೩. ಸಾಲಪುಪ್ಫಿಯತ್ಥೇರಅಪದಾನಂ

೯. ‘‘ಅರುಣವತಿಯಾ ನಗರೇ, ಅಹೋಸಿಂ ಪೂಪಿಕೋ ತದಾ;

ಮಮ ದ್ವಾರೇನ ಗಚ್ಛನ್ತಂ, ಸಿಖಿನಂ ಅದ್ದಸಂ ಜಿನಂ.

೧೦. ‘‘ಬುದ್ಧಸ್ಸ ಪತ್ತಂ ಪಗ್ಗಯ್ಹ, ಸಾಲಪುಪ್ಫಂ ಅದಾಸಹಂ;

ಸಮ್ಮಗ್ಗತಸ್ಸ ಬುದ್ಧಸ್ಸ, ವಿಪ್ಪಸನ್ನೇನ ಚೇತಸಾ.

೧೧. ‘‘ಏಕತ್ತಿಂಸೇ ಇತೋ ಕಪ್ಪೇ, ಯಂ ಪುಪ್ಫಮಭಿದಾಸಹಂ [ಯಂ ಖಜ್ಜಕಮದಾಸಹಂ (ಸೀ.), ಯಂ ಖಜ್ಜಮಭಿದಾಸಹಂ (ಕ.) ಸಾಲಪುಪ್ಫನಾಮಕಂ ಖಜ್ಜಕಂ ವಾ ಭವೇಯ್ಯ];

ದುಗ್ಗತಿಂ ನಾಭಿಜಾನಾಮಿ, ಸಾಲಪುಪ್ಫಸ್ಸಿದಂ ಫಲಂ.

೧೨. ‘‘ಇತೋ ಚುದ್ದಸಕಪ್ಪಮ್ಹಿ, ಅಹೋಸಿಂ ಅಮಿತಞ್ಜಲೋ;

ಸತ್ತರತನಸಮ್ಪನ್ನೋ, ಚಕ್ಕವತ್ತೀ ಮಹಬ್ಬಲೋ.

೧೩. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ಸಾಲಪುಪ್ಫಿಯೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.

ಸಾಲಪುಪ್ಫಿಯತ್ಥೇರಸ್ಸಾಪದಾನಂ ತತಿಯಂ.