೨೦. ತಮಾಲಪುಪ್ಫಿಯವಗ್ಗೋ

೧. ತಮಾಲಪುಪ್ಫಿಯತ್ಥೇರಅಪದಾನಂ

೧. ‘‘ಚುಲ್ಲಾಸೀತಿಸಹಸ್ಸಾನಿ, ಥಮ್ಭಾ ಸೋವಣ್ಣಯಾ ಅಹೂ;

ದೇವಲಟ್ಠಿಪಟಿಭಾಗಂ, ವಿಮಾನಂ ಮೇ ಸುನಿಮ್ಮಿತಂ.

೨. ‘‘ತಮಾಲಪುಪ್ಫಂ ಪಗ್ಗಯ್ಹ, ವಿಪ್ಪಸನ್ನೇನ ಚೇತಸಾ;

ಬುದ್ಧಸ್ಸ ಅಭಿರೋಪಯಿಂ, ಸಿಖಿನೋ ಲೋಕಬನ್ಧುನೋ.

೩. ‘‘ಏಕತ್ತಿಂಸೇ ಇತೋ ಕಪ್ಪೇ, ಯಂ ಕಮ್ಮಮಕರಿಂ ತದಾ;

ದುಗ್ಗತಿಂ ನಾಭಿಜಾನಾಮಿ, ಬುದ್ಧಪೂಜಾಯಿದಂ ಫಲಂ.

೪. ‘‘ಇತೋ ವೀಸತಿಮೇ ಕಪ್ಪೇ, ಚನ್ದತಿತ್ತೋತಿ ಏಕಕೋ;

ಸತ್ತರತನಸಮ್ಪನ್ನೋ, ಚಕ್ಕವತ್ತೀ ಮಹಬ್ಬಲೋ.

೫. ‘‘ಪಟಿಸಮ್ಭಿದಾ ಚತಸ್ಸೋ, ವಿಮೋಕ್ಖಾಪಿ ಚ ಅಟ್ಠಿಮೇ;

ಛಳಭಿಞ್ಞಾ ಸಚ್ಛಿಕತಾ, ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ತಮಾಲಪುಪ್ಫಿಯೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.

ತಮಾಲಪುಪ್ಫಿಯತ್ಥೇರಸ್ಸಾಪದಾನಂ ಪಠಮಂ.

೨. ತಿಣಸನ್ಥಾರಕತ್ಥೇರಅಪದಾನಂ

೬. ‘‘ಯದಾ ವನವಾಸೀ [ಯಂ ದಾಯವಾಸಿಕೋ (ಸೀ.)] ಇಸಿ, ತಿಣಂ ಲಾಯತಿ ಸತ್ಥುನೋ;

ಸಬ್ಬೇ ಪದಕ್ಖಿಣಾವಟ್ಟಾ [ಪದಕ್ಖಿಣಾವತ್ತಾ (ಸೀ. ಸ್ಯಾ.)], ಪಥಬ್ಯಾ [ಪುಥವ್ಯಾ (ಸೀ.)] ನಿಪತಿಂಸು ತೇ.

೭. ‘‘ತಮಹಂ ತಿಣಮಾದಾಯ, ಸನ್ಥರಿಂ ಧರಣುತ್ತಮೇ;

ತೀಣೇವ ತಾಲಪತ್ತಾನಿ, ಆಹರಿತ್ವಾನಹಂ ತದಾ.

೮. ‘‘ತಿಣೇನ ಛದನಂ ಕತ್ವಾ, ಸಿದ್ಧತ್ಥಸ್ಸ ಅದಾಸಹಂ;

ಸತ್ತಾಹಂ ಧಾರಯುಂ ತಸ್ಸ [ತತ್ಥ (ಸ್ಯಾ.)], ದೇವಮಾನುಸಸತ್ಥುನೋ.

೯. ‘‘ಚತುನ್ನವುತಿತೋ ಕಪ್ಪೇ, ಯಂ ತಿಣಂ ಅದದಿಂ ತದಾ;

ದುಗ್ಗತಿಂ ನಾಭಿಜಾನಾಮಿ, ತಿಣದಾನಸ್ಸಿದಂ ಫಲಂ.

