೧. ಚಿತಕಪೂಜಕತ್ಥೇರಅಪದಾನಂ

೧. ‘‘ಅಜಿತೋ ನಾಮ ನಾಮೇನ, ಅಹೋಸಿಂ ಬ್ರಾಹ್ಮಣೋ ತದಾ;

ಆಹುತಿಂ ಯಿಟ್ಠುಕಾಮೋಹಂ, ನಾನಾಪುಪ್ಫಂ ಸಮಾನಯಿಂ.

೨. ‘‘ಜಲನ್ತಂ ಚಿತಕಂ ದಿಸ್ವಾ, ಸಿಖಿನೋ ಲೋಕಬನ್ಧುನೋ;

ತಞ್ಚ ಪುಪ್ಫಂ ಸಮಾನೇತ್ವಾ, ಚಿತಕೇ ಓಕಿರಿಂ ಅಹಂ.

೩. ‘‘ಏಕತ್ತಿಂಸೇ ಇತೋ ಕಪ್ಪೇ, ಯಂ ಪುಪ್ಫಮಭಿಪೂಜಯಿಂ;

ದುಗ್ಗತಿಂ ನಾಭಿಜಾನಾಮಿ, ಬುದ್ಧಪೂಜಾಯಿದಂ ಫಲಂ.

೪. ‘‘ಸತ್ತವೀಸೇ [ಸತ್ತತಿಂಸೇ (ಕ.)] ಇತೋ ಕಪ್ಪೇ, ಸತ್ತಾಸುಂ ಮನುಜಾಧಿಪಾ;

ಸುಪಜ್ಜಲಿತನಾಮಾ ತೇ, ಚಕ್ಕವತ್ತೀ ಮಹಬ್ಬಲಾ.

೫. ‘‘ಪಟಿಸಮ್ಭಿದಾ ಚತಸ್ಸೋ, ವಿಮೋಕ್ಖಾಪಿ ಚ ಅಟ್ಠಿಮೇ;

ಛಳಭಿಞ್ಞಾ ಸಚ್ಛಿಕತಾ, ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ಚಿತಕಪೂಜಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.

ಚಿತಕಪೂಜಕತ್ಥೇರಸ್ಸಾಪದಾನಂ ಪಠಮಂ.