೧೦. ಪುಬ್ಬಕಮ್ಮಪಿಲೋತಿಕಬುದ್ಧಅಪದಾನಂ

೬೪. ‘‘ಅನೋತತ್ತಸರಾಸನ್ನೇ, ರಮಣೀಯೇ ಸಿಲಾತಲೇ;

ನಾನಾರತನಪಜ್ಜೋತೇ, ನಾನಾಗನ್ಧವನನ್ತರೇ.

೬೫. ‘‘ಮಹತಾ ಭಿಕ್ಖುಸಙ್ಘೇನ, ಪರೇತೋ [ಉಪೇತೋ (ಉದಾನಟ್ಠಕಥಾಯಂ ೪ ವಗ್ಗೇ, ೮ ಸುತ್ತೇ)] ಲೋಕನಾಯಕೋ;

ಆಸೀನೋ ಬ್ಯಾಕರೀ ತತ್ಥ, ಪುಬ್ಬಕಮ್ಮಾನಿ ಅತ್ತನೋ.

೬೬. [ಸುಣಾಥ ಭಿಕ್ಖವೇ ಮಯ್ಹಂ, ಯಂ ಕಮ್ಮಂ ಪಕತಂ ಮಯಾ; ಏಕಂ ಅರಞ್ಞಿಕಂ ಭಿಕ್ಖುಂ, ದಿಸ್ವಾ ದಿನ್ನಂ ಪಿಲೋತಿಕಂ; ಪತ್ಥಿತಂ ಪಠಮಂ ಬುದ್ಧಂ, ಬುದ್ಧತ್ತಾಯ ಮಯಾ ತದಾ; ಪಿಲೋತಿಯಸ್ಸ ಕಮ್ಮಸ್ಸ, ಬುದ್ಧತ್ತೇಪಿ ವಿಪಚ್ಚತಿ; ಗೋಪಾಲಕೋ ಪುರೇ ಆಸಿಂ, ಗಾವಿಂ ಪಾಜೇತಿ ಗೋಚರಂ; ಪಿವನ್ತಿಂ ಉದಕಂ ಆವಿಲಂ, ಗಾವಿಂ ದಿಸ್ವಾ ನಿವಾರಯಿಂ; ತೇನ ಕಮ್ಮವಿಪಾಕೇನ, ಇಧ ಪಚ್ಛಿಮಕೇ ಭವೇ; ವಿಪಾಸಿತೋ ಯದಿಚ್ಛಕಂ, ನ ಹಿ ಪಾತುಂ ಲಭಾಮಹಂ (ಸ್ಯಾ.)] ‘‘ಸುಣಾಥ ಭಿಕ್ಖವೋ ಮಯ್ಹಂ, ಯಂ ಕಮ್ಮಂ ಪಕತಂ ಮಯಾ;

ಪಿಲೋತಿಕಸ್ಸ ಕಮ್ಮಸ್ಸ, ಬುದ್ಧತ್ತೇಪಿ ವಿಪಚ್ಚತಿ [ಸುಣಾಥ ಭಿಕ್ಖವೇ ಮಯ್ಹಂ, ಯಂ ಕಮ್ಮಂ ಪಕತಂ ಮಯಾ; ಏಕಂ ಅರಞ್ಞಿಕಂ ಭಿಕ್ಖುಂ, ದಿಸ್ವಾ ದಿನ್ನಂ ಪಿಲೋತಿಕಂ; ಪತ್ಥಿತಂ ಪಠಮಂ ಬುದ್ಧಂ, ಬುದ್ಧತ್ತಾಯ ಮಯಾ ತದಾ; ಪಿಲೋತಿಯಸ್ಸ ಕಮ್ಮಸ್ಸ, ಬುದ್ಧತ್ತೇಪಿ ವಿಪಚ್ಚತಿ; ಗೋಪಾಲಕೋ ಪುರೇ ಆಸಿಂ, ಗಾವಿಂ ಪಾಜೇತಿ ಗೋಚರಂ; ಪಿವನ್ತಿಂ ಉದಕಂ ಆವಿಲಂ, ಗಾವಿಂ ದಿಸ್ವಾ ನಿವಾರಯಿಂ; ತೇನ ಕಮ್ಮವಿಪಾಕೇನ, ಇಧ ಪಚ್ಛಿಮಕೇ ಭವೇ; ವಿಪಾಸಿತೋ ಯದಿಚ್ಛಕಂ, ನ ಹಿ ಪಾತುಂ ಲಭಾಮಹಂ (ಸ್ಯಾ.)].

