೨. ಏಕಛತ್ತಿಯತ್ಥೇರಅಪದಾನಂ

೩೨. ‘‘ಚನ್ದಭಾಗಾನದೀತೀರೇ, ಅಸ್ಸಮೋ ಸುಕತೋ ಮಮ;

ಸುಸುದ್ಧಪುಲಿನಾಕಿಣ್ಣೋ, ಪನ್ನಸಾಲಾ ಸುಮಾಪಿತಾ.

೩೩. ‘‘ಉತ್ತಾನಕೂಲಾ ನದಿಕಾ, ಸುಪತಿತ್ಥಾ ಮನೋರಮಾ;

ಮಚ್ಛಕಚ್ಛಪಸಮ್ಪನ್ನಾ [… ಸಞ್ಛನ್ನಾ (ಕ.)], ಸುಸುಮಾರನಿಸೇವಿತಾ.

೩೪. ‘‘ಅಚ್ಛಾ ದೀಪೀ ಚ ಮಯೂರಾ, ಕರವೀಕಾ ಚ ಸಾಳಿಕಾ;

ಕೂಜನ್ತಿ ಸಬ್ಬದಾ ಏತೇ, ಸೋಭಯನ್ತಾ ಮಮಸ್ಸಮಂ.

೩೫. ‘‘ಕೋಕಿಲಾ ಮಞ್ಜುಭಾಣೀ ಚ, ಹಂಸಾ ಚ ಮಧುರಸ್ಸರಾ;

ಅಭಿಕೂಜನ್ತಿ ತೇ ತತ್ಥ, ಸೋಭಯನ್ತಾ ಮಮಸ್ಸಮಂ.

೩೬. ‘‘ಸೀಹಾ ಬ್ಯಗ್ಘಾ ವರಾಹಾ ಚ, ಅಚ್ಛ [ವಕ (ಸೀ. ಪೀ.), ಬಕಾ (ಸ್ಯಾ.), ವಕಾ (ಕ.)] ಕೋಕತರಚ್ಛಕಾ;

ಗಿರಿದುಗ್ಗಮ್ಹಿ ನಾದೇನ್ತಿ, ಸೋಭಯನ್ತಾ ಮಮಸ್ಸಮಂ.

೩೭. ‘‘ಏಣೀಮಿಗಾ ಚ ಸರಭಾ, ಭೇರಣ್ಡಾ ಸೂಕರಾ ಬಹೂ;

ಗಿರಿದುಗ್ಗಮ್ಹಿ ನಾದೇನ್ತಿ, ಸೋಭಯನ್ತಾ ಮಮಸ್ಸಮಂ.

೩೮. ‘‘ಉದ್ದಾಲಕಾ ಚಮ್ಪಕಾ ಚ, ಪಾಟಲೀ ಸಿನ್ದುವಾರಕಾ;

ಅತಿಮುತ್ತಾ ಅಸೋಕಾ ಚ, ಸೋಭಯನ್ತಿ ಮಮಸ್ಸಮಂ [ಪುಪ್ಫನ್ತಿ ಮಮ ಅಸ್ಸಮೇ (ಸೀ. ಪೀ.)].

೩೯. ‘‘ಅಙ್ಕೋಲಾ ಯೂಥಿಕಾ ಚೇವ, ಸತ್ತಲೀ ಬಿಮ್ಬಿಜಾಲಿಕಾ;

ಕಣಿಕಾರಾ ಚ ಪುಪ್ಫನ್ತಿ, ಸೋಭಯನ್ತಾ ಮಮಸ್ಸಮಂ [ಕಣಿಕಾಕಣಿಕಾರಾ ಚ, ಪುಪ್ಫನ್ತಿ ಮಮ ಅಸ್ಸಮೇ (ಸೀ. ಸ್ಯಾ. ಪೀ.)].

೪೦. ‘‘ನಾಗಾ ಸಾಲಾ ಚ ಸಳಲಾ, ಪುಣ್ಡರೀಕೇತ್ಥ ಪುಪ್ಫಿತಾ;

ದಿಬ್ಬಗನ್ಧಂ ಸಮ್ಪವನ್ತಾ, ಸೋಭಯನ್ತಿ ಮಮಸ್ಸಮಂ.

೪೧. ‘‘ಅಜ್ಜುನಾ ಅಸನಾ ಚೇತ್ಥ, ಮಹಾನಾಮಾ ಚ ಪುಪ್ಫಿತಾ;

ಸಾಲಾ ಚ ಕಙ್ಗುಪುಪ್ಫಾ ಚ, ಸೋಭಯನ್ತಿ ಮಮಸ್ಸಮಂ.

