೩. ತಿಣಸೂಲಕಛಾದನಿಯತ್ಥೇರಅಪದಾನಂ

೭೯. ‘‘ಜಾತಿಂ ಜರಞ್ಚ ಮರಣಂ, ಪಚ್ಚವೇಕ್ಖಿಂ ಅಹಂ ತದಾ;

ಏಕಕೋ ಅಭಿನಿಕ್ಖಮ್ಮ, ಪಬ್ಬಜಿಂ ಅನಗಾರಿಯಂ.

೮೦. ‘‘ಚರಮಾನೋನುಪುಬ್ಬೇನ, ಗಙ್ಗಾತೀರಂ ಉಪಾಗಮಿಂ;

ತತ್ಥದ್ದಸಾಸಿಂ ಪಥವಿಂ, ಗಙ್ಗಾತೀರೇ ಸಮುನ್ನತಂ.

೮೧. ‘‘ಅಸ್ಸಮಂ ತತ್ಥ ಮಾಪೇತ್ವಾ, ವಸಾಮಿ ಅಸ್ಸಮೇ ಅಹಂ;

ಸುಕತೋ ಚಙ್ಕಮೋ ಮಯ್ಹಂ, ನಾನಾದಿಜಗಣಾಯುತೋ.

೮೨. ‘‘ಮಮುಪೇನ್ತಿ ಚ ವಿಸ್ಸತ್ಥಾ, ಕೂಜನ್ತಿ ಚ ಮನೋಹರಂ;

ರಮಮಾನೋ ಸಹ ತೇಹಿ, ವಸಾಮಿ ಅಸ್ಸಮೇ ಅಹಂ.

೮೩. ‘‘ಮಮ ಅಸ್ಸಮಸಾಮನ್ತಾ, ಮಿಗರಾಜಾ ಚತುಕ್ಕಮೋ;

ಆಸಯಾ ಅಭಿನಿಕ್ಖಮ್ಮ, ಗಜ್ಜಿ ಸೋ ಅಸನೀ ವಿಯ.

೮೪. ‘‘ನದಿತೇ ಮಿಗರಾಜೇ ಚ, ಹಾಸೋ ಮೇ ಉದಪಜ್ಜಥ;

ಮಿಗರಾಜಂ ಗವೇಸನ್ತೋ, ಅದ್ದಸಂ ಲೋಕನಾಯಕಂ.

೮೫. ‘‘ದಿಸ್ವಾನಾಹಂ ದೇವದೇವಂ, ತಿಸ್ಸಂ ಲೋಕಗ್ಗನಾಯಕಂ;

ಹಟ್ಠೋ ಹಟ್ಠೇನ ಚಿತ್ತೇನ, ಪೂಜಯಿಂ ನಾಗಕೇಸರಂ.

೮೬. ‘‘ಉಗ್ಗಚ್ಛನ್ತಂವ ಸೂರಿಯಂ, ಸಾಲರಾಜಂವ ಪುಪ್ಫಿತಂ;

ಓಸಧಿಂವ ವಿರೋಚನ್ತಂ, ಸನ್ಥವಿಂ ಲೋಕನಾಯಕಂ.

೮೭. ‘‘‘ತವ ಞಾಣೇನ ಸಬ್ಬಞ್ಞು, ಮೋಚೇಸಿಮಂ ಸದೇವಕಂ;

ತವಂ ಆರಾಧಯಿತ್ವಾನ, ಜಾತಿಯಾ ಪರಿಮುಚ್ಚರೇ.

೮೮. ‘‘‘ಅದಸ್ಸನೇನ ಸಬ್ಬಞ್ಞು, ಬುದ್ಧಾನಂ ಸಬ್ಬದಸ್ಸಿನಂ;

ಪತನ್ತಿವೀಚಿನಿರಯಂ, ರಾಗದೋಸೇಹಿ ಓಫುಟಾ [ಓತ್ಥಟಾ (ಸ್ಯಾ.)].

೮೯. ‘‘‘ತವ ದಸ್ಸನಮಾಗಮ್ಮ, ಸಬ್ಬಞ್ಞು ಲೋಕನಾಯಕ;

ಪಮುಚ್ಚನ್ತಿ ಭವಾ ಸಬ್ಬಾ, ಫುಸನ್ತಿ ಅಮತಂ ಪದಂ.

೯೦. ‘‘‘ಯದಾ ಬುದ್ಧಾ ಚಕ್ಖುಮನ್ತೋ, ಉಪ್ಪಜ್ಜನ್ತಿ ಪಭಙ್ಕರಾ;

ಕಿಲೇಸೇ ಝಾಪಯಿತ್ವಾನ, ಆಲೋಕಂ ದಸ್ಸಯನ್ತಿ ತೇ’.

೯೧. ‘‘ಕಿತ್ತಯಿತ್ವಾನ ಸಮ್ಬುದ್ಧಂ, ತಿಸ್ಸಂ ಲೋಕಗ್ಗನಾಯಕಂ;

ಹಟ್ಠೋ ಹಟ್ಠೇನ ಚಿತ್ತೇನ, ತಿಣಸೂಲಂ ಅಪೂಜಯಿಂ.

