೮. ಮುಟ್ಠಿಪೂಜಕತ್ಥೇರಅಪದಾನಂ

೪೨. ‘‘ಸುಮೇಧೋ ನಾಮ ಭಗವಾ, ಲೋಕಜೇಟ್ಠೋ ನರಾಸಭೋ;

ಪಚ್ಛಿಮೇ ಅನುಕಮ್ಪಾಯ, ಪಧಾನಂ ಪದಹೀ ಜಿನೋ.

೪೩. ‘‘ತಸ್ಸ ಚಙ್ಕಮಮಾನಸ್ಸ, ದ್ವಿಪದಿನ್ದಸ್ಸ ತಾದಿನೋ;

ಗಿರಿನೇಲಸ್ಸ ಪುಪ್ಫಾನಂ, ಮುಟ್ಠಿಂ ಬುದ್ಧಸ್ಸ ರೋಪಯಿಂ.

೪೪. ‘‘ತೇನ ಚಿತ್ತಪ್ಪಸಾದೇನ, ಸುಕ್ಕಮೂಲೇನ ಚೋದಿತೋ;

ತಿಂಸಕಪ್ಪಸಹಸ್ಸಾನಿ, ದುಗ್ಗತಿಂ ನುಪಪಜ್ಜಹಂ.

೪೫. ‘‘ತೇವೀಸತಿಕಪ್ಪಸತೇ, ಸುನೇಲೋ ನಾಮ ಖತ್ತಿಯೋ;

ಸತ್ತರತನಸಮ್ಪನ್ನೋ, ಏಕೋ ಆಸಿಂ ಮಹಬ್ಬಲೋ.

೪೬. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ಮುಟ್ಠಿಪೂಜಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.

ಮುಟ್ಠಿಪೂಜಕತ್ಥೇರಸ್ಸಾಪದಾನಂ ಅಟ್ಠಮಂ.