೧೦. ‘‘ಪಞ್ಚಸಟ್ಠಿಮ್ಹಿತೋ ಕಪ್ಪೇ, ಚತ್ತಾರೋಸುಂ ಮಹದ್ಧನಾ;

ಸತ್ತರತನಸಮ್ಪನ್ನಾ, ಚಕ್ಕವತ್ತೀ ಮಹಬ್ಬಲಾ.

೧೧. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ತಿಣಸನ್ಥಾರಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.

ತಿಣಸನ್ಥಾರಕತ್ಥೇರಸ್ಸಾಪದಾನಂ ದುತಿಯಂ.

೩. ಖಣ್ಡಪುಲ್ಲಿಯತ್ಥೇರಅಪದಾನಂ

೧೨. ‘‘ಫುಸ್ಸಸ್ಸ ಖೋ ಭಗವತೋ, ಥೂಪೋ ಆಸಿ ಮಹಾವನೇ;

ಕುಞ್ಜರೇಹಿ ತದಾ ಭಿನ್ನೋ, ಪರೂಳ್ಹೋ ಪಾದಪೋ [ಪರೂಳ್ಹಪಾದಪೋ (ಸೀ.), ಸಂರೂಳ್ಹೋ ಪಾದಪೋ (ಸ್ಯಾ.)] ತಹಿಂ.

೧೩. ‘‘ವಿಸಮಞ್ಚ ಸಮಂ ಕತ್ವಾ, ಸುಧಾಪಿಣ್ಡಂ ಅದಾಸಹಂ;

ತಿಲೋಕಗರುನೋ ತಸ್ಸ, ಗುಣೇಹಿ ಪರಿತೋಸಿತೋ [ಪರಿತೋ ಸುತೋ (ಕ.)].

೧೪. ‘‘ದ್ವೇನವುತೇ ಇತೋ ಕಪ್ಪೇ, ಯಂ ಕಮ್ಮಮಕರಿಂ ತದಾ;

ದುಗ್ಗತಿಂ ನಾಭಿಜಾನಾಮಿ, ಸುಧಾಪಿಣ್ಡಸ್ಸಿದಂ ಫಲಂ.

೧೫. ‘‘ಸತ್ತಸತ್ತತಿಕಪ್ಪಮ್ಹಿ, ಜಿತಸೇನಾಸುಂ ಸೋಳಸ;

ಸತ್ತರತನಸಮ್ಪನ್ನಾ, ಚಕ್ಕವತ್ತೀ ಮಹಬ್ಬಲಾ.

೧೬. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ಖಣ್ಡಫುಲ್ಲಿಯೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.

ಖಣ್ಡಪುಲ್ಲಿಯತ್ಥೇರಸ್ಸಾಪದಾನಂ ತತಿಯಂ.

೪. ಅಸೋಕಪೂಜಕತ್ಥೇರಅಪದಾನಂ

೧೭. ‘‘ತಿವರಾಯಂ [ತಿಪುರಾಯಂ (ಸ್ಯಾ.)] ಪುರೇ ರಮ್ಮೇ, ರಾಜುಯ್ಯಾನಂ ಅಹು ತದಾ;

ಉಯ್ಯಾನಪಾಲೋ ತತ್ಥಾಸಿಂ, ರಞ್ಞೋ ಬದ್ಧಚರೋ ಅಹಂ.

೧೮. ‘‘ಪದುಮೋ ನಾಮ ನಾಮೇನ, ಸಯಮ್ಭೂ ಸಪ್ಪಭೋ ಅಹು;

ನಿಸಿನ್ನಂ [ನಿಸಿನ್ನೋ (ಕ.)] ಪುಣ್ಡರೀಕಮ್ಹಿ, ಛಾಯಾ ನ ಜಹಿ ತಂ ಮುನಿಂ.

೧೯. ‘‘ಅಸೋಕಂ ಪುಪ್ಫಿತಂ ದಿಸ್ವಾ, ಪಿಣ್ಡಿಭಾರಂ ಸುದಸ್ಸನಂ;

ಬುದ್ಧಸ್ಸ ಅಭಿರೋಪೇಸಿಂ, ಜಲಜುತ್ತಮನಾಮಿನೋ.

