೩. ಸಬ್ಬಕಿತ್ತಿಕತ್ಥೇರಅಪದಾನಂ

೩೦೪. ‘‘ಕಣಿಕಾರಂವ ಜಲಿತಂ [ಜೋತನ್ತಂ (ಸೀ.)], ದೀಪರುಕ್ಖಂವ ಉಜ್ಜಲಂ [ಜೋತಿತಂ (ಸ್ಯಾ.)];

ಓಸಧಿಂವ ವಿರೋಚನ್ತಂ, ವಿಜ್ಜುತಂ ಗಗನೇ ಯಥಾ.

೩೦೫. ‘‘ಅಸಮ್ಭೀತಂ ಅನುತ್ತಾಸಿಂ, ಮಿಗರಾಜಂವ ಕೇಸರಿಂ;

ಞಾಣಾಲೋಕಂ ಪಕಾಸೇನ್ತಂ, ಮದ್ದನ್ತಂ ತಿತ್ಥಿಯೇ ಗಣೇ.

೩೦೬. ‘‘ಉದ್ಧರನ್ತಂ ಇಮಂ ಲೋಕಂ, ಛಿದ್ದನ್ತಂ ಸಬ್ಬಸಂಸಯಂ;

ಗಜ್ಜನ್ತಂ [ಅಸಮ್ಭೀತಂ (ಸ್ಯಾ.), ಗಚ್ಛನ್ತಂ (ಕ.)] ಮಿಗರಾಜಂವ, ಅದ್ದಸಂ ಲೋಕನಾಯಕಂ.

೩೦೭. ‘‘ಜಟಾಜಿನಧರೋ ಆಸಿಂ, ಬ್ರಹಾ ಉಜು ಪತಾಪವಾ;

ವಾಕಚೀರಂ ಗಹೇತ್ವಾನ, ಪಾದಮೂಲೇ ಅಪತ್ಥರಿಂ.

೩೦೮. ‘‘ಕಾಳಾನುಸಾರಿಯಂ ಗಯ್ಹ, ಅನುಲಿಮ್ಪಿಂ ತಥಾಗತಂ;

ಸಮ್ಬುದ್ಧಮನುಲಿಮ್ಪೇತ್ವಾ, ಸನ್ಥವಿಂ ಲೋಕನಾಯಕಂ.

೩೦೯. ‘‘ಸಮುದ್ಧರಸಿಮಂ ಲೋಕಂ, ಓಘತಿಣ್ಣ [ಓಘತಿಣ್ಣೋ (ಸ್ಯಾ. ಕ.)] ಮಹಾಮುನಿ;

ಞಾಣಾಲೋಕೇನ ಜೋತೇಸಿ, ನಾವಟಂ [ಪವರಂ (ಸ್ಯಾ.), ವಜಿರ (ಪೀ.)] ಞಾಣಮುತ್ತಮಂ.

೩೧೦. ‘‘ಧಮ್ಮಚಕ್ಕಂ [ತುವಂ ಚಕ್ಕಂ (ಕ.)] ಪವತ್ತೇಸಿ, ಮದ್ದಸೇ ಪರತಿತ್ಥಿಯೇ;

ಉಸಭೋ ಜಿತಸಙ್ಗಾಮೋ, ಸಮ್ಪಕಮ್ಪೇಸಿ ಮೇದನಿಂ.

೩೧೧. ‘‘ಮಹಾಸಮುದ್ದೇ ಊಮಿಯೋ, ವೇಲನ್ತಮ್ಹಿ ಪಭಿಜ್ಜರೇ;

ತಥೇವ ತವ ಞಾಣಮ್ಹಿ, ಸಬ್ಬದಿಟ್ಠೀ ಪಭಿಜ್ಜರೇ.

೩೧೨. ‘‘ಸುಖುಮಚ್ಛಿಕಜಾಲೇನ, ಸರಮ್ಹಿ ಸಮ್ಪತಾನಿತೇ;

ಅನ್ತೋಜಾಲಿಕತಾ [ಜಾಲಗತಾ (ಸೀ.)] ಪಾಣಾ, ಪೀಳಿತಾ ಹೋನ್ತಿ ತಾವದೇ.

