೧. ಗನ್ಧಧೂಪಿಯತ್ಥೇರಅಪದಾನಂ

೧. ‘‘ಸಿದ್ಧತ್ಥಸ್ಸ ಭಗವತೋ, ಗನ್ಧಧೂಪಂ ಅದಾಸಹಂ;

ಸುಮನೇಹಿ ಪಟಿಚ್ಛನ್ನಂ, ಬುದ್ಧಾನುಚ್ಛವಿಕಞ್ಚ ತಂ.

೨. ‘‘ಕಞ್ಚನಗ್ಘಿಯಸಙ್ಕಾಸಂ, ಬುದ್ಧಂ ಲೋಕಗ್ಗನಾಯಕಂ;

ಇನ್ದೀವರಂವ ಜಲಿತಂ, ಆದಿತ್ತಂವ ಹುತಾಸನಂ.

೩. ‘‘ಬ್ಯಗ್ಘುಸಭಂವ ಪವರಂ, ಅಭಿಜಾತಂವ ಕೇಸರಿಂ;

ನಿಸಿನ್ನಂ ಸಮಣಾನಗ್ಗಂ, ಭಿಕ್ಖುಸಙ್ಘಪುರಕ್ಖತಂ.

೪. ‘‘ದಿಸ್ವಾ ಚಿತ್ತಂ ಪಸಾದೇತ್ವಾ, ಪಗ್ಗಹೇತ್ವಾನ ಅಞ್ಜಲಿಂ;

ವನ್ದಿತ್ವಾ ಸತ್ಥುನೋ ಪಾದೇ, ಪಕ್ಕಾಮಿಂ ಉತ್ತರಾಮುಖೋ.

೫. ‘‘ಚತುನ್ನವುತಿತೋ ಕಪ್ಪೇ, ಯಂ ಗನ್ಧಮದದಿಂ ತದಾ;

ದುಗ್ಗತಿಂ ನಾಭಿಜಾನಾಮಿ, ಗನ್ಧಪೂಜಾಯಿದಂ ಫಲಂ.

೬. ‘‘ಪಟಿಸಮ್ಭಿದಾ ಚತಸ್ಸೋ, ವಿಮೋಕ್ಖಾಪಿ ಚ ಅಟ್ಠಿಮೇ;

ಛಳಭಿಞ್ಞಾ ಸಚ್ಛಿಕತಾ, ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ಗನ್ಧಧೂಪಿಯೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.

ಗನ್ಧಧೂಪಿಯತ್ಥೇರಸ್ಸಾಪದಾನಂ ಪಠಮಂ.