೪೨. ‘‘ಅಮ್ಬಾ ಜಮ್ಬೂ ಚ ತಿಲಕಾ, ನಿಮ್ಬಾ ಚ ಸಾಲಕಲ್ಯಾಣೀ;

ದಿಬ್ಬಗನ್ಧಂ ಸಮ್ಪವನ್ತಾ, ಸೋಭಯನ್ತಿ ಮಮಸ್ಸಮಂ.

೪೩. ‘‘ಅಸೋಕಾ ಚ ಕಪಿಟ್ಠಾ ಚ, ಗಿರಿಮಾಲೇತ್ಥ [ಭಗಿನಿಮಾಲೇತ್ಥ (ಸೀ. ಪೀ.), ಭಗಿನಿಮಾಲಾ ಚ (ಸ್ಯಾ.)] ಪುಪ್ಫಿತಾ;

ದಿಬ್ಬಗನ್ಧಂ ಸಮ್ಪವನ್ತಾ, ಸೋಭಯನ್ತಿ ಮಮಸ್ಸಮಂ.

೪೪. ‘‘ಕದಮ್ಬಾ ಕದಲೀ ಚೇವ, ಇಸಿಮುಗ್ಗಾ ಚ ರೋಪಿತಾ;

ಧುವಂ ಫಲಾನಿ ಧಾರೇನ್ತಿ, ಸೋಭಯನ್ತಾ ಮಮಸ್ಸಮಂ.

೪೫. ‘‘ಹರೀತಕಾ ಆಮಲಕಾ, ಅಮ್ಬಜಮ್ಬುವಿಭೀತಕಾ;

ಕೋಲಾ ಭಲ್ಲಾತಕಾ ಬಿಲ್ಲಾ, ಫಲಿನೋ ಮಮ ಅಸ್ಸಮೇ.

೪೬. ‘‘ಅವಿದೂರೇ ಪೋಕ್ಖರಣೀ, ಸುಪತಿತ್ಥಾ ಮನೋರಮಾ;

ಮನ್ದಾಲಕೇಹಿ ಸಞ್ಛನ್ನಾ, ಪದುಮುಪ್ಪಲಕೇಹಿ ಚ.

೪೭. ‘‘ಗಬ್ಭಂ ಗಣ್ಹನ್ತಿ ಪದುಮಾ, ಅಞ್ಞೇ ಪುಪ್ಫನ್ತಿ ಕೇಸರೀ;

ಓಪತ್ತಕಣ್ಣಿಕಾ ಚೇವ, ಪುಪ್ಫನ್ತಿ ಮಮ ಅಸ್ಸಮೇ.

೪೮. ‘‘ಪಾಠೀನಾ ಪಾವುಸಾ ಮಚ್ಛಾ, ಬಲಜಾ ಮುಞ್ಜರೋಹಿತಾ;

ಅಚ್ಛೋದಕಮ್ಹಿ ವಿಚರಂ, ಸೋಭಯನ್ತಿ ಮಮಸ್ಸಮಂ.

೪೯. ‘‘ನಯಿತಾ ಅಮ್ಬಗನ್ಧೀ ಚ, ಅನುಕೂಲೇ ಚ ಕೇತಕಾ;

ದಿಬ್ಬಗನ್ಧಂ ಸಮ್ಪವನ್ತಾ, ಸೋಭಯನ್ತಿ ಮಮಸ್ಸಮಂ.

೫೦. ‘‘ಮಧು ಭಿಸಮ್ಹಾ ಸವತಿ, ಖೀರಸಪ್ಪಿ ಮುಳಾಲಿಭಿ;

ದಿಬ್ಬಗನ್ಧಂ ಸಮ್ಪವನ್ತಾ, ಸೋಭಯನ್ತಿ ಮಮಸ್ಸಮಂ.

೫೧. ‘‘ಪುಲಿನಾ ಸೋಭನಾ ತತ್ಥ, ಆಕಿಣ್ಣಾ ಜಲಸೇವಿತಾ;

ಓಪುಪ್ಫಾ ಪುಪ್ಫಿತಾ ಸೇನ್ತಿ, ಸೋಭಯನ್ತಾ ಮಮಸ್ಸಮಂ.

೫೨. ‘‘ಜಟಾಭಾರೇನ ಭರಿತಾ, ಅಜಿನುತ್ತರವಾಸನಾ;

ವಾಕಚೀರಧರಾ ಸಬ್ಬೇ, ಸೋಭಯನ್ತಿ ಮಮಸ್ಸಮಂ.

