೨೨. ಹತ್ಥಿವಗ್ಗೋ

೧. ಹತ್ಥಿದಾಯಕತ್ಥೇರಅಪದಾನಂ

೧. ‘‘ಸಿದ್ಧತ್ಥಸ್ಸ ಭಗವತೋ, ದ್ವಿಪದಿನ್ದಸ್ಸ ತಾದಿನೋ;

ನಾಗಸೇಟ್ಠೋ ಮಯಾ ದಿನ್ನೋ, ಈಸಾದನ್ತೋ ಉರೂಳ್ಹವಾ.

೨. ‘‘ಉತ್ತಮತ್ಥಂ ಅನುಭೋಮಿ, ಸನ್ತಿಪದಮನುತ್ತರಂ;

ನಾಗದಾನಂ [ಅಗ್ಗದಾನಂ (ಸೀ. ಕ.)] ಮಯಾ ದಿನ್ನಂ, ಸಬ್ಬಲೋಕಹಿತೇಸಿನೋ.

೩. ‘‘ಚತುನ್ನವುತಿತೋ ಕಪ್ಪೇ, ಯಂ ನಾಗ [ದಾನ (ಸೀ. ಕ.)] ಮದದಿಂ ತದಾ;

ದುಗ್ಗತಿಂ ನಾಭಿಜಾನಾಮಿ, ನಾಗದಾನಸ್ಸಿದಂ ಫಲಂ.

೪. ‘‘ಅಟ್ಠಸತ್ತತಿಕಪ್ಪಮ್ಹಿ, ಸೋಳಸಾಸಿಂಸು ಖತ್ತಿಯಾ;

ಸಮನ್ತಪಾಸಾದಿಕಾ ನಾಮ, ಚಕ್ಕವತ್ತೀ ಮಹಬ್ಬಲಾ.

೫. ‘‘ಪಟಿಸಮ್ಭಿದಾ ಚತಸ್ಸೋ, ವಿಮೋಕ್ಖಾಪಿ ಚ ಅಟ್ಠಿಮೇ;

ಛಳಭಿಞ್ಞಾ ಸಚ್ಛಿಕತಾ, ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ಹತ್ಥಿದಾಯಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.

ಹತ್ಥಿದಾಯಕತ್ಥೇರಸ್ಸಾಪದಾನಂ ಪಠಮಂ.

೨. ಪಾನಧಿದಾಯಕತ್ಥೇರಅಪದಾನಂ

೬. ‘‘ಆರಞ್ಞಿಕಸ್ಸ ಇಸಿನೋ, ಚಿರರತ್ತತಪಸ್ಸಿನೋ [ಝಾಯಿನೋ, ಮೇತ್ತಚಿತ್ತತಪಸ್ಸಿನೋ (ಸ್ಯಾ.)];

ಬುದ್ಧಸ್ಸ [ಧಮ್ಮಸ್ಸ (ಸ್ಯಾ. ಕ.)] ಭಾವಿತತ್ತಸ್ಸ, ಅದಾಸಿಂ ಪಾನಧಿಂ ಅಹಂ.

೭. ‘‘ತೇನ ಕಮ್ಮೇನ ದ್ವಿಪದಿನ್ದ, ಲೋಕಜೇಟ್ಠ ನರಾಸಭ;

ದಿಬ್ಬಯಾನಂ [ಸಬ್ಬಂ ಯಾನಂ (ಸೀ.)] ಅನುಭೋಮಿ, ಪುಬ್ಬಕಮ್ಮಸ್ಸಿದಂ ಫಲಂ.

೮. ‘‘ಚತುನ್ನವುತೇ ಇತೋ ಕಪ್ಪೇ, ಯಂ ಕಮ್ಮಮಕರಿಂ ತದಾ;

ದುಗ್ಗತಿಂ ನಾಭಿಜಾನಾಮಿ, ಪಾನಧಿಸ್ಸ ಇದಂ ಫಲಂ.

೯. ‘‘ಸತ್ತಸತ್ತತಿತೋ ಕಪ್ಪೇ, ಅಟ್ಠ ಆಸಿಂಸು ಖತ್ತಿಯಾ;

ಸುಯಾನಾ ನಾಮ ನಾಮೇನ, ಚಕ್ಕವತ್ತೀ ಮಹಬ್ಬಲಾ.

೧೦. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ಪಾನಧಿದಾಯಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.

ಪಾನಧಿದಾಯಕತ್ಥೇರಸ್ಸಾಪದಾನಂ ದುತಿಯಂ.

