೧೦. ಮಞ್ಚದಾಯಕತ್ಥೇರಅಪದಾನಂ

೧೮೪. ‘‘ಪರಿನಿಬ್ಬುತೇ ಕಾರುಣಿಕೇ, ಸಿದ್ಧತ್ಥೇ ಲೋಕನಾಯಕೇ;

ವಿತ್ಥಾರಿಕೇ ಪಾವಚನೇ, ದೇವಮಾನುಸಸಕ್ಕತೇ.

೧೮೫. ‘‘ಚಣ್ಡಾಲೋ ಆಸಹಂ ತತ್ಥ, ಆಸನ್ದಿಪೀಠಕಾರಕೋ;

ತೇನ ಕಮ್ಮೇನ ಜೀವಾಮಿ, ತೇನ ಪೋಸೇಮಿ ದಾರಕೇ.

೧೮೬. ‘‘ಆಸನ್ದಿಂ ಸುಕತಂ ಕತ್ವಾ, ಪಸನ್ನೋ ಸೇಹಿ ಪಾಣಿಭಿ;

ಸಯಮೇವುಪಗನ್ತ್ವಾನ, ಭಿಕ್ಖುಸಙ್ಘಸ್ಸದಾಸಹಂ.

೧೮೭. ‘‘ತೇನ ಕಮ್ಮೇನ ಸುಕತೇನ, ಚೇತನಾಪಣಿಧೀಹಿ ಚ;

ಜಹಿತ್ವಾ ಮಾನುಸಂ ದೇಹಂ, ತಾವತಿಂಸಮಗಚ್ಛಹಂ.

೧೮೮. ‘‘ದೇವಲೋಕಗತೋ ಸನ್ತೋ, ಮೋದಾಮಿ ತಿದಸೇ ಗಣೇ;

ಸಯನಾನಿ ಮಹಗ್ಘಾನಿ, ನಿಬ್ಬತ್ತನ್ತಿ ಯದಿಚ್ಛಕಂ.

೧೮೯. ‘‘ಪಞ್ಞಾಸಕ್ಖತ್ತುಂ ದೇವಿನ್ದೋ, ದೇವರಜ್ಜಮಕಾರಯಿಂ;

ಅಸೀತಿಕ್ಖತ್ತುಂ ರಾಜಾ ಚ, ಚಕ್ಕವತ್ತೀ ಅಹೋಸಹಂ.

೧೯೦. ‘‘ಪದೇಸರಜ್ಜಂ ವಿಪುಲಂ, ಗಣನಾತೋ ಅಸಙ್ಖಿಯಂ;

ಸುಖಿತೋ ಯಸವಾ ಹೋಮಿ, ಮಞ್ಚದಾನಸ್ಸಿದಂ ಫಲಂ.

೧೯೧. ‘‘ದೇವಲೋಕಾ ಚವಿತ್ವಾನ, ಏಮಿ ಚೇ ಮಾನುಸಂ ಭವಂ;

ಮಹಾರಹಾ ಸುಸಯನಾ, ಸಯಮೇವ ಭವನ್ತಿ ಮೇ.

೧೯೨. ‘‘ಅಯಂ ಪಚ್ಛಿಮಕೋ ಮಯ್ಹಂ, ಚರಿಮೋ ವತ್ತತೇ ಭವೋ;

ಅಜ್ಜಾಪಿ ಸಯನೇ ಕಾಲೇ [ಸಯನಕಾಲೇ (ಸ್ಯಾ.)], ಸಯನಂ ಉಪತಿಟ್ಠತಿ.

೧೯೩. ‘‘ಚತುನ್ನವುತಿತೋ ಕಪ್ಪೇ, ಯಂ ದಾನಮದದಿಂ ತದಾ;

ದುಗ್ಗತಿಂ ನಾಭಿಜಾನಾಮಿ, ಮಞ್ಚದಾನಸ್ಸಿದಂ ಫಲಂ.

೧೯೪. ‘‘ಕಿಲೇಸಾ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವೋ.

೧೯೫. ‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.

೧೯೬. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ಮಞ್ಚದಾಯಕೋ ಥೇರೋ ಇಮಾ ಗಾಥಾಯೋ

ಅಭಾಸಿತ್ಥಾತಿ.

ಮಞ್ಚದಾಯಕತ್ಥೇರಸ್ಸಾಪದಾನಂ ದಸಮಂ.

ಭದ್ದಾಲಿವಗ್ಗೋ ಬಾಚತ್ತಾಲೀಸಮೋ.