೭. ಲಸುಣದಾಯಕತ್ಥೇರಅಪದಾನಂ

೮೯. ‘‘ಹಿಮವನ್ತಸ್ಸಾವಿದೂರೇ, ತಾಪಸೋ ಆಸಹಂ ತದಾ;

ಲಸುಣಂ ಉಪಜೀವಾಮಿ, ಲಸುಣಂ ಮಯ್ಹಭೋಜನಂ.

೯೦. ‘‘ಖಾರಿಯೋ ಪೂರಯಿತ್ವಾನ, ಸಙ್ಘಾರಾಮಮಗಚ್ಛಹಂ;

ಹಟ್ಠೋ ಹಟ್ಠೇನ ಚಿತ್ತೇನ, ಸಙ್ಘಸ್ಸ ಲಸುಣಂ ಅದಂ.

೯೧. ‘‘ವಿಪಸ್ಸಿಸ್ಸ ನರಗ್ಗಸ್ಸ, ಸಾಸನೇ ನಿರತಸ್ಸಹಂ;

ಸಙ್ಘಸ್ಸ ಲಸುಣಂ ದತ್ವಾ, ಕಪ್ಪಂ ಸಗ್ಗಮ್ಹಿ ಮೋದಹಂ.

೯೨. ‘‘ಏಕನವುತಿತೋ ಕಪ್ಪೇ, ಲಸುಣಂ ಯಮದಂ ತದಾ;

ದುಗ್ಗತಿಂ ನಾಭಿಜಾನಾಮಿ, ಲಸುಣಸ್ಸ ಇದಂ ಫಲಂ.

೯೩. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ಲಸುಣದಾಯಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ;

ಲಸುಣದಾಯಕತ್ಥೇರಸ್ಸಾಪದಾನಂ ಸತ್ತಮಂ.