೧. ಏಕಪದುಮಿಯತ್ಥೇರಅಪದಾನಂ

೧. ‘‘ಪದುಮುತ್ತರೋ ನಾಮ ಜಿನೋ, ಸಬ್ಬಧಮ್ಮಾನ ಪಾರಗೂ;

ಭವಾಭವೇ ವಿಭಾವೇನ್ತೋ, ತಾರೇಸಿ ಜನತಂ ಬಹುಂ.

೨. ‘‘ಹಂಸರಾಜಾ ತದಾ ಹೋಮಿ, ದಿಜಾನಂ ಪವರೋ ಅಹಂ;

ಜಾತಸ್ಸರಂ ಸಮೋಗಯ್ಹ, ಕೀಳಾಮಿ ಹಂಸಕೀಳಿತಂ.

೩. ‘‘ಪದುಮುತ್ತರೋ ಲೋಕವಿದೂ, ಆಹುತೀನಂ ಪಟಿಗ್ಗಹೋ;

ಜಾತಸ್ಸರಸ್ಸ ಉಪರಿ, ಆಗಚ್ಛಿ ತಾವದೇ ಜಿನೋ.

೪. ‘‘ದಿಸ್ವಾನಹಂ ದೇವದೇವಂ, ಸಯಮ್ಭುಂ ಲೋಕನಾಯಕಂ;

ವಣ್ಟೇ ಛೇತ್ವಾನ ಪದುಮಂ, ಸತಪತ್ತಂ ಮನೋರಮಂ.

೫. ‘‘ಮುಖತುಣ್ಡೇನ ಪಗ್ಗಯ್ಹ, ಪಸನ್ನೋ ಲೋಕನಾಯಕೇ [ವಿಪ್ಪಸನ್ನೇನ ಚೇತಸಾ (ಸ್ಯಾ.)];

ಉಕ್ಖಿಪಿತ್ವಾನ ಗಗಣೇ [ಉಕ್ಖಿಪಿತ್ವಾ ನಲಾಟೇನ (ಕ.)], ಬುದ್ಧಸೇಟ್ಠಂ ಅಪೂಜಯಿಂ.

೬. ‘‘ಪದುಮುತ್ತರೋ ಲೋಕವಿದೂ, ಆಹುತೀನಂ ಪಟಿಗ್ಗಹೋ;

ಅನ್ತಲಿಕ್ಖೇ ಠಿತೋ ಸತ್ಥಾ, ಅಕಾ ಮೇ ಅನುಮೋದನಂ.

೭. ‘‘‘ಇಮಿನಾ ಏಕಪದುಮೇನ, ಚೇತನಾಪಣಿಧೀಹಿ ಚ;

ಕಪ್ಪಾನಂ ಸತಸಹಸ್ಸಂ, ವಿನಿಪಾತಂ ನ ಗಚ್ಛಸಿ’.

೮. ‘‘ಇದಂ ವತ್ವಾನ ಸಮ್ಬುದ್ಧೋ, ಜಲಜುತ್ತಮನಾಮಕೋ;

ಮಮ ಕಮ್ಮಂ ಪಕಿತ್ತೇತ್ವಾ, ಅಗಮಾ ಯೇನ ಪತ್ಥಿತಂ.

೯. ‘‘ಸತಸಹಸ್ಸಿತೋ ಕಪ್ಪೇ, ಯಂ ಕಮ್ಮಮಕರಿಂ ತದಾ;

ದುಗ್ಗತಿಂ ನಾಭಿಜಾನಾಮಿ, ಬುದ್ಧಪೂಜಾಯಿದಂ ಫಲಂ.

೧೦. ‘‘ಪಟಿಸಮ್ಭಿದಾ ಚತಸ್ಸೋ, ವಿಮೋಕ್ಖಾಪಿ ಚ ಅಟ್ಠಿಮೇ;

ಛಳಭಿಞ್ಞಾ ಸಚ್ಛಿಕತಾ, ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ಏಕಪದುಮಿಯೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.

ಏಕಪದುಮಿಯತ್ಥೇರಸ್ಸಾಪದಾನಂ ಪಠಮಂ.