೨೦. ‘‘ಚತುನ್ನವುತಿತೋ ಕಪ್ಪೇ, ಯಂ ಪುಪ್ಫಮಭಿರೋಪಯಿಂ;

ದುಗ್ಗತಿಂ ನಾಭಿಜಾನಾಮಿ, ಬುದ್ಧಪೂಜಾಯಿದಂ ಫಲಂ.

೨೧. ‘‘ಸತ್ತತಿಂಸಮ್ಹಿತೋ ಕಪ್ಪೇ, ಸೋಳಸ ಅರಣಞ್ಜಹಾ [ಅರುಣಞ್ಜಹಾ (ಸೀ.)];

ಸತ್ತರತನಸಮ್ಪನ್ನಾ, ಚಕ್ಕವತ್ತೀ ಮಹಬ್ಬಲಾ.

೨೨. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ಅಸೋಕಪೂಜಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.

ಅಸೋಕಪೂಜಕತ್ಥೇರಸ್ಸಾಪದಾನಂ ಚತುತ್ಥಂ.

೫. ಅಙ್ಕೋಲಕತ್ಥೇರಅಪದಾನಂ

೨೩. ‘‘ಅಙ್ಕೋಲಂ ಪುಪ್ಫಿತಂ ದಿಸ್ವಾ, ಮಾಲಾವರಂ ಸಕೋಸಕಂ [ಸಮೋಗಧಂ (ಸ್ಯಾ.)];

ಓಚಿನಿತ್ವಾನ ತಂ ಪುಪ್ಫಂ, ಅಗಮಂ ಬುದ್ಧಸನ್ತಿಕಂ.

೨೪. ‘‘ಸಿದ್ಧತ್ಥೋ ತಮ್ಹಿ ಸಮಯೇ, ಪತಿಲೀನೋ ಮಹಾಮುನಿ;

ಮುಹುತ್ತಂ ಪಟಿಮಾನೇತ್ವಾ, ಗುಹಾಯಂ ಪುಪ್ಫಮೋಕಿರಿಂ.

೨೫. ‘‘ಚತುನ್ನವುತಿತೋ ಕಪ್ಪೇ, ಯಂ ಪುಪ್ಫಮಭಿಪೂಜಯಿಂ;

ದುಗ್ಗತಿಂ ನಾಭಿಜಾನಾಮಿ, ಪುಪ್ಫದಾನಸ್ಸಿದಂ [ಬುದ್ಧಪೂಜಾಯಿದಂ (ಸೀ. ಸ್ಯಾ.)] ಫಲಂ.

೨೬. ‘‘ಛತ್ತಿಂಸಮ್ಹಿ ಇತೋ ಕಪ್ಪೇ, ಆಸೇಕೋ ದೇವಗಜ್ಜಿತೋ;

ಸತ್ತರತನಸಮ್ಪನ್ನೋ, ಚಕ್ಕವತ್ತೀ ಮಹಬ್ಬಲೋ.

೨೭. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ಅಙ್ಕೋಲಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.

ಅಙ್ಕೋಲಕತ್ಥೇರಸ್ಸಾಪದಾನಂ ಪಞ್ಚಮಂ.

೬. ಕಿಸಲಯಪೂಜಕತ್ಥೇರಅಪದಾನಂ

೨೮. ‘‘ನಗರೇ ದ್ವಾರವತಿಯಾ, ಮಾಲಾವಚ್ಛೋ ಮಮಂ ಅಹು;

ಉದಪಾನೋ ಚ ತತ್ಥೇವ, ಪಾದಪಾನಂ ವಿರೋಹನೋ.

೨೯. ‘‘ಸಬಲೇನ ಉಪತ್ಥದ್ಧೋ, ಸಿದ್ಧತ್ಥೋ ಅಪರಾಜಿತೋ;

ಮಮಾನುಕಮ್ಪಮಾನೋ ಸೋ, ಗಚ್ಛತೇ ಅನಿಲಞ್ಜಸೇ.

೩೦. ‘‘ಅಞ್ಞಂ ಕಿಞ್ಚಿ ನ ಪಸ್ಸಾಮಿ, ಪೂಜಾಯೋಗ್ಗಂ ಮಹೇಸಿನೋ;

ಅಸೋಕಂ ಪಲ್ಲವಂ ದಿಸ್ವಾ, ಆಕಾಸೇ ಉಕ್ಖಿಪಿಂ ಅಹಂ.