೯೨. ‘‘ಮಮ ಸಙ್ಕಪ್ಪಮಞ್ಞಾಯ, ತಿಸ್ಸೋ ಲೋಕಗ್ಗನಾಯಕೋ;

ಸಕಾಸನೇ ನಿಸೀದಿತ್ವಾ, ಇಮಾ ಗಾಥಾ ಅಭಾಸಥ.

೯೩. ‘‘‘ಯೋ ಮಂ ಪುಪ್ಫೇಹಿ ಛಾದೇಸಿ, ಪಸನ್ನೋ ಸೇಹಿ ಪಾಣಿಭಿ;

ತಮಹಂ ಕಿತ್ತಯಿಸ್ಸಾಮಿ, ಸುಣಾಥ ಮಮ ಭಾಸತೋ.

೯೪. ‘‘‘ಪಞ್ಚವೀಸತಿಕ್ಖತ್ತುಂ ಸೋ, ದೇವರಜ್ಜಂ ಕರಿಸ್ಸತಿ;

ಪಞ್ಚಸತ್ತತಿಕ್ಖತ್ತುಞ್ಚ, ಚಕ್ಕವತ್ತೀ ಭವಿಸ್ಸತಿ.

೯೫. ‘‘‘ಪದೇಸರಜ್ಜಂ ವಿಪುಲಂ, ಗಣನಾತೋ ಅಸಙ್ಖಿಯಂ;

ತಸ್ಸ ಕಮ್ಮನಿಸ್ಸನ್ದೇನ [ಕಮ್ಮಸ್ಸ ನಿಸ್ಸನ್ದೋ (ಸೀ. ಸ್ಯಾ. ಪೀ.)], ಪುಪ್ಫಾನಂ ಪೂಜನಾಯ ಚ [ಸೋ (ಸ್ಯಾ. ಪೀ.)].

೯೬. ‘‘‘ಸೀಸಂನ್ಹಾತೋ ಚಯಂ ಪೋಸೋ, ಪುಪ್ಫಮಾಕಙ್ಖತೇ ಯದಿ [ಸಾಯಂ ಪಾತೋ ಚಯಂ ಪೋಸೋ, ಪುಪ್ಫೇಹಿ ಮಂ ಅಛಾದಯಿ (ಸ್ಯಾ.)];

ಪುಞ್ಞಕಮ್ಮೇನ ಸಂಯುತ್ತಂ [ಸಂಯುತ್ತೋ (ಸೀ. ಸ್ಯಾ. ಪೀ.)], ಪುರತೋ ಪಾತುಭವಿಸ್ಸತಿ.

೯೭. ‘‘‘ಯಂ ಯಂ ಇಚ್ಛತಿ ಕಾಮೇಹಿ, ತಂ ತಂ ಪಾತುಭವಿಸ್ಸತಿ;

ಸಙ್ಕಪ್ಪಂ ಪರಿಪೂರೇತ್ವಾ, ನಿಬ್ಬಾಯಿಸ್ಸತಿನಾಸವೋ’.

ಅಟ್ಠಾರಸಮಂ ಭಾಣವಾರಂ.

೯೮. ‘‘ಕಿಲೇಸೇ ಝಾಪಯಿತ್ವಾನ, ಸಮ್ಪಜಾನೋ ಪತಿಸ್ಸತೋ;

ಏಕಾಸನೇ ನಿಸೀದಿತ್ವಾ, ಅರಹತ್ತಮಪಾಪುಣಿಂ.

೯೯. ‘‘ಚಙ್ಕಮನ್ತೋ ನಿಪಜ್ಜನ್ತೋ, ನಿಸಿನ್ನೋ ಉದ ವಾ ಠಿತೋ;

ಬುದ್ಧಸೇಟ್ಠಂ ಸರಿತ್ವಾನ, ವಿಹರಾಮಿ ಅಹಂ ಸದಾ.

೧೦೦. ‘‘ಚೀವರೇ ಪಿಣ್ಡಪಾತೇ ಚ, ಪಚ್ಚಯೇ ಸಯನಾಸನೇ;

ತತ್ಥ ಮೇ ಊನತಾ ನತ್ಥಿ, ಬುದ್ಧಪೂಜಾಯಿದಂ ಫಲಂ.

೧೦೧. ‘‘ಸೋ ದಾನಿ ಪತ್ತೋ ಅಮತಂ, ಸನ್ತಂ ಪದಮನುತ್ತರಂ;

ಸಬ್ಬಾಸವೇ ಪರಿಞ್ಞಾಯ, ವಿಹರಾಮಿ ಅನಾಸವೋ.

೧೦೨. ‘‘ದ್ವೇನವುತೇ ಇತೋ ಕಪ್ಪೇ, ಯಂ ಪುಪ್ಫಮಭಿಪೂಜಯಿಂ;

ದುಗ್ಗತಿಂ ನಾಭಿಜಾನಾಮಿ, ಬುದ್ಧಪೂಜಾಯಿದಂ ಫಲಂ.

೧೦೩. ‘‘ಕಿಲೇಸಾ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವೋ.

೧೦೪. ‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.

೧೦೫. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ತಿಣಸೂಲಕಛಾದನಿಯೋ [ತಿಣಸೂಲಿಕಛಾದನಿಯೋ (ಕ.)] ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.

ತಿಣಸೂಲಕಛಾದನಿಯತ್ಥೇರಸ್ಸಾಪದಾನಂ ತತಿಯಂ.