೪. ಮಧುಮಂಸದಾಯಕತ್ಥೇರಅಪದಾನಂ

೧೦೬. ‘‘ನಗರೇ ಬನ್ಧುಮತಿಯಾ, ಸೂಕರಿಕೋ ಅಹೋಸಹಂ;

ಉಕ್ಕೋಟಂ ರನ್ಧಯಿತ್ವಾನ [ಉಕ್ಕೋಟಕಂ ರನ್ಧಯಿತ್ವಾ (ಸೀ. ಸ್ಯಾ.)], ಮಧುಮಂಸಮ್ಹಿ [ಮಧುಸಪ್ಪಿಮ್ಹಿ (ಪೀ.), ಮಧುಂ ಮಂಸಮ್ಹಿ (ಕ.)] ಓಕಿರಿಂ.

೧೦೭. ‘‘ಸನ್ನಿಪಾತಂ ಅಹಂ ಗನ್ತ್ವಾ, ಏಕಂ ಪತ್ತಂ ಗಹೇಸಹಂ;

ಪೂರಯಿತ್ವಾನ ತಂ ಪತ್ತಂ, ಭಿಕ್ಖುಸಙ್ಘಸ್ಸದಾಸಹಂ.

೧೦೮. ‘‘ಯೋತ್ಥ ಥೇರತರೋ ಭಿಕ್ಖು, ನಿಯ್ಯಾದೇಸಿ ಮಮಂ ತದಾ;

ಇಮಿನಾ ಪತ್ತಪೂರೇನ, ಲಭಸ್ಸು ವಿಪುಲಂ ಸುಖಂ.

೧೦೯. ‘‘ದುವೇ ಸಮ್ಪತ್ತಿಯೋ ಭುತ್ವಾ, ಸುಕ್ಕಮೂಲೇನ ಚೋದಿತೋ;

ಪಚ್ಛಿಮೇ ವತ್ತಮಾನಮ್ಹಿ, ಕಿಲೇಸೇ ಝಾಪಯಿಸ್ಸತಿ.

೧೧೦. ‘‘ತತ್ಥ ಚಿತ್ತಂ ಪಸಾದೇತ್ವಾ, ತಾವತಿಂಸಮಗಚ್ಛಹಂ;

ತತ್ಥ ಭುತ್ವಾ ಪಿವಿತ್ವಾ ಚ, ಲಭಾಮಿ ವಿಪುಲಂ ಸುಖಂ.

೧೧೧. ‘‘ಮಣ್ಡಪೇ ರುಕ್ಖಮೂಲೇ ವಾ, ಪುಬ್ಬಕಮ್ಮಂ ಅನುಸ್ಸರಿಂ;

ಅನ್ನಪಾನಾಭಿವಸ್ಸೋ ಮೇ, ಅಭಿವಸ್ಸತಿ ತಾವದೇ.

೧೧೨. ‘‘ಇದಂ ಪಚ್ಛಿಮಕಂ ಮಯ್ಹಂ, ಚರಿಮೋ ವತ್ತತೇ ಭವೋ;

ಇಧಾಪಿ ಅನ್ನಪಾನಂ ಮೇ, ವಸ್ಸತೇ ಸಬ್ಬಕಾಲಿಕಂ.

೧೧೩. ‘‘ತೇನೇವ ಮಧುದಾನೇನ [ಮಂಸದಾನೇನ (ಸೀ. ಪೀ.)], ಸನ್ಧಾವಿತ್ವಾ ಭವೇ ಅಹಂ;

ಸಬ್ಬಾಸವೇ ಪರಿಞ್ಞಾಯ, ವಿಹರಾಮಿ ಅನಾಸವೋ.

೧೧೪. ‘‘ಏಕನವುತಿತೋ ಕಪ್ಪೇ, ಯಂ ದಾನಮದದಿಂ ತದಾ;

ದುಗ್ಗತಿಂ ನಾಭಿಜಾನಾಮಿ, ಮಧುದಾನಸ್ಸಿದಂ ಫಲಂ.

೧೧೫. ‘‘ಕಿಲೇಸಾ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವೋ.

೧೧೬. ‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.

೧೧೭. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ಮಧುಮಂಸದಾಯಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.

ಮಧುಮಂಸದಾಯಕತ್ಥೇರಸ್ಸಾಪದಾನಂ ಚತುತ್ಥಂ.