೧. ಭದ್ದಾಲಿತ್ಥೇರಅಪದಾನಂ

೧. ‘‘ಸುಮೇಧೋ ನಾಮ ಸಮ್ಬುದ್ಧೋ, ಅಗ್ಗೋ ಕಾರುಣಿಕೋ ಮುನಿ;

ವಿವೇಕಕಾಮೋ ಲೋಕಗ್ಗೋ, ಹಿಮವನ್ತಮುಪಾಗಮಿ.

೨. ‘‘ಅಜ್ಝೋಗಾಹೇತ್ವಾ ಹಿಮವಂ, ಸುಮೇಧೋ ಲೋಕನಾಯಕೋ;

ಪಲ್ಲಙ್ಕಂ ಆಭುಜಿತ್ವಾನ, ನಿಸೀದಿ ಪುರಿಸುತ್ತಮೋ.

೩. ‘‘ಸಮಾಧಿಂ ಸೋ ಸಮಾಪನ್ನೋ, ಸುಮೇಧೋ ಲೋಕನಾಯಕೋ;

ಸತ್ತರತ್ತಿನ್ದಿವಂ ಬುದ್ಧೋ, ನಿಸೀದಿ ಪುರಿಸುತ್ತಮೋ.

೪. ‘‘ಖಾರಿಭಾರಂ [ಖಾರಿಕಾಜಂ (ಸೀ.)] ಗಹೇತ್ವಾನ, ವನಮಜ್ಝೋಗಹಿಂ ಅಹಂ;

ತತ್ಥದ್ದಸಾಸಿಂ ಸಮ್ಬುದ್ಧಂ, ಓಘತಿಣ್ಣಮನಾಸವಂ.

೫. ‘‘ಸಮ್ಮಜ್ಜನಿಂ ಗಹೇತ್ವಾನ, ಸಮ್ಮಜ್ಜಿತ್ವಾನ ಅಸ್ಸಮಂ;

ಚತುದಣ್ಡೇ ಠಪೇತ್ವಾನ, ಅಕಾಸಿಂ ಮಣ್ಡಪಂ ತದಾ.

೬. ‘‘ಸಾಲಪುಪ್ಫಂ ಆಹರಿತ್ವಾ, ಮಣ್ಡಪಂ ಛಾದಯಿಂ ಅಹಂ;

ಪಸನ್ನಚಿತ್ತೋ ಸುಮನೋ, ಅಭಿವನ್ದಿಂ ತಥಾಗತಂ.

೭. ‘‘ಯಂ ವದನ್ತಿ ಸುಮೇಧೋತಿ, ಭೂರಿಪಞ್ಞಂ ಸುಮೇಧಸಂ;

ಭಿಕ್ಖುಸಙ್ಘೇ ನಿಸೀದಿತ್ವಾ, ಇಮಾ ಗಾಥಾ ಅಭಾಸಥ.

೮. ‘‘‘ಬುದ್ಧಸ್ಸ ಗಿರಮಞ್ಞಾಯ, ಸಬ್ಬೇ ದೇವಾ ಸಮಾಗಮುಂ;

ಅಸಂಸಯಂ ಬುದ್ಧಸೇಟ್ಠೋ, ಧಮ್ಮಂ ದೇಸೇತಿ ಚಕ್ಖುಮಾ.

೯. ‘‘‘ಸುಮೇಧೋ ನಾಮ ಸಮ್ಬುದ್ಧೋ, ಆಹುತೀನಂ ಪಟಿಗ್ಗಹೋ;

ದೇವಸಙ್ಘೇ ನಿಸೀದಿತ್ವಾ, ಇಮಾ ಗಾಥಾ ಅಭಾಸಥ.

೧೦. ‘‘‘ಯೋ ಮೇ ಸತ್ತಾಹಂ ಮಣ್ಡಪಂ, ಧಾರಯೀ ಸಾಲಛಾದಿತಂ;

ತಮಹಂ ಕಿತ್ತಯಿಸ್ಸಾಮಿ, ಸುಣಾಥ ಮಮ ಭಾಸತೋ.

೧೧. ‘‘‘ದೇವಭೂತೋ ಮನುಸ್ಸೋ ವಾ, ಹೇಮವಣ್ಣೋ ಭವಿಸ್ಸತಿ;

ಪಹೂತಭೋಗೋ ಹುತ್ವಾನ, ಕಾಮಭೋಗೀ ಭವಿಸ್ಸತಿ.