೩. ಸಚ್ಚಸಞ್ಞಕತ್ಥೇರಅಪದಾನಂ

೧೧. ‘‘ವೇಸ್ಸಭೂ ತಮ್ಹಿ ಸಮಯೇ, ಭಿಕ್ಖುಸಙ್ಘಪುರಕ್ಖತೋ;

ದೇಸೇತಿ ಅರಿಯಸಚ್ಚಾನಿ, ನಿಬ್ಬಾಪೇನ್ತೋ ಮಹಾಜನಂ.

೧೨. ‘‘ಪರಮಕಾರುಞ್ಞಪತ್ತೋಮ್ಹಿ, ಸಮಿತಿಂ ಅಗಮಾಸಹಂ;

ಸೋಹಂ ನಿಸಿನ್ನಕೋ ಸನ್ತೋ, ಧಮ್ಮಮಸ್ಸೋಸಿ ಸತ್ಥುನೋ.

೧೩. ‘‘ತಸ್ಸಾಹಂ ಧಮ್ಮಂ ಸುತ್ವಾನ, ದೇವಲೋಕಂ ಅಗಚ್ಛಹಂ;

ತಿಂಸಕಪ್ಪಾನಿ ದೇವೇಸು, ಅವಸಿಂ ತತ್ಥಹಂ ಪುರೇ.

೧೪. ‘‘ಏಕತ್ತಿಂಸೇ ಇತೋ ಕಪ್ಪೇ, ಯಂ ಸಞ್ಞಮಲಭಿಂ ತದಾ;

ದುಗ್ಗತಿಂ ನಾಭಿಜಾನಾಮಿ, ಸಚ್ಚಸಞ್ಞಾಯಿದಂ ಫಲಂ.

೧೫. ‘‘ಛಬ್ಬೀಸಮ್ಹಿ ಇತೋ ಕಪ್ಪೇ, ಏಕೋ ಆಸಿಂ ಜನಾಧಿಪೋ;

ಏಕಫುಸಿತನಾಮೇನ, ಚಕ್ಕವತ್ತೀ ಮಹಬ್ಬಲೋ.

೧೬. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ಸಚ್ಚಸಞ್ಞಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.

ಸಚ್ಚಸಞ್ಞಕತ್ಥೇರಸ್ಸಾಪದಾನಂ ತತಿಯಂ.

೪. ಏಕಸಞ್ಞಕತ್ಥೇರಅಪದಾನಂ

೧೭. ‘‘ದುಮಗ್ಗೇ ಪಂಸುಕೂಲಿಕಂ [ಪಂಸುಕೂಲಕಂ (?)], ಲಗ್ಗಂ ದಿಸ್ವಾನ ಸತ್ಥುನೋ;

ಅಞ್ಜಲಿಂ ಪಗ್ಗಹೇತ್ವಾನ, ಪಂಸುಕೂಲಂ ಅವನ್ದಹಂ.

೧೮. ‘‘ಏಕತ್ತಿಂಸೇ ಇತೋ ಕಪ್ಪೇ, ಯಂ ಸಞ್ಞಮಲಭಿಂ ತದಾ;

ದುಗ್ಗತಿಂ ನಾಭಿಜಾನಾಮಿ, ಬುದ್ಧಪೂಜಾಯಿದಂ ಫಲಂ.

೧೯. ‘‘ಪಞ್ಚವೀಸೇ ಇತೋ ಕಪ್ಪೇ, ಏಕೋ ಆಸಿಂ ಜನಾಧಿಪೋ;

ಅಮಿತಾಭೋತಿ ನಾಮೇನ, ಚಕ್ಕವತ್ತೀ ಮಹಬ್ಬಲೋ.

೨೦. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ಏಕಸಞ್ಞಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.

ಏಕಸಞ್ಞಕತ್ಥೇರಸ್ಸಾಪದಾನಂ ಚತುತ್ಥಂ.

೫. ರಂಸಿಸಞ್ಞಕತ್ಥೇರಅಪದಾನಂ

೨೧. ‘‘ಉದೇನ್ತಂ ಸತರಂಸಿಂವ, ಪೀತರಂಸಿಂವ [ಸಿತರಂಸಿಂ ವ (ಸೀ. ಸ್ಯಾ.)] ಭಾಣುಮಂ;

ಬ್ಯಗ್ಘೂಸಭಂವ ಪವರಂ, ಸುಜಾತಂ ಪಬ್ಬತನ್ತರೇ.