೩೧೩. ‘‘ತಥೇವ ತಿತ್ಥಿಯಾ ಲೋಕೇ, ಪುಥುಪಾಸಣ್ಡನಿಸ್ಸಿತಾ [ಮೂಳ್ಹಾ ಸಚ್ಚವಿನಿಸ್ಸಟಾ (ಸ್ಯಾ.), ಮುಟ್ಠಸಚ್ಚವಿನಿಸ್ಸಟಾ (ಕ.)];

ಅನ್ತೋಞಾಣವರೇ ತುಯ್ಹಂ, ಪರಿವತ್ತನ್ತಿ ಮಾರಿಸ.

೩೧೪. ‘‘ಪತಿಟ್ಠಾ ವುಯ್ಹತಂ ಓಘೇ, ತ್ವಞ್ಹಿ ನಾಥೋ ಅಬನ್ಧುನಂ;

ಭಯಟ್ಟಿತಾನಂ ಸರಣಂ, ಮುತ್ತಿತ್ಥೀನಂ ಪರಾಯಣಂ.

೩೧೫. ‘‘ಏಕವೀರೋ ಅಸದಿಸೋ, ಮೇತ್ತಾಕರುಣಸಞ್ಚಯೋ [ಸಞ್ಞುತೋ (ಸ್ಯಾ.)];

ಅಸಮೋ ಸುಸಮೋ ಸನ್ತೋ [ಸುಸೀಲೋ ಅಸಮೋ ಸನ್ತೋ (ಸೀ.), ಪಞ್ಞವಾ ಯುತ್ತಚಾಗೋ ಚ (ಸ್ಯಾ.)], ವಸೀ ತಾದೀ ಜಿತಞ್ಜಯೋ.

೩೧೬. ‘‘ಧೀರೋ ವಿಗತಸಮ್ಮೋಹೋ, ಅನೇಜೋ ಅಕಥಂಕಥೀ;

ತುಸಿತೋ [ವುಸಿತೋ (ಸೀ.)] ವನ್ತದೋಸೋಸಿ, ನಿಮ್ಮಲೋ ಸಂಯತೋ ಸುಚಿ.

೩೧೭. ‘‘ಸಙ್ಗಾತಿಗೋ ಹತಮದೋ [ಗತಮದೋ (ಸ್ಯಾ.), ತಮನುದೋ (ಕ.)], ತೇವಿಜ್ಜೋ ತಿಭವನ್ತಗೋ;

ಸೀಮಾತಿಗೋ ಧಮ್ಮಗರು, ಗತತ್ಥೋ ಹಿತವಬ್ಭುತೋ [ಹಿತವಪ್ಪಥೋ (ಸೀ. ಸ್ಯಾ.)].

೩೧೮. ‘‘ತಾರಕೋ ತ್ವಂ ಯಥಾ ನಾವಾ, ನಿಧೀವಸ್ಸಾಸಕಾರಕೋ;

ಅಸಮ್ಭೀತೋ ಯಥಾ ಸೀಹೋ, ಗಜರಾಜಾವ ದಪ್ಪಿತೋ.

೩೧೯. ‘‘ಥೋಮೇತ್ವಾ ದಸಗಾಥಾಹಿ, ಪದುಮುತ್ತರಂ ಮಹಾಯಸಂ;

ವನ್ದಿತ್ವಾ ಸತ್ಥುನೋ ಪಾದೇ, ತುಣ್ಹೀ ಅಟ್ಠಾಸಹಂ ತದಾ.

೩೨೦. ‘‘ಪದುಮುತ್ತರೋ ಲೋಕವಿದೂ, ಆಹುತೀನಂ ಪಟಿಗ್ಗಹೋ;

ಭಿಕ್ಖುಸಙ್ಘೇ ಠಿತೋ ಸತ್ಥಾ, ಇಮಾ ಗಾಥಾ ಅಭಾಸಥ.

೩೨೧. ‘‘‘ಯೋ ಮೇ ಸೀಲಞ್ಚ ಞಾಣಞ್ಚ, ಸದ್ಧಮ್ಮಞ್ಚಾಪಿ ವಣ್ಣಯಿ [ಧಮ್ಮಞ್ಚಾಪಿ ಪಕಿತ್ತಯಿ (ಸೀ. ಸ್ಯಾ.)];

ತಮಹಂ ಕಿತ್ತಯಿಸ್ಸಾಮಿ, ಸುಣಾಥ ಮಮ ಭಾಸತೋ.

