೧೦. ಪಾಪನಿವಾರಿಯತ್ಥೇರಅಪದಾನಂ

೪೪. ‘‘ತಿಸ್ಸಸ್ಸ ತು ಭಗವತೋ, ದೇವದೇವಸ್ಸ ತಾದಿನೋ;

ಏಕಚ್ಛತ್ತಂ ಮಯಾ ದಿನ್ನಂ, ವಿಪ್ಪಸನ್ನೇನ ಚೇತಸಾ.

೪೫. ‘‘ನಿವುತಂ ಹೋತಿ ಮೇ ಪಾಪಂ, ಕುಸಲಸ್ಸುಪಸಮ್ಪದಾ;

ಆಕಾಸೇ ಛತ್ತಂ ಧಾರೇನ್ತಿ, ಪುಬ್ಬಕಮ್ಮಸ್ಸಿದಂ ಫಲಂ.

೪೬. ‘‘ಚರಿಮಂ ವತ್ತತೇ ಮಯ್ಹಂ, ಭವಾ ಸಬ್ಬೇ ಸಮೂಹತಾ;

ಧಾರೇಮಿ ಅನ್ತಿಮಂ ದೇಹಂ, ಸಮ್ಮಾಸಮ್ಬುದ್ಧಸಾಸನೇ.

೪೭. ‘‘ದ್ವೇನವುತೇ ಇತೋ ಕಪ್ಪೇ, ಯಂ ಛತ್ತಮದದಿಂ ತದಾ;

ದುಗ್ಗತಿಂ ನಾಭಿಜಾನಾಮಿ, ಛತ್ತದಾನಸ್ಸಿದಂ ಫಲಂ.

೪೮. ‘‘ದ್ವೇಸತ್ತತಿಮ್ಹಿತೋ ಕಪ್ಪೇ, ಅಟ್ಠಾಸಿಂಸು ಜನಾಧಿಪಾ;

ಮಹಾನಿದಾನನಾಮೇನ, ರಾಜಾನೋ ಚಕ್ಕವತ್ತಿನೋ.

೪೯. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ಪಾಪನಿವಾರಿಯೋ [ವಾತಾತಪನಿವಾರಿಯೋ (ಸೀ.)] ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ;

ಪಾಪನಿವಾರಿಯತ್ಥೇರಸ್ಸಾಪದಾನಂ ದಸಮಂ.

ಕಣಿಕಾರಪುಪ್ಫಿಯವಗ್ಗೋ ಏಕವೀಸತಿಮೋ.