[೧]

೬೭. ‘‘ಮುನಾಳಿ ನಾಮಹಂ ಧುತ್ತೋ, ಪುಬ್ಬೇ ಅಞ್ಞಾಸು ಜಾತಿಸು [ಅಞ್ಞಾಯ ಜಾತಿಯಾ (ಉದಾನ ಅಟ್ಠ.)];

ಪಚ್ಚೇಕಬುದ್ಧಂ ಸುರಭಿಂ [ಸರಭುಂ (ಸೀ.)], ಅಬ್ಭಾಚಿಕ್ಖಿಂ ಅದೂಸಕಂ.

೬೮. ‘‘ತೇನ ಕಮ್ಮವಿಪಾಕೇನ, ನಿರಯೇ ಸಂಸರಿಂ ಚಿರಂ;

ಬಹೂವಸ್ಸಸಹಸ್ಸಾನಿ, ದುಕ್ಖಂ ವೇದೇಸಿ ವೇದನಂ.

೬೯. ‘‘ತೇನ ಕಮ್ಮಾವಸೇಸೇನ, ಇಧ ಪಚ್ಛಿಮಕೇ ಭವೇ;

ಅಬ್ಭಕ್ಖಾನಂ ಮಯಾ ಲದ್ಧಂ, ಸುನ್ದರಿಕಾಯ ಕಾರಣಾ.

[೨]

೭೦. ‘‘ಸಬ್ಬಾಭಿಭುಸ್ಸ ಬುದ್ಧಸ್ಸ, ನನ್ದೋ ನಾಮಾಸಿ ಸಾವಕೋ;

ತಂ ಅಬ್ಭಕ್ಖಾಯ ನಿರಯೇ, ಚಿರಂ ಸಂಸರಿತಂ ಮಯಾ.

೭೧. ‘‘ದಸವಸ್ಸಸಹಸ್ಸಾನಿ, ನಿರಯೇ ಸಂಸರಿಂ ಚಿರಂ;

ಮನುಸ್ಸಭಾವಂ ಲದ್ಧಾಹಂ, ಅಬ್ಭಕ್ಖಾನಂ ಬಹುಂ ಲಭಿಂ.

೭೨. ‘‘ತೇನ ಕಮ್ಮಾವಸೇಸೇನ, ಚಿಞ್ಚಮಾನವಿಕಾ ಮಮಂ;

ಅಬ್ಭಾಚಿಕ್ಖಿ ಅಭೂತೇನ, ಜನಕಾಯಸ್ಸ ಅಗ್ಗತೋ.

[೩]

೭೩. ‘‘ಬ್ರಾಹ್ಮಣೋ ಸುತವಾ ಆಸಿಂ, ಅಹಂ ಸಕ್ಕತಪೂಜಿತೋ;

ಮಹಾವನೇ ಪಞ್ಚಸತೇ, ಮನ್ತೇ ವಾಚೇಮಿ ಮಾಣವೇ.

೭೪. ‘‘ತತ್ಥಾಗತೋ [ತಮಾಗತೋ (ಕ.)] ಇಸಿ ಭೀಮೋ, ಪಞ್ಚಾಭಿಞ್ಞೋ ಮಹಿದ್ಧಿಕೋ;

ತಂ ಚಾಹಂ ಆಗತಂ ದಿಸ್ವಾ, ಅಬ್ಭಾಚಿಕ್ಖಿಂ ಅದೂಸಕಂ.

೭೫. ‘‘ತತೋಹಂ ಅವಚಂ ಸಿಸ್ಸೇ, ಕಾಮಭೋಗೀ ಅಯಂ ಇಸಿ;

ಮಯ್ಹಮ್ಪಿ ಭಾಸಮಾನಸ್ಸ, ಅನುಮೋದಿಂಸು ಮಾಣವಾ.

೭೬. ‘‘ತತೋ ಮಾಣವಕಾ ಸಬ್ಬೇ, ಭಿಕ್ಖಮಾನಂ ಕುಲೇ ಕುಲೇ;

ಮಹಾಜನಸ್ಸ ಆಹಂಸು, ಕಾಮಭೋಗೀ ಅಯಂ ಇಸಿ.

೭೭. ‘‘ತೇನ ಕಮ್ಮವಿಪಾಕೇನ, ಪಞ್ಚ ಭಿಕ್ಖುಸತಾ ಇಮೇ;

ಅಬ್ಭಕ್ಖಾನಂ ಲಭುಂ ಸಬ್ಬೇ, ಸುನ್ದರಿಕಾಯ ಕಾರಣಾ.