೩೨೨. ‘‘‘ಸಟ್ಠಿ ಕಪ್ಪಸಹಸ್ಸಾನಿ, ದೇವಲೋಕೇ ರಮಿಸ್ಸತಿ;

ಅಞ್ಞೇ ದೇವೇಭಿಭವಿತ್ವಾ, ಇಸ್ಸರಂ ಕಾರಯಿಸ್ಸತಿ.

೩೨೩. ‘‘‘ಸೋ ಪಚ್ಛಾ ಪಬ್ಬಜಿತ್ವಾನ, ಸುಕ್ಕಮೂಲೇನ ಚೋದಿತೋ;

ಗೋತಮಸ್ಸ ಭಗವತೋ, ಸಾಸನೇ ಪಬ್ಬಜಿಸ್ಸತಿ.

೩೨೪. ‘‘‘ಪಬ್ಬಜಿತ್ವಾನ ಕಾಯೇನ, ಪಾಪಕಮ್ಮಂ ವಿವಜ್ಜಿಯ;

ಸಬ್ಬಾಸವೇ ಪರಿಞ್ಞಾಯ, ನಿಬ್ಬಾಯಿಸ್ಸತಿನಾಸವೋ’.

೩೨೫. ‘‘ಯಥಾಪಿ ಮೇಘೋ ಥನಯಂ, ತಪ್ಪೇತಿ ಮೇದಿನಿಂ ಇಮಂ;

ತಥೇವ ತ್ವಂ ಮಹಾವೀರ, ಧಮ್ಮೇನ ತಪ್ಪಯೀ ಮಮಂ.

೩೨೬. ‘‘ಸೀಲಂ ಪಞ್ಞಞ್ಚ ಧಮ್ಮಞ್ಚ, ಥವಿತ್ವಾ ಲೋಕನಾಯಕಂ;

ಪತ್ತೋಮ್ಹಿ ಪರಮಂ ಸನ್ತಿಂ, ನಿಬ್ಬಾನಂ ಪದಮಚ್ಚುತಂ.

೩೨೭. ‘‘ಅಹೋ ನೂನ ಸ ಭಗವಾ, ಚಿರಂ ತಿಟ್ಠೇಯ್ಯ ಚಕ್ಖುಮಾ;

ಅಞ್ಞಾತಞ್ಚ ವಿಜಾನೇಯ್ಯುಂ, ಫುಸೇಯ್ಯುಂ [ಅಞ್ಞಾತಞ್ಚಾಪಿ ಜಾನೇಯ್ಯ, ಪಸ್ಸೇಯ್ಯ (ಕ.)] ಅಮತಂ ಪದಂ.

೩೨೮. ‘‘ಅಯಂ ಮೇ ಪಚ್ಛಿಮಾ ಜಾತಿ, ಭವಾ ಸಬ್ಬೇ ಸಮೂಹತಾ;

ಸಬ್ಬಾಸವೇ ಪರಿಞ್ಞಾಯ, ವಿಹರಾಮಿ ಅನಾಸವೋ.

೩೨೯. ‘‘ಸತಸಹಸ್ಸಿತೋ ಕಪ್ಪೇ, ಯಂ ಬುದ್ಧಮಭಿಥೋಮಯಿಂ

ದುಗ್ಗತಿಂ ನಾಭಿಜಾನಾಮಿ, ಕಿತ್ತನಾಯ ಇದಂ ಫಲಂ.

೩೩೦. ‘‘ಕಿಲೇಸಾ ಝಾಪಿತಾ ಮಯ್ಹಂ, ಭವಾ ಸಬ್ಬೇ ಸಮೂಹತಾ;

ಸಬ್ಬಾಸವಾ ಪರಿಕ್ಖೀಣಾ, ನತ್ಥಿ ದಾನಿ ಪುನಬ್ಭವೋ.

೩೩೧. ‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.

೩೩೨. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ಸಬ್ಬಕಿತ್ತಿಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.

ಸಬ್ಬಕಿತ್ತಿಕತ್ಥೇರಸ್ಸಾಪದಾನಂ ತತಿಯಂ.