೮. ಸರಣಗಮನಿಯತ್ಥೇರಅಪದಾನಂ

೩೬. ‘‘ಪಬ್ಬತೇ ಹಿಮವನ್ತಮ್ಹಿ, ಅಹೋಸಿಂ ಲುದ್ದಕೋ ತದಾ;

ವಿಪಸ್ಸಿಂ ಅದ್ದಸಂ ಬುದ್ಧಂ, ಲೋಕಜೇಟ್ಠಂ ನರಾಸಭಂ.

೩೭. ‘‘ಉಪಾಸಿತ್ವಾನ ಸಮ್ಬುದ್ಧಂ, ವೇಯ್ಯಾವಚ್ಚಮಕಾಸಹಂ;

ಸರಣಞ್ಚ ಉಪಾಗಚ್ಛಿಂ, ದ್ವಿಪದಿನ್ದಸ್ಸ ತಾದಿನೋ.

೩೮. ‘‘ಏಕನವುತಿತೋ ಕಪ್ಪೇ, ಸರಣಂ ಉಪಗಚ್ಛಹಂ;

ದುಗ್ಗತಿಂ ನಾಭಿಜಾನಾಮಿ, ಸರಣಾಗಮನಪ್ಫಲಂ.

೩೯. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ಸರಣಗಮನಿಯೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.

ಸರಣಗಮನಿಯತ್ಥೇರಸ್ಸಾಪದಾನಂ ಅಟ್ಠಮಂ.