೫೩. ‘‘ಯುಗಮತ್ತಮಪೇಕ್ಖನ್ತಾ, ನಿಪಕಾ ಸನ್ತವುತ್ತಿನೋ;

ಕಾಮಭೋಗೇ ಅನಪೇಕ್ಖಾ, ವಸನ್ತಿ ಮಮ ಅಸ್ಸಮೇ.

೫೪. ‘‘ಪರೂಳ್ಹಕಚ್ಛನಖಲೋಮಾ, ಪಙ್ಕದನ್ತಾ ರಜಸ್ಸಿರಾ;

ರಜೋಜಲ್ಲಧರಾ ಸಬ್ಬೇ, ವಸನ್ತಿ ಮಮ ಅಸ್ಸಮೇ.

೫೫. ‘‘ಅಭಿಞ್ಞಾಪಾರಮಿಪ್ಪತ್ತಾ, ಅನ್ತಲಿಕ್ಖಚರಾ ಚ ತೇ;

ಉಗ್ಗಚ್ಛನ್ತಾ ನಭಂ ಏತೇ, ಸೋಭಯನ್ತಿ ಮಮಸ್ಸಮಂ.

೫೬. ‘‘ತೇಹಿ ಸಿಸ್ಸೇಹಿ ಪರಿವುತೋ, ವಸಾಮಿ ವಿಪಿನೇ ತದಾ;

ರತ್ತಿನ್ದಿವಂ ನ ಜಾನಾಮಿ, ಸದಾ ಝಾನಸಮಪ್ಪಿತೋ.

೫೭. ‘‘ಭಗವಾ ತಮ್ಹಿ ಸಮಯೇ, ಅತ್ಥದಸ್ಸೀ ಮಹಾಮುನಿ;

ತಮನ್ಧಕಾರಂ ನಾಸೇನ್ತೋ, ಉಪ್ಪಜ್ಜಿ ಲೋಕನಾಯಕೋ.

೫೮. ‘‘ಅಥ ಅಞ್ಞತರೋ ಸಿಸ್ಸೋ, ಆಗಚ್ಛಿ ಮಮ ಸನ್ತಿಕಂ;

ಮನ್ತೇ ಅಜ್ಝೇತುಕಾಮೋ ಸೋ, ಛಳಙ್ಗಂ ನಾಮ ಲಕ್ಖಣಂ.

೫೯. ‘‘ಬುದ್ಧೋ ಲೋಕೇ ಸಮುಪ್ಪನ್ನೋ, ಅತ್ಥದಸ್ಸೀ ಮಹಾಮುನಿ;

ಚತುಸಚ್ಚಂ ಪಕಾಸೇನ್ತೋ, ದೇಸೇತಿ ಅಮತಂ ಪದಂ.

೬೦. ‘‘ತುಟ್ಠಹಟ್ಠೋ ಪಮುದಿತೋ, ಧಮ್ಮನ್ತರಗತಾಸಯೋ;

ಅಸ್ಸಮಾ ಅಭಿನಿಕ್ಖಮ್ಮ, ಇದಂ ವಚನಮಬ್ರವಿಂ.

೬೧. ‘‘‘ಬುದ್ಧೋ ಲೋಕೇ ಸಮುಪ್ಪನ್ನೋ, ದ್ವತ್ತಿಂಸವರಲಕ್ಖಣೋ;

ಏಥ ಸಬ್ಬೇ ಗಮಿಸ್ಸಾಮ, ಸಮ್ಮಾಸಮ್ಬುದ್ಧಸನ್ತಿಕಂ’.

೬೨. ‘‘ಓವಾದಪಟಿಕರಾ ತೇ, ಸಧಮ್ಮೇ ಪಾರಮಿಂ ಗತಾ;

ಸಾಧೂತಿ ಸಮ್ಪಟಿಚ್ಛಿಂಸು, ಉತ್ತಮತ್ಥಗವೇಸಕಾ.

೬೩. ‘‘ಜಟಾಭಾರಭರಿತಾ ತೇ [ಜಟಾಭಾರೇನ ಭರಿತಾ (ಕ.)], ಅಜಿನುತ್ತರವಾಸನಾ;

ಉತ್ತಮತ್ಥಂ ಗವೇಸನ್ತಾ, ನಿಕ್ಖಮಿಂಸು ವನಾ ತದಾ.

೬೪. ‘‘ಭಗವಾ ತಮ್ಹಿ ಸಮಯೇ, ಅತ್ಥದಸ್ಸೀ ಮಹಾಯಸೋ;

ಚತುಸಚ್ಚಂ ಪಕಾಸೇನ್ತೋ, ದೇಸೇತಿ ಅಮತಂ ಪದಂ.