೧೨. ‘‘‘ಸಟ್ಠಿ ನಾಗಸಹಸ್ಸಾನಿ, ಸಬ್ಬಾಲಙ್ಕಾರಭೂಸಿತಾ;

ಸುವಣ್ಣಕಚ್ಛಾ ಮಾತಙ್ಗಾ, ಹೇಮಕಪ್ಪನವಾಸಸಾ.

೧೩. ‘‘‘ಆರೂಳ್ಹಾ ಗಾಮಣೀಯೇಹಿ, ತೋಮರಙ್ಕುಸಪಾಣಿಭಿ;

ಸಾಯಂ ಪಾತೋ [ಸಾಯಪಾತೋ (ಪೀ.)] ಉಪಟ್ಠಾನಂ, ಆಗಮಿಸ್ಸನ್ತಿಮಂ ನರಂ;

ತೇಹಿ ನಾಗೇಹಿ ಪರಿವುತೋ, ರಮಿಸ್ಸತಿ ಅಯಂ ನರೋ.

೧೪. ‘‘‘ಸಟ್ಠಿ ಅಸ್ಸಸಹಸ್ಸಾನಿ, ಸಬ್ಬಾಲಙ್ಕಾರಭೂಸಿತಾ;

ಆಜಾನೀಯಾವ ಜಾತಿಯಾ, ಸಿನ್ಧವಾ ಸೀಘವಾಹಿನೋ.

೧೫. ‘‘‘ಆರೂಳ್ಹಾ ಗಾಮಣೀಯೇಹಿ, ಇಲ್ಲಿಯಾಚಾಪಧಾರಿಭಿ;

ಪರಿವಾರೇಸ್ಸನ್ತಿಮಂ ನಿಚ್ಚಂ, ಬುದ್ಧಪೂಜಾಯಿದಂ ಫಲಂ.

೧೬. ‘‘‘ಸಟ್ಠಿ ರಥಸಹಸ್ಸಾನಿ, ಸಬ್ಬಾಲಙ್ಕಾರಭೂಸಿತಾ;

ದೀಪಾ ಅಥೋಪಿ ವೇಯಗ್ಘಾ, ಸನ್ನದ್ಧಾ ಉಸ್ಸಿತದ್ಧಜಾ.

೧೭. ‘‘‘ಆರೂಳ್ಹಾ ಗಾಮಣೀಯೇಹಿ, ಚಾಪಹತ್ಥೇಹಿ ವಮ್ಮಿಭಿ;

ಪರಿವಾರೇಸ್ಸನ್ತಿಮಂ ನಿಚ್ಚಂ, ಬುದ್ಧಪೂಜಾಯಿದಂ ಫಲಂ.

೧೮. ‘‘‘ಸಟ್ಠಿ ಗಾಮಸಹಸ್ಸಾನಿ, ಪರಿಪುಣ್ಣಾನಿ ಸಬ್ಬಸೋ;

ಪಹೂತಧನಧಞ್ಞಾನಿ, ಸುಸಮಿದ್ಧಾನಿ ಸಬ್ಬಸೋ;

ಸದಾ ಪಾತುಭವಿಸ್ಸನ್ತಿ, ಬುದ್ಧಪೂಜಾಯಿದಂ ಫಲಂ.

೧೯. ‘‘‘ಹತ್ಥೀ ಅಸ್ಸಾ ರಥಾ ಪತ್ತೀ, ಸೇನಾ ಚ ಚತುರಙ್ಗಿನೀ;

ಪರಿವಾರೇಸ್ಸನ್ತಿಮಂ ನಿಚ್ಚಂ, ಬುದ್ಧಪೂಜಾಯಿದಂ ಫಲಂ.

೨೦. ‘‘‘ಅಟ್ಠಾರಸೇ ಕಪ್ಪಸತೇ, ದೇವಲೋಕೇ ರಮಿಸ್ಸತಿ;

ಸಹಸ್ಸಕ್ಖತ್ತುಂ ರಾಜಾ ಚ, ಚಕ್ಕವತ್ತೀ ಭವಿಸ್ಸತಿ.

