೯. ಸೋಣಕೋಟಿವೀಸತ್ಥೇರಅಪದಾನಂ

೪೯. ‘‘ವಿಪಸ್ಸಿನೋ ಪಾವಚನೇ, ಏಕಂ ಲೇಣಂ ಮಯಾ ಕತಂ;

ಚಾತುದ್ದಿಸಸ್ಸ ಸಙ್ಘಸ್ಸ, ಬನ್ಧುಮಾರಾಜಧಾನಿಯಾ.

೫೦. ‘‘ದುಸ್ಸೇಹಿ ಭೂಮಿಂ ಲೇಣಸ್ಸ, ಸನ್ಥರಿತ್ವಾ ಪರಿಚ್ಚಜಿಂ;

ಉದಗ್ಗಚಿತ್ತೋ ಸುಮನೋ, ಅಕಾಸಿಂ ಪಣಿಧಿಂ ತದಾ.

೫೧. ‘‘ಆರಾಧಯೇಯ್ಯಂ ಸಮ್ಬುದ್ಧಂ, ಪಬ್ಬಜ್ಜಞ್ಚ ಲಭೇಯ್ಯಹಂ;

ಅನುತ್ತರಞ್ಚ ನಿಬ್ಬಾನಂ, ಫುಸೇಯ್ಯಂ ಸನ್ತಿಮುತ್ತಮಂ.

೫೨. ‘‘ತೇನೇವ ಸುಕ್ಕಮೂಲೇನ, ಕಪ್ಪೇ [ಕಪ್ಪಂ (ಸೀ.), ಕಪ್ಪ (ಕ.)] ನವುತಿ ಸಂಸರಿಂ;

ದೇವಭೂತೋ ಮನುಸ್ಸೋ ಚ, ಕತಪುಞ್ಞೋ ವಿರೋಚಹಂ.

೫೩. ‘‘ತತೋ ಕಮ್ಮಾವಸೇಸೇನ, ಇಧ ಪಚ್ಛಿಮಕೇ ಭವೇ;

ಚಮ್ಪಾಯಂ ಅಗ್ಗಸೇಟ್ಠಿಸ್ಸ, ಜಾತೋಮ್ಹಿ ಏಕಪುತ್ತಕೋ.

೫೪. ‘‘ಜಾತಮತ್ತಸ್ಸ ಮೇ ಸುತ್ವಾ, ಪಿತು ಛನ್ದೋ ಅಯಂ ಅಹು;

ದದಾಮಹಂ ಕುಮಾರಸ್ಸ, ವೀಸಕೋಟೀ ಅನೂನಕಾ.

೫೫. ‘‘ಚತುರಙ್ಗುಲಾ ಚ ಮೇ ಲೋಮಾ, ಜಾತಾ ಪಾದತಲೇ ಉಭೋ;

ಸುಖುಮಾ ಮುದುಸಮ್ಫಸ್ಸಾ, ತೂಲಾಪಿಚುಸಮಾ ಸುಭಾ.

೫೬. ‘‘ಅತೀತಾ ನವುತಿ ಕಪ್ಪಾ, ಅಯಂ ಏಕೋ ಚ ಉತ್ತರಿ;

ನಾಭಿಜಾನಾಮಿ ನಿಕ್ಖಿತ್ತೇ, ಪಾದೇ ಭೂಮ್ಯಾ ಅಸನ್ಥತೇ.

೫೭. ‘‘ಆರಾಧಿತೋ ಮೇ ಸಮ್ಬುದ್ಧೋ, ಪಬ್ಬಜಿಂ ಅನಗಾರಿಯಂ;

ಅರಹತ್ತಞ್ಚ ಮೇ ಪತ್ತಂ, ಸೀತಿಭೂತೋಮ್ಹಿ ನಿಬ್ಬುತೋ.

೫೮. ‘‘ಅಗ್ಗೋ ಆರದ್ಧವೀರಿಯಾನಂ, ನಿದ್ದಿಟ್ಠೋ ಸಬ್ಬದಸ್ಸಿನಾ;

ಖೀಣಾಸವೋಮ್ಹಿ ಅರಹಾ, ಛಳಭಿಞ್ಞೋ ಮಹಿದ್ಧಿಕೋ.

೫೯. ‘‘ಏಕನವುತಿತೋ ಕಪ್ಪೇ, ಯಂ ದಾನಮದದಿಂ ತದಾ;

ದುಗ್ಗತಿಂ ನಾಭಿಜಾನಾಮಿ, ಲೇಣದಾನಸ್ಸಿದಂ ಫಲಂ.

೬೦. ‘‘ಕಿಲೇಸಾ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವೋ.

೬೧. ‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.

೬೨. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

೬೩. ‘‘ಥೇರೋ ಕೋಟಿವೀಸೋ [ಕೋಟಿವಿಸೋ (ಸ್ಯಾ. ಕ.), ಕೋಳಿವಿಸೋ (ಅಞ್ಞಟ್ಠಾನೇಸು)] ಸೋಣೋ, ಭಿಕ್ಖುಸಙ್ಘಸ್ಸ ಅಗ್ಗತೋ;

ಪಞ್ಹಂ ಪುಟ್ಠೋ ವಿಯಾಕಾಸಿ, ಅನೋತತ್ತೇ ಮಹಾಸರೇ’’ತಿ.

ಇತ್ಥಂ ಸುದಂ ಆಯಸ್ಮಾ ಸೋಣೋ ಕೋಟಿವೀಸೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.

ಸೋಣಕೋಟಿವೀಸತ್ಥೇರಸ್ಸಾಪದಾನಂ ನವಮಂ.