೨. ಪಾನಧಿದಾಯಕತ್ಥೇರಅಪದಾನಂ

೬. ‘‘ಆರಞ್ಞಿಕಸ್ಸ ಇಸಿನೋ, ಚಿರರತ್ತತಪಸ್ಸಿನೋ [ಝಾಯಿನೋ, ಮೇತ್ತಚಿತ್ತತಪಸ್ಸಿನೋ (ಸ್ಯಾ.)];

ಬುದ್ಧಸ್ಸ [ಧಮ್ಮಸ್ಸ (ಸ್ಯಾ. ಕ.)] ಭಾವಿತತ್ತಸ್ಸ, ಅದಾಸಿಂ ಪಾನಧಿಂ ಅಹಂ.

೭. ‘‘ತೇನ ಕಮ್ಮೇನ ದ್ವಿಪದಿನ್ದ, ಲೋಕಜೇಟ್ಠ ನರಾಸಭ;

ದಿಬ್ಬಯಾನಂ [ಸಬ್ಬಂ ಯಾನಂ (ಸೀ.)] ಅನುಭೋಮಿ, ಪುಬ್ಬಕಮ್ಮಸ್ಸಿದಂ ಫಲಂ.

೮. ‘‘ಚತುನ್ನವುತೇ ಇತೋ ಕಪ್ಪೇ, ಯಂ ಕಮ್ಮಮಕರಿಂ ತದಾ;

ದುಗ್ಗತಿಂ ನಾಭಿಜಾನಾಮಿ, ಪಾನಧಿಸ್ಸ ಇದಂ ಫಲಂ.

೯. ‘‘ಸತ್ತಸತ್ತತಿತೋ ಕಪ್ಪೇ, ಅಟ್ಠ ಆಸಿಂಸು ಖತ್ತಿಯಾ;

ಸುಯಾನಾ ನಾಮ ನಾಮೇನ, ಚಕ್ಕವತ್ತೀ ಮಹಬ್ಬಲಾ.

೧೦. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ಪಾನಧಿದಾಯಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.

ಪಾನಧಿದಾಯಕತ್ಥೇರಸ್ಸಾಪದಾನಂ ದುತಿಯಂ.