೫. ನಿಮಿತ್ತಸಞ್ಞಕತ್ಥೇರಅಪದಾನಂ

೨೮. ‘‘ಚನ್ದಭಾಗಾನದೀತೀರೇ, ವಸಾಮಿ ಅಸ್ಸಮೇ ಅಹಂ;

ಸುವಣ್ಣಮಿಗಮದ್ದಕ್ಖಿಂ, ಚರನ್ತಂ ವಿಪಿನೇ ಅಹಂ.

೨೯. ‘‘ಮಿಗೇ ಚಿತ್ತಂ ಪಸಾದೇತ್ವಾ, ಲೋಕಜೇಟ್ಠಂ ಅನುಸ್ಸರಿಂ;

ತೇನ ಚಿತ್ತಪ್ಪಸಾದೇನ, ಅಞ್ಞೇ ಬುದ್ಧೇ ಅನುಸ್ಸರಿಂ.

೩೦. ‘‘ಅಬ್ಭತೀತಾ ಚ ಯೇ ಬುದ್ಧಾ, ವತ್ತಮಾನಾ ಅನಾಗತಾ;

ಏವಮೇವಂ ವಿರೋಚನ್ತಿ, ಮಿಗರಾಜಾವ ತೇ ತಯೋ.

೩೧. ‘‘ಚತುನ್ನವುತಿತೋ ಕಪ್ಪೇ, ಯಂ ಸಞ್ಞಮಲಭಿಂ ತದಾ;

ದುಗ್ಗತಿಂ ನಾಭಿಜಾನಾಮಿ, ಬುದ್ಧಸಞ್ಞಾಯಿದಂ ಫಲಂ.

೩೨. ‘‘ಸತ್ತವೀಸೇ ಇತೋ ಕಪ್ಪೇ, ಏಕೋ ಆಸಿಂ ಮಹೀಪತಿ;

ಅರಞ್ಞಸತ್ಥೋ ನಾಮೇನ, ಚಕ್ಕವತ್ತೀ ಮಹಬ್ಬಲೋ.

೩೩. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ನಿಮಿತ್ತಸಞ್ಞಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.

ನಿಮಿತ್ತಸಞ್ಞಕತ್ಥೇರಸ್ಸಾಪದಾನಂ ಪಞ್ಚಮಂ.