೨೨. ‘‘ಬುದ್ಧಸ್ಸ ಆನುಭಾವೋ ಸೋ, ಜಲತೇ ಪಬ್ಬತನ್ತರೇ;

ರಂಸೇ [ರಂಸ್ಯಾ (?)] ಚಿತ್ತಂ ಪಸಾದೇತ್ವಾ, ಕಪ್ಪಂ ಸಗ್ಗಮ್ಹಿ ಮೋದಹಂ.

೨೩. ‘‘ಅವಸೇಸೇಸು ಕಪ್ಪೇಸು, ಕುಸಲಂ ಚರಿತಂ ಮಯಾ;

ತೇನ ಚಿತ್ತಪ್ಪಸಾದೇನ, ಬುದ್ಧಾನುಸ್ಸತಿಯಾಪಿ ಚ.

೨೪. ‘‘ತಿಂಸಕಪ್ಪಸಹಸ್ಸೇತೋ, ಯಂ ಸಞ್ಞಮಲಭಿಂ ತದಾ;

ದುಗ್ಗತಿಂ ನಾಭಿಜಾನಾಮಿ, ಬುದ್ಧಸಞ್ಞಾಯಿದಂ ಫಲಂ.

೨೫. ‘‘ಸತ್ತಪಞ್ಞಾಸಕಪ್ಪಮ್ಹಿ, ಏಕೋ ಆಸಿಂ ಜನಾಧಿಪೋ;

ಸುಜಾತೋ ನಾಮ ನಾಮೇನ, ಚಕ್ಕವತ್ತೀ ಮಹಬ್ಬಲೋ.

೨೬. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ರಂಸಿಸಞ್ಞಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.

ರಂಸಿಸಞ್ಞಕತ್ಥೇರಸ್ಸಾಪದಾನಂ ಪಞ್ಚಮಂ.

೬. ಸನ್ಧಿತತ್ಥೇರಅಪದಾನಂ

೨೭. ‘‘ಅಸ್ಸತ್ಥೇ ಹರಿತೋಭಾಸೇ, ಸಂವಿರೂಳ್ಹಮ್ಹಿ ಪಾದಪೇ;

ಏಕಂ ಬುದ್ಧಗತಂ ಸಞ್ಞಂ, ಅಲಭಿಂಹಂ [ಅಲಭಿಸ್ಸಂ (ಸೀ.)] ಪತಿಸ್ಸತೋ.

೨೮. ‘‘ಏಕತ್ತಿಂಸೇ ಇತೋ ಕಪ್ಪೇ, ಯಂ ಸಞ್ಞಮಲಭಿಂ ತದಾ;

ತಸ್ಸಾ ಸಞ್ಞಾಯ ವಾಹಸಾ, ಪತ್ತೋ ಮೇ ಆಸವಕ್ಖಯೋ.

೨೯. ‘‘ಇತೋ ತೇರಸಕಪ್ಪಮ್ಹಿ, ಧನಿಟ್ಠೋ ನಾಮ ಖತ್ತಿಯೋ;

ಸತ್ತರತನಸಮ್ಪನ್ನೋ, ಚಕ್ಕವತ್ತೀ ಮಹಬ್ಬಲೋ.

೩೦. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ಸನ್ಧಿತೋ [ಸಣ್ಠಿತೋ (ಸೀ.)] ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.

ಸನ್ಧಿತತ್ಥೇರಸ್ಸಾಪದಾನಂ ಛಟ್ಠಂ.

೭. ತಾಲವಣ್ಟದಾಯಕತ್ಥೇರಅಪದಾನಂ

೩೧. ‘‘ತಾಲವಣ್ಟಂ ಮಯಾ ದಿನ್ನಂ, ತಿಸ್ಸಸ್ಸಾದಿಚ್ಚಬನ್ಧುನೋ;

ಗಿಮ್ಹನಿಬ್ಬಾಪನತ್ಥಾಯ, ಪರಿಳಾಹೋಪಸನ್ತಿಯಾ.

೩೨. ‘‘ಸನ್ನಿಬ್ಬಾಪೇಮಿ ರಾಗಗ್ಗಿಂ, ದೋಸಗ್ಗಿಞ್ಚ ತದುತ್ತರಿಂ;

ನಿಬ್ಬಾಪೇಮಿ ಚ ಮೋಹಗ್ಗಿಂ, ತಾಲವಣ್ಟಸ್ಸಿದಂ ಫಲಂ.