[೪]

೭೮. ‘‘ವೇಮಾತುಭಾತರಂ ಪುಬ್ಬೇ, ಧನಹೇತು ಹನಿಂ ಅಹಂ;

ಪಕ್ಖಿಪಿಂ ಗಿರಿದುಗ್ಗಸ್ಮಿಂ, ಸಿಲಾಯ ಚ ಅಪಿಂಸಯಿಂ.

೭೯. ‘‘ತೇನ ಕಮ್ಮವಿಪಾಕೇನ, ದೇವದತ್ತೋ ಸಿಲಂ ಖಿಪಿ;

ಅಙ್ಗುಟ್ಠಂ ಪಿಂಸಯೀ ಪಾದೇ, ಮಮ ಪಾಸಾಣಸಕ್ಖರಾ.

[೫]

೮೦. ‘‘ಪುರೇಹಂ ದಾರಕೋ ಹುತ್ವಾ, ಕೀಳಮಾನೋ ಮಹಾಪಥೇ;

ಪಚ್ಚೇಕಬುದ್ಧಂ ದಿಸ್ವಾನ, ಮಗ್ಗೇ ಸಕಲಿಕಂ [ಸಕ್ಖಲಿಕಂ (ಕ.)] ಖಿಪಿಂ [ದಹಿಂ (ಸ್ಯಾ.)].

೮೧. ‘‘ತೇನ ಕಮ್ಮವಿಪಾಕೇನ, ಇಧ ಪಚ್ಛಿಮಕೇ ಭವೇ;

ವಧತ್ಥಂ ಮಂ ದೇವದತ್ತೋ, ಅಭಿಮಾರೇ ಪಯೋಜಯಿ.

[೬]

೮೨. ‘‘ಹತ್ಥಾರೋಹೋ ಪುರೇ ಆಸಿಂ, ಪಚ್ಚೇಕಮುನಿಮುತ್ತಮಂ;

ಪಿಣ್ಡಾಯ ವಿಚರನ್ತಂ ತಂ, ಆಸಾದೇಸಿಂ ಗಜೇನಹಂ.

೮೩. ‘‘ತೇನ ಕಮ್ಮವಿಪಾಕೇನ, ಭನ್ತೋ [ದನ್ತೋ (ಕ.)] ನಾಳಾಗಿರೀ ಗಜೋ;

ಗಿರಿಬ್ಬಜೇ ಪುರವರೇ, ದಾರುಣೋ ಸಮುಪಾಗಮಿ [ಮಂ ಉಪಾಗಮಿ (ಸೀ.)].

[೭]

೮೪. ‘‘ರಾಜಾಹಂ ಪತ್ಥಿವೋ [ಪತ್ತಿಕೋ (ಸ್ಯಾ. ಕ.), ಖತ್ತಿಯೋ (ಉದಾನ ಅಟ್ಠ.)] ಆಸಿಂ, ಸತ್ತಿಯಾ ಪುರಿಸಂ ಹನಿಂ;

ತೇನ ಕಮ್ಮವಿಪಾಕೇನ, ನಿರಯೇ ಪಚ್ಚಿಸಂ ಭುಸಂ.

೮೫. ‘‘ಕಮ್ಮುನೋ ತಸ್ಸ ಸೇಸೇನ, ಇದಾನಿ ಸಕಲಂ ಮಮ;

ಪಾದೇ ಛವಿಂ ಪಕಪ್ಪೇಸಿ [ಪಕೋಪೇಸಿ (ಸೀ.)], ನ ಹಿ ಕಮ್ಮಂ ವಿನಸ್ಸತಿ.

[೮]

೮೬. ‘‘ಅಹಂ ಕೇವಟ್ಟಗಾಮಸ್ಮಿಂ, ಅಹುಂ ಕೇವಟ್ಟದಾರಕೋ;

ಮಚ್ಛಕೇ ಘಾತಿತೇ ದಿಸ್ವಾ, ಜನಯಿಂ ಸೋಮನಸ್ಸಕಂ [ಸೋಮನಸ್ಸಹಂ (ಉದಾನ ಅಟ್ಠ.)].

೮೭. ‘‘ತೇನ ಕಮ್ಮವಿಪಾಕೇನ, ಸೀಸದುಕ್ಖಂ ಅಹೂ ಮಮ;

ಸಬ್ಬೇ ಸಕ್ಕಾ ಚ ಹಞ್ಞಿಂಸು, ಯದಾ ಹನಿ ವಿಟಟೂಭೋ [ವಿಟಟುಭೋ (ಸ್ಯಾ. ಕ.)].

