿರೋಕುಟ್ಟಂ [ತಿರೋಕುಡ್ಡಂ (ಸೀ. ಸ್ಯಾ. ಕ.)] ತಿರೋಸೇಲಂ, ಸಮತಿಗ್ಗಯ್ಹ [ಸಬ್ಬತ್ಥಪಿ ಏವಮೇವ ದಿಸ್ಸತಿ] ಪಬ್ಬತಂ;

ಸಮನ್ತಾ ಯೋಜನಸತಂ, ಪಸ್ಸಾಮಿ ಚಕ್ಖುನಾ ಅಹಂ.

೧೩೧. ‘‘ಸತ್ತಸತ್ತತಿಕ್ಖತ್ತುಞ್ಚ, ದೇವಲೋಕೇ ರಮಿಂ ಅಹಂ;

ಏಕತಿಂಸತಿಕ್ಖತ್ತುಞ್ಚ, ದೇವರಜ್ಜಮಕಾರಯಿಂ.

೧೩೨. ‘‘ಅಟ್ಠವೀಸತಿಕ್ಖತ್ತುಞ್ಚ, ಚಕ್ಕವತ್ತೀ ಅಹೋಸಹಂ;

ಪದೇಸರಜ್ಜಂ ವಿಪುಲಂ, ಗಣನಾತೋ ಅಸಙ್ಖಿಯಂ.

೧೩೩. ‘‘ದೇವಲೋಕಾ ಚವಿತ್ವಾನ, ನಿಬ್ಬತ್ತಿಂ ಮಾತುಕುಚ್ಛಿಯಂ;

ಮಾತುಕುಚ್ಛಿಗತಸ್ಸಾಪಿ, ಅಕ್ಖಿ ಮೇ ನ ನಿಮೀಲತಿ.

೧೩೪. ‘‘ಜಾತಿಯಾ ಚತುವಸ್ಸೋಹಂ, ಪಬ್ಬಜಿಂ ಅನಗಾರಿಯಂ;

ಅಡ್ಢಮಾಸೇ ಅಸಮ್ಪತ್ತೇ, ಅರಹತ್ತಮಪಾಪುಣಿಂ.

೧೩೫. ‘‘ದಿಬ್ಬಚಕ್ಖುಂ ವಿಸೋಧೇಸಿಂ, ಭವಾ ಸಬ್ಬೇ ಸಮೂಹತಾ;

ಸಬ್ಬೇ ಕಿಲೇಸಾ ಸಞ್ಛಿನ್ನಾ, ಏಕದೀಪಸ್ಸಿದಂ ಫಲಂ.

೧೩೬. ‘‘ತಿರೋಕುಟ್ಟಂ ತಿರೋಸೇಲಂ, ಪಬ್ಬತಞ್ಚಾಪಿ ಕೇವಲಂ;

ಸಮತಿಕ್ಕಮ್ಮ [ಸಬ್ಬತ್ಥಪೀ ಏವಮೇವ ದಿಸ್ಸತಿ] ಪಸ್ಸಾಮಿ, ಏಕದೀಪಸ್ಸಿದಂ ಫಲಂ.

೧೩೭. ‘‘ವಿಸಮಾ ಮೇ ಸಮಾ ಹೋನ್ತಿ, ಅನ್ಧಕಾರೋ ನ ವಿಜ್ಜತಿ;

ನಾಹಂ ಪಸ್ಸಾಮಿ ತಿಮಿರಂ, ಏಕದೀಪಸ್ಸಿದಂ ಫಲಂ.

೧೩೮. ‘‘ಚತುನ್ನವುತಿತೋ ಕಪ್ಪೇ, ಯಂ ದೀಪಮದದಿಂ ತದಾ;

ದುಗ್ಗತಿಂ ನಾಭಿಜಾನಾಮಿ, ಏಕದೀಪಸ್ಸಿದಂ ಫಲಂ.

೧೩೯. ‘‘ಕಿಲೇಸಾ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವೋ.

೧೪೦. ‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.

೧೪೧. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ಏಕದೀಪಿಯೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.

ಏಕದೀಪಿಯತ್ಥೇರಸ್ಸಾಪದಾನಂ ಛಟ್ಠಂ.