೮. ಆಯಾಗದಾಯಕತ್ಥೇರಅಪದಾನಂ

೯೪. ‘‘ನಿಬ್ಬುತೇ ಲೋಕನಾಥಮ್ಹಿ, ಸಿಖಿಮ್ಹಿ ವದತಂ ವರೇ;

ಹಟ್ಠೋ ಹಟ್ಠೇನ ಚಿತ್ತೇನ, ಅವನ್ದಿಂ ಥೂಪಮುತ್ತಮಂ.

೯೫. ‘‘ವಡ್ಢಕೀಹಿ ಕಥಾಪೇತ್ವಾ, ಮೂಲಂ ದತ್ವಾನಹಂ ತದಾ;

ಹಟ್ಠೋ ಹಟ್ಠೇನ ಚಿತ್ತೇನ, ಆಯಾಗಂ ಕಾರಪೇಸಹಂ.

೯೬. ‘‘ಅಟ್ಠ ಕಪ್ಪಾನಿ ದೇವೇಸು, ಅಬ್ಬೋಕಿಣ್ಣಂ [ಅಬ್ಬೋಚ್ಛಿನ್ನಂ (ಸೀ.)] ವಸಿಂ ಅಹಂ;

ಅವಸೇಸೇಸು ಕಪ್ಪೇಸು, ವೋಕಿಣ್ಣಂ ಸಂಸರಿಂ ಅಹಂ.

೯೭. ‘‘ಕಾಯೇ ವಿಸಂ ನ ಕಮತಿ, ಸತ್ಥಾನಿ ನ ಚ ಹನ್ತಿ ಮೇ;

ಉದಕೇಹಂ ನ ಮಿಯ್ಯಾಮಿ, ಆಯಾಗಸ್ಸ ಇದಂ ಫಲಂ.

೯೮. ‘‘ಯದಿಚ್ಛಾಮಿ ಅಹಂ ವಸ್ಸಂ, ಮಹಾಮೇಘೋ ಪವಸ್ಸತಿ;

ದೇವಾಪಿ ಮೇ ವಸಂ ಏನ್ತಿ, ಪುಞ್ಞಕಮ್ಮಸ್ಸಿದಂ ಫಲಂ.

೯೯. ‘‘ಸತ್ತರತನಸಮ್ಪನ್ನೋ, ತಿಸಕ್ಖತ್ತುಂ ಅಹೋಸಹಂ;

ನ ಮಂ ಕೇಚಾವಜಾನನ್ತಿ, ಪುಞ್ಞಕಮ್ಮಸ್ಸಿದಂ ಫಲಂ.

೧೦೦. ‘‘ಏಕತ್ತಿಂಸೇ ಇತೋ ಕಪ್ಪೇ, ಆಯಾಗಂ ಯಮಕಾರಯಿಂ;

ದುಗ್ಗತಿಂ ನಾಭಿಜಾನಾಮಿ, ಆಯಾಗಸ್ಸ ಇದಂ ಫಲಂ.

೧೦೧. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ಆಯಾಗದಾಯಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.

ಆಯಾಗದಾಯಕತ್ಥೇರಸ್ಸಾಪದಾನಂ ಅಟ್ಠಮಂ.