೩೩. ‘‘ಕಿಲೇಸಾ ಝಾಪಿತಾ ಮಯ್ಹಂ, ಭವಾ ಸಬ್ಬೇ ಸಮೂಹತಾ;

ಧಾರೇಮಿ ಅನ್ತಿಮಂ ದೇಹಂ, ಸಮ್ಮಾಸಮ್ಬುದ್ಧಸಾಸನೇ.

೩೪. ‘‘ದ್ವೇನವುತೇ ಇತೋ ಕಪ್ಪೇ, ಯಂ ಕಮ್ಮಮಕರಿಂ ತದಾ;

ದುಗ್ಗತಿಂ ನಾಭಿಜಾನಾಮಿ, ತಾಲವಣ್ಟಸ್ಸಿದಂ ಫಲಂ.

೩೫. ‘‘ತೇಸಟ್ಠಿಮ್ಹಿ ಇತೋ ಕಪ್ಪೇ, ಮಹಾನಾಮಸನಾಮಕೋ;

ಸತ್ತರತನಸಮ್ಪನ್ನೋ, ಚಕ್ಕವತ್ತೀ ಮಹಬ್ಬಲೋ.

೩೬. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ತಾಲವಣ್ಟದಾಯಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.

ತಾಲವಣ್ಟದಾಯಕತ್ಥೇರಸ್ಸಾಪದಾನಂ ಸತ್ತಮಂ.

೮. ಅಕ್ಕನ್ತಸಞ್ಞಕತ್ಥೇರಅಪದಾನಂ

೩೭. ‘‘ಕುಸಾಟಕಂ ಗಹೇತ್ವಾನ, ಉಪಜ್ಝಾಯಸ್ಸಹಂ ಪುರೇ;

ಮನ್ತಞ್ಚ ಅನುಸಿಕ್ಖಾಮಿ, ಗನ್ಥಾದೋಸಸ್ಸ [ಕಣ್ಡಭೇದಸ್ಸ (ಸೀ.), ಗಣ್ಡಭೇದಸ್ಸ (ಸ್ಯಾ.)] ಪತ್ತಿಯಾ.

೩೮. ‘‘ಅದ್ದಸಂ ವಿರಜಂ ಬುದ್ಧಂ, ಆಹುತೀನಂ ಪಟಿಗ್ಗಹಂ;

ಉಸಭಂ ಪವರಂ ಅಗ್ಗಂ, ತಿಸ್ಸಂ ಬುದ್ಧಂ ಗಣುತ್ತಮಂ [ಗಜುತ್ತಮಂ (ಸ್ಯಾ.)].

೩೯. ‘‘ಕುಸಾಟಕಂ ಪತ್ಥರಿತಂ, ಅಕ್ಕಮನ್ತಂ ನರುತ್ತಮಂ;

ಸಮುಗ್ಗತಂ ಮಹಾವೀರಂ, ಲೋಕಜೇಟ್ಠಂ ನರಾಸಭಂ.

೪೦. ‘‘ದಿಸ್ವಾ ತಂ ಲೋಕಪಜ್ಜೋತಂ, ವಿಮಲಂ ಚನ್ದಸನ್ನಿಭಂ;

ಅವನ್ದಿಂ ಸತ್ಥುನೋ ಪಾದೇ, ವಿಪ್ಪಸನ್ನೇನ ಚೇತಸಾ.

೪೧. ‘‘ಚತುನ್ನವುತಿತೋ ಕಪ್ಪೇ, ಯಂ ಅದಾಸಿಂ ಕುಸಾಟಕಂ;

ದುಗ್ಗತಿಂ ನಾಭಿಜಾನಾಮಿ, ಕುಸಾಟಕಸ್ಸಿದಂ ಫಲಂ.

೪೨. ‘‘ಸತ್ತತಿಂಸೇ ಇತೋ ಕಪ್ಪೇ, ಏಕೋ ಆಸಿಂ ಜನಾಧಿಪೋ;

ಸುನನ್ದೋ ನಾಮ ನಾಮೇನ, ಚಕ್ಕವತ್ತೀ ಮಹಬ್ಬಲೋ.

೪೩. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ಅಕ್ಕನ್ತಸಞ್ಞಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ;

ಅಕ್ಕನ್ತಸಞ್ಞಕತ್ಥೇರಸ್ಸಾಪದಾನಂ ಅಟ್ಠಮಂ.

