೮. ತಿರಂಸಿಯತ್ಥೇರಅಪದಾನಂ

೩೯. ‘‘ಕೇಸರಿಂ ಅಭಿಜಾತಂವ, ಅಗ್ಗಿಕ್ಖನ್ಧಂವ ಪಬ್ಬತೇ;

ಓಭಾಸೇನ್ತಂ ದಿಸಾ ಸಬ್ಬಾ [ನಿವಾಸೇನ್ತಂ (ಕ.), ದಿಸಾಸಿನ್ನಂ (ಸ್ಯಾ.)], ಸಿದ್ಧತ್ಥಂ ಪಬ್ಬತನ್ತರೇ.

೪೦. ‘‘ಸೂರಿಯಸ್ಸ ಚ ಆಲೋಕಂ, ಚನ್ದಾಲೋಕಂ ತಥೇವ ಚ;

ಬುದ್ಧಾಲೋಕಞ್ಚ ದಿಸ್ವಾನ, ವಿತ್ತಿ ಮೇ ಉದಪಜ್ಜಥ.

೪೧. ‘‘ತಯೋ ಆಲೋಕೇ ದಿಸ್ವಾನ, ಸಮ್ಬುದ್ಧಂ [ಬುದ್ಧಞ್ಚ (ಸೀ.)] ಸಾವಕುತ್ತಮಂ;

ಏಕಂಸಂ ಅಜಿನಂ ಕತ್ವಾ, ಸನ್ಥವಿಂ ಲೋಕನಾಯಕಂ.

೪೨. ‘‘ತಯೋ ಹಿ ಆಲೋಕಕರಾ, ಲೋಕೇ ಲೋಕತಮೋನುದಾ;

ಚನ್ದೋ ಚ ಸೂರಿಯೋ ಚಾಪಿ, ಬುದ್ಧೋ ಚ ಲೋಕನಾಯಕೋ.

೪೩. ‘‘ಓಪಮ್ಮಂ ಉಪದಸ್ಸೇತ್ವಾ, ಕಿತ್ತಿತೋ ಮೇ ಮಹಾಮುನಿ;

ಬುದ್ಧಸ್ಸ ವಣ್ಣಂ ಕಿತ್ತೇತ್ವಾ, ಕಪ್ಪಂ ಸಗ್ಗಮ್ಹಿ ಮೋದಹಂ.

೪೪. ‘‘ಚತುನ್ನವುತಿತೋ ಕಪ್ಪೇ, ಯಂ ಬುದ್ಧಮಭಿಕಿತ್ತಯಿಂ;

ದುಗ್ಗತಿಂ ನಾಭಿಜಾನಾಮಿ, ಕಿತ್ತನಾಯ ಇದಂ ಫಲಂ.

೪೫. ‘‘ಏಕಸಟ್ಠಿಮ್ಹಿತೋ ಕಪ್ಪೇ, ಏಕೋ ಞಾಣಧರೋ ಅಹು;

ಸತ್ತರತನಸಮ್ಪನ್ನೋ, ಚಕ್ಕವತ್ತೀ ಮಹಬ್ಬಲೋ.

೪೬. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ತಿರಂಸಿಯೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.

ತಿರಂಸಿಯತ್ಥೇರಸ್ಸಾಪದಾನಂ ಅಟ್ಠಮಂ.