[೯]

೮೮. ‘‘ಫುಸ್ಸಸ್ಸಾಹಂ ಪಾವಚನೇ, ಸಾವಕೇ ಪರಿಭಾಸಯಿಂ;

ಯವಂ ಖಾದಥ ಭುಞ್ಜಥ, ಮಾ ಚ ಭುಞ್ಜಥ ಸಾಲಯೋ.

೮೯. ‘‘ತೇನ ಕಮ್ಮವಿಪಾಕೇನ, ತೇಮಾಸಂ ಖಾದಿತಂ ಯವಂ;

ನಿಮನ್ತಿತೋ ಬ್ರಾಹ್ಮಣೇನ, ವೇರಞ್ಜಾಯಂ ವಸಿಂ ತದಾ.

[೧೦]

೯೦. ‘‘ನಿಬ್ಬುದ್ಧೇ ವತ್ತಮಾನಮ್ಹಿ, ಮಲ್ಲಪುತ್ತಂ ನಿಹೇಠಯಿಂ [ನಿಸೇಧಯಿಂ (ಸ್ಯಾ. ಕ.)];

ತೇನ ಕಮ್ಮವಿಪಾಕೇನ, ಪಿಟ್ಠಿದುಕ್ಖಂ ಅಹೂ ಮಮ.

[೧೧]

೯೧. ‘‘ತಿಕಿಚ್ಛಕೋ ಅಹಂ ಆಸಿಂ, ಸೇಟ್ಠಿಪುತ್ತಂ ವಿರೇಚಯಿಂ;

ತೇನ ಕಮ್ಮವಿಪಾಕೇನ, ಹೋತಿ ಪಕ್ಖನ್ದಿಕಾ ಮಮ.

[೧೨]

೯೨. ‘‘ಅವಚಾಹಂ ಜೋತಿಪಾಲೋ, ಸುಗತಂ ಕಸ್ಸಪಂ ತದಾ;

ಕುತೋ ನು ಬೋಧಿ ಮುಣ್ಡಸ್ಸ, ಬೋಧಿ ಪರಮದುಲ್ಲಭಾ.

೯೩. ‘‘ತೇನ ಕಮ್ಮವಿಪಾಕೇನ, ಅಚರಿಂ ದುಕ್ಕರಂ ಬಹುಂ;

ಛಬ್ಬಸ್ಸಾನುರುವೇಳಾಯಂ, ತತೋ ಬೋಧಿಮಪಾಪುಣಿಂ.

೯೪. ‘‘ನಾಹಂ ಏತೇನ ಮಗ್ಗೇನ, ಪಾಪುಣಿಂ ಬೋಧಿಮುತ್ತಮಂ;

ಕುಮ್ಮಗ್ಗೇನ ಗವೇಸಿಸ್ಸಂ, ಪುಬ್ಬಕಮ್ಮೇನ ವಾರಿತೋ.

೯೫. ‘‘ಪುಞ್ಞಪಾಪಪರಿಕ್ಖೀಣೋ, ಸಬ್ಬಸನ್ತಾಪವಜ್ಜಿತೋ;

ಅಸೋಕೋ ಅನುಪಾಯಾಸೋ, ನಿಬ್ಬಾಯಿಸ್ಸಮನಾಸವೋ.

೯೬. ‘‘ಏವಂ ಜಿನೋ ವಿಯಾಕಾಸಿ, ಭಿಕ್ಖುಸಙ್ಘಸ್ಸ ಅಗ್ಗತೋ;

ಸಬ್ಬಾಭಿಞ್ಞಾಬಲಪ್ಪತ್ತೋ, ಅನೋತತ್ತೇ ಮಹಾಸರೇ’’ತಿ.

ಇತ್ಥಂ ಸುದಂ ಭಗವಾ ಅತ್ತನೋ ಪುಬ್ಬಚರಿತಂ ಕಮ್ಮಪಿಲೋತಿಕಂ ನಾಮ ಬುದ್ಧಾಪದಾನಧಮ್ಮಪರಿಯಾಯಂ ಅಭಾಸಿತ್ಥಾತಿ.

ಪುಬ್ಬಕಮ್ಮಪಿಲೋತಿಕಂ ನಾಮ ಬುದ್ಧಾಪದಾನಂ ದಸಮಂ.

ಅವಟಫಲವಗ್ಗೋ ಏಕೂನಚತ್ತಾಲೀಸಮೋ.