೬೫. ‘‘ಸೇತಚ್ಛತ್ತಂ ಗಹೇತ್ವಾನ, ಬುದ್ಧಸೇಟ್ಠಸ್ಸ ಧಾರಯಿಂ;

ಏಕಾಹಂ ಧಾರಯಿತ್ವಾನ, ಬುದ್ಧಸೇಟ್ಠಂ ಅವನ್ದಹಂ.

೬೬. ‘‘ಅತ್ಥದಸ್ಸೀ ತು ಭಗವಾ, ಲೋಕಜೇಟ್ಠೋ ನರಾಸಭೋ;

ಭಿಕ್ಖುಸಙ್ಘೇ ನಿಸೀದಿತ್ವಾ, ಇಮಾ ಗಾಥಾ ಅಭಾಸಥ.

೬೭. ‘‘‘ಯೋ ಮೇ ಛತ್ತಂ ಅಧಾರೇಸಿ, ಪಸನ್ನೋ ಸೇಹಿ ಪಾಣಿಭಿ;

ತಮಹಂ ಕಿತ್ತಯಿಸ್ಸಾಮಿ, ಸುಣಾಥ ಮಮ ಭಾಸತೋ.

೬೮. ‘‘‘ಇಮಸ್ಸ ಜಾಯಮಾನಸ್ಸ, ದೇವತ್ತೇ ಅಥ ಮಾನುಸೇ;

ಧಾರೇಸ್ಸತಿ ಸದಾ ಛತ್ತಂ, ಛತ್ತದಾನಸ್ಸಿದಂ ಫಲಂ.

೬೯. ‘‘‘ಸತ್ತಸತ್ತತಿಕಪ್ಪಾನಿ, ದೇವಲೋಕೇ ರಮಿಸ್ಸತಿ;

ಸಹಸ್ಸಕ್ಖತ್ತುಂ ರಾಜಾ ಚ, ಚಕ್ಕವತ್ತೀ ಭವಿಸ್ಸತಿ.

೭೦. ‘‘‘ಸತ್ತಸತ್ತತಿಕ್ಖತ್ತುಞ್ಚ, ದೇವರಜ್ಜಂ ಕರಿಸ್ಸತಿ;

ಪದೇಸರಜ್ಜಂ ವಿಪುಲಂ, ಗಣನಾತೋ ಅಸಙ್ಖಿಯಂ.

೭೧. ‘‘‘ಅಟ್ಠಾರಸೇ ಕಪ್ಪಸತೇ, ಗೋತಮೋ ಸಕ್ಯಪುಙ್ಗವೋ;

ತಮನ್ಧಕಾರಂ ನಾಸೇನ್ತೋ, ಉಪ್ಪಜ್ಜಿಸ್ಸತಿ ಚಕ್ಖುಮಾ.

೭೨. ‘‘‘ತಸ್ಸ ಧಮ್ಮೇಸು ದಾಯಾದೋ, ಓರಸೋ ಧಮ್ಮನಿಮ್ಮಿತೋ;

ಸಬ್ಬಾಸವೇ ಪರಿಞ್ಞಾಯ, ವಿಹರಿಸ್ಸತಿನಾಸವೋ’.

೭೩. ‘‘ಯತೋ ಅಹಂ ಕಮ್ಮಮಕಂ, ಛತ್ತಂ ಬುದ್ಧಸ್ಸ ಧಾರಯಂ;

ಏತ್ಥನ್ತರೇ ನ ಜಾನಾಮಿ, ಸೇತಚ್ಛತ್ತಂ ಅಧಾರಿತಂ.

೭೪. ‘‘ಇದಂ ಪಚ್ಛಿಮಕಂ ಮಯ್ಹಂ, ಚರಿಮೋ ವತ್ತತೇ ಭವೋ;

ಛತ್ತಧಾರಣಮಜ್ಜಾಪಿ, ವತ್ತತೇ ನಿಚ್ಚಕಾಲಿಕಂ.

೭೫. ‘‘ಅಹೋ ಮೇ ಸುಕತಂ ಕಮ್ಮಂ, ಅತ್ಥದಸ್ಸಿಸ್ಸ ತಾದಿನೋ;

ಸಬ್ಬಾಸವಾ ಪರಿಕ್ಖೀಣಾ, ನತ್ಥಿ ದಾನಿ ಪುನಬ್ಭವೋ.

೭೬. ‘‘ಕಿಲೇಸಾ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವೋ.

೭೭. ‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.

೭೮. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ಏಕಛತ್ತಿಯೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ;

ಏಕಛತ್ತಿಯತ್ಥೇರಸ್ಸಾಪದಾನಂ ದುತಿಯಂ.