೯. ಸಪ್ಪಿದಾಯಕತ್ಥೇರಅಪದಾನಂ

೪೪. ‘‘ನಿಸಿನ್ನೋ ಪಾಸಾದವರೇ, ನಾರೀಗಣಪುರಕ್ಖತೋ;

ಬ್ಯಾಧಿತಂ ಸಮಣಂ ದಿಸ್ವಾ, ಅಭಿನಾಮೇಸಹಂ ಘರಂ.

೪೫. ‘‘ಉಪವಿಟ್ಠಂ ಮಹಾವೀರಂ, ದೇವದೇವಂ ನರಾಸಭಂ;

ಸಪ್ಪಿತೇಲಂ ಮಯಾ ದಿನ್ನಂ, ಸಿದ್ಧತ್ಥಸ್ಸ ಮಹೇಸಿನೋ.

೪೬. ‘‘ಪಸ್ಸದ್ಧದರಥಂ ದಿಸ್ವಾ, ವಿಪ್ಪಸನ್ನಮುಖಿನ್ದ್ರಿಯಂ;

ವನ್ದಿತ್ವಾ ಸತ್ಥುನೋ ಪಾದೇ, ಅನುಸಂಸಾವಯಿಂ ಪುರೇ.

೪೭. ‘‘ದಿಸ್ವಾ ಮಂ ಸುಪ್ಪಸನ್ನತ್ತಂ [ಸುಪ್ಪಸನ್ನನ್ತಂ (ಸ್ಯಾ. ಕ.) ಸುಪ್ಪಸನ್ನಚಿತ್ತನ್ತಿ ಅತ್ಥೋ], ಇದ್ಧಿಯಾ ಪಾರಮಿಙ್ಗತೋ;

ನಭಂ ಅಬ್ಭುಗ್ಗಮೀ ಧೀರೋ, ಹಂಸರಾಜಾವ ಅಮ್ಬರೇ.

೪೮. ‘‘ಚತುನ್ನವುತಿತೋ ಕಪ್ಪೇ, ಯಂ ದಾನಮದದಿಂ ತದಾ;

ದುಗ್ಗತಿಂ ನಾಭಿಜಾನಾಮಿ, ಸಪ್ಪಿತೇಲಸ್ಸಿದಂ ಫಲಂ.

೪೯. ‘‘ಇತೋ ಸತ್ತರಸೇ ಕಪ್ಪೇ, ಜುತಿದೇವ [ದುತಿದೇವ (ಸ್ಯಾ.), ತುತಿದೇವ (ಕ.)] ಸನಾಮಕೋ;

ಸತ್ತರತನಸಮ್ಪನ್ನೋ, ಚಕ್ಕವತ್ತೀ ಮಹಬ್ಬಲೋ.

೫೦. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ಸಪ್ಪಿದಾಯಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.

ಸಪ್ಪಿದಾಯಕತ್ಥೇರಸ್ಸಾಪದಾನಂ ನವಮಂ.

೧೦. ಪಾಪನಿವಾರಿಯತ್ಥೇರಅಪದಾನಂ

೫೧. ‘‘ಪಿಯದಸ್ಸಿಸ್ಸ ಭಗವತೋ, ಚಙ್ಕಮಂ ಸೋಧಿತಂ ಮಯಾ;

ನಳಕೇಹಿ ಪಟಿಚ್ಛನ್ನಂ, ವಾತಾತಪನಿವಾರಣಂ.

೫೨. ‘‘ಪಾಪಂ ವಿವಜ್ಜನತ್ಥಾಯ, ಕುಸಲಸ್ಸುಪಸಮ್ಪದಾ;

ಕಿಲೇಸಾನಂ ಪಹಾನಾಯ, ಪದಹಿಂ ಸತ್ಥು ಸಾಸನೇ.

೫೩. ‘‘ಇತೋ ಏಕಾದಸೇ ಕಪ್ಪೇ, ಅಗ್ಗಿದೇವೋತಿ ವಿಸ್ಸುತೋ;

ಸತ್ತರತನಸಮ್ಪನ್ನೋ, ಚಕ್ಕವತ್ತೀ ಮಹಬ್ಬಲೋ.

೫೪. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ಪಾಪನಿವಾರಿಯೋ [ವಾತಾತಪನಿವಾರಿಯೋ (?)] ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.

ಪಾಪನಿವಾರಿಯತ್ಥೇರಸ್ಸಾಪದಾನಂ ದಸಮಂ.

ಹತ್ಥಿವಗ್ಗೋ ಬಾವೀಸತಿಮೋ.