೨೧. ‘‘‘ಸತಾನಂ ತೀಣಿಕ್ಖತ್ತುಞ್ಚ, ದೇವರಜ್ಜಂ ಕರಿಸ್ಸತಿ;

ಪದೇಸರಜ್ಜಂ ವಿಪುಲಂ, ಗಣನಾತೋ ಅಸಙ್ಖಿಯಂ.

೨೨. ‘‘‘ತಿಂಸಕಪ್ಪಸಹಸ್ಸಮ್ಹಿ, ಓಕ್ಕಾಕಕುಲಸಮ್ಭವೋ;

ಗೋತಮೋ ನಾಮ ಗೋತ್ತೇನ, ಸತ್ಥಾ ಲೋಕೇ ಭವಿಸ್ಸತಿ.

೨೩. ‘‘‘ತಸ್ಸ ಧಮ್ಮೇಸು ದಾಯಾದೋ, ಓರಸೋ ಧಮ್ಮನಿಮ್ಮಿತೋ;

ಸಬ್ಬಾಸವೇ ಪರಿಞ್ಞಾಯ, ವಿಹರಿಸ್ಸತಿನಾಸವೋ’.

೨೪. ‘‘ತಿಂಸಕಪ್ಪಸಹಸ್ಸಮ್ಹಿ, ಅದ್ದಸಂ ಲೋಕನಾಯಕಂ;

ಏತ್ಥನ್ತರಮುಪಾದಾಯ, ಗವೇಸಿಂ ಅಮತಂ ಪದಂ.

೨೫. ‘‘ಲಾಭಾ ಮಯ್ಹಂ ಸುಲದ್ಧಂ ಮೇ, ಯಮಹಞ್ಞಾಸಿ ಸಾಸನಂ;

ತಿಸ್ಸೋ ವಿಜ್ಜಾ ಅನುಪ್ಪತ್ತಾ, ಕತಂ ಬುದ್ಧಸ್ಸ ಸಾಸನಂ.

೨೬. ‘‘ನಮೋ ತೇ ಪುರಿಸಾಜಞ್ಞ, ನಮೋ ತೇ ಪುರಿಸುತ್ತಮ;

ತವ ಞಾಣಂ ಪಕಿತ್ತೇತ್ವಾ, ಪತ್ತೋಮ್ಹಿ ಅಚಲಂ ಪದಂ.

೨೭. ‘‘ಯಂ ಯಂ ಯೋನುಪಪಜ್ಜಾಮಿ, ದೇವತ್ತಂ ಅಥ ಮಾನುಸಂ;

ಸಬ್ಬತ್ಥ ಸುಖಿತೋ ಹೋಮಿ, ಫಲಂ ಮೇ ಞಾಣಕಿತ್ತನೇ.

೨೮. ‘‘ಇದಂ ಪಚ್ಛಿಮಕಂ ಮಯ್ಹಂ, ಚರಿಮೋ ವತ್ತತೇ ಭವೋ;

ನಾಗೋವ ಬನ್ಧನಂ ಛೇತ್ವಾ, ವಿಹರಾಮಿ ಅನಾಸವೋ.

೨೯. ‘‘ಕಿಲೇಸಾ ಝಾಪಿತಾ ಮಯ್ಹಂ, ಭವಾ ಸಬ್ಬೇ ಸಮೂಹತಾ;

ನಾಗೋವ ಬನ್ಧನಂ ಛೇತ್ವಾ, ವಿಹರಾಮಿ ಅನಾಸವೋ.

೩೦. ‘‘ಸ್ವಾಗತಂ ವತ ಮೇ ಆಸಿ, ಮಮ ಬುದ್ಧಸ್ಸ ಸನ್ತಿಕೇ;

ತಿಸ್ಸೋ ವಿಜ್ಜಾ ಅನುಪ್ಪತ್ತಾ, ಕತಂ ಬುದ್ಧಸ್ಸ ಸಾಸನಂ.

೩೧. ‘‘ಪಟಿಸಮ್ಭಿದಾ ಚತಸ್ಸೋ, ವಿಮೋಕ್ಖಾಪಿ ಚ ಅಟ್ಠಿಮೇ;

ಛಳಭಿಞ್ಞಾ ಸಚ್ಛಿಕತಾ, ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ಭದ್ದಾಲಿತ್ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.

ಭದ್ದಾಲಿತ್ಥೇರಸ್ಸಾಪದಾನಂ ಪಠಮಂ.