೩೧. ‘‘ಬುದ್ಧಸ್ಸ ತೇ ಕಿಸಲಯಾ, ಗಚ್ಛತೋ ಯನ್ತಿ ಪಚ್ಛತೋ;

ತಾಹಂ ದಿಸ್ವಾನ ಸಂವಿಜಿಂ [ಸೋಹಂ ದಿಸ್ವಾನ ತಂ ಇದ್ಧಿಂ (ಸೀ. ಸ್ಯಾ.)], ಅಹೋ ಬುದ್ಧಸ್ಸುಳಾರತಾ.

೩೨. ‘‘ಚತುನ್ನವುತಿತೋ ಕಪ್ಪೇ, ಪಲ್ಲವಂ ಅಭಿರೋಪಯಿಂ;

ದುಗ್ಗತಿಂ ನಾಭಿಜಾನಾಮಿ, ಬುದ್ಧಪೂಜಾಯಿದಂ ಫಲಂ.

೩೩. ‘‘ಸತ್ತತಿಂಸೇ [ಸತ್ತವೀಸೇ (ಸೀ. ಸ್ಯಾ.)] ಇತೋ ಕಪ್ಪೇ, ಏಕೋ ಏಕಿಸ್ಸರೋ ಅಹು;

ಸತ್ತರತನಸಮ್ಪನ್ನೋ, ಚಕ್ಕವತ್ತೀ ಮಹಬ್ಬಲೋ.

೩೪. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ಕಿಸಲಯಪೂಜಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.

ಕಿಸಲಯಪೂಜಕತ್ಥೇರಸ್ಸಾಪದಾನಂ ಛಟ್ಠಂ.

೭. ತಿನ್ದುಕದಾಯಕತ್ಥೇರಅಪದಾನಂ

೩೫. ‘‘ಗಿರಿದುಗ್ಗಚರೋ ಆಸಿಂ, ಮಕ್ಕಟೋ ಥಾಮವೇಗಿಕೋ;

ಫಲಿನಂ ತಿನ್ದುಕಂ ದಿಸ್ವಾ, ಬುದ್ಧಸೇಟ್ಠಂ ಅನುಸ್ಸರಿಂ.

೩೬. ‘‘ನಿಕ್ಖಮಿತ್ವಾ ಕತಿಪಾಹಂ, ವಿಚಿನಿಂ ಲೋಕನಾಯಕಂ;

ಪಸನ್ನಚಿತ್ತೋ ಸುಮನೋ, ಸಿದ್ಧತ್ಥಂ ತಿಭವನ್ತಗುಂ.

೩೭. ‘‘ಮಮ ಸಙ್ಕಪ್ಪಮಞ್ಞಾಯ, ಸತ್ಥಾ ಲೋಕೇ ಅನುತ್ತರೋ;

ಖೀಣಾಸವಸಹಸ್ಸೇಹಿ, ಆಗಚ್ಛಿ ಮಮ ಸನ್ತಿಕಂ.

೩೮. ‘‘ಪಾಮೋಜ್ಜಂ ಜನಯಿತ್ವಾನ, ಫಲಹತ್ಥೋ ಉಪಾಗಮಿಂ;

ಪಟಿಗ್ಗಹೇಸಿ ಭಗವಾ, ಸಬ್ಬಞ್ಞೂ ವದತಂ ವರೋ.

೩೯. ‘‘ಚತುನ್ನವುತಿತೋ ಕಪ್ಪೇ, ಯಂ ಫಲಂ ಅದದಿಂ ತದಾ;

ದುಗ್ಗತಿಂ ನಾಭಿಜಾನಾಮಿ, ಫಲದಾನಸ್ಸಿದಂ ಫಲಂ.

೪೦. ‘‘ಸತ್ತಪಞ್ಞಾಸಕಪ್ಪಮ್ಹಿ, ಉಪನನ್ದಸನಾಮಕೋ;

ಸತ್ತರತನಸಮ್ಪನ್ನೋ, ಚಕ್ಕವತ್ತೀ ಮಹಬ್ಬಲೋ.

೪೧. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ತಿನ್ದುಕದಾಯಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.

ತಿನ್ದುಕದಾಯಕತ್ಥೇರಸ್ಸಾಪದಾನಂ ಸತ್ತಮಂ.

೮. ಮುಟ್ಠಿಪೂಜಕತ್ಥೇರಅಪದಾನಂ

೪೨. ‘‘ಸುಮೇಧೋ ನಾಮ ಭಗವಾ, ಲೋಕಜೇಟ್ಠೋ ನರಾಸಭೋ;

ಪಚ್ಛಿಮೇ ಅನುಕಮ್ಪಾಯ, ಪಧಾನಂ ಪದಹೀ ಜಿನೋ.

೪೩. ‘‘ತಸ್ಸ ಚಙ್ಕಮಮಾನಸ್ಸ, ದ್ವಿಪದಿನ್ದಸ್ಸ ತಾದಿನೋ;

ಗಿರಿನೇಲಸ್ಸ ಪುಪ್ಫಾನಂ, ಮುಟ್ಠಿಂ ಬುದ್ಧಸ್ಸ ರೋಪಯಿಂ.

೪೪. ‘‘ತೇನ ಚಿತ್ತಪ್ಪಸಾದೇನ, ಸುಕ್ಕಮೂಲೇನ ಚೋದಿತೋ;

ತಿಂಸಕಪ್ಪಸಹಸ್ಸಾನಿ, ದುಗ್ಗತಿಂ ನುಪಪಜ್ಜಹಂ.

೪೫. ‘‘ತೇವೀಸತಿಕಪ್ಪಸತೇ, ಸುನೇಲೋ ನಾಮ ಖತ್ತಿಯೋ;

ಸತ್ತರತನಸಮ್ಪನ್ನೋ, ಏಕೋ ಆಸಿಂ ಮಹಬ್ಬಲೋ.

೪೬. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ಮುಟ್ಠಿಪೂಜಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.

ಮುಟ್ಠಿಪೂಜಕತ್ಥೇರಸ್ಸಾಪದಾನಂ ಅಟ್ಠಮಂ.

೯. ಕಿಂಕಣಿಕಪುಪ್ಫಿಯತ್ಥೇರಅಪದಾನಂ

೪೭. ‘‘ಸುಮಙ್ಗಲೋತಿ ನಾಮೇನ, ಸಯಮ್ಭೂ ಅಪರಾಜಿತೋ;

ಪವನಾ ನಿಕ್ಖಮಿತ್ವಾನ, ನಗರಂ ಪಾವಿಸೀ ಜಿನೋ.

೪೮. ‘‘ಪಿಣ್ಡಚಾರಂ ಚರಿತ್ವಾನ, ನಿಕ್ಖಮ್ಮ ನಗರಾ ಮುನಿ;

ಕತಕಿಚ್ಚೋವ ಸಮ್ಬುದ್ಧೋ, ಸೋ ವಸೀ ವನಮನ್ತರೇ.

೪೯. ‘‘ಕಿಂಕಣಿಪುಪ್ಫಂ ಪಗ್ಗಯ್ಹ, ಬುದ್ಧಸ್ಸ ಅಭಿರೋಪಯಿಂ;

ಪಸನ್ನಚಿತ್ತೋ ಸುಮನೋ, ಸಯಮ್ಭುಸ್ಸ ಮಹೇಸಿನೋ.

೫೦. ‘‘ಚತುನ್ನವುತಿತೋ ಕಪ್ಪೇ, ಯಂ ಪುಪ್ಫಮಭಿರೋಪಯಿಂ;

ದುಗ್ಗತಿಂ ನಾಭಿಜಾನಾಮಿ, ಬುದ್ಧಪೂಜಾಯಿದಂ ಫಲಂ.

೫೧. ‘‘ಛಳಾಸೀತಿಮ್ಹಿತೋ ಕಪ್ಪೇ, ಅಪಿಲಾಸಿಸನಾಮಕೋ;

ಸತ್ತರತನಸಮ್ಪನ್ನೋ, ಚಕ್ಕವತ್ತೀ ಮಹಬ್ಬಲೋ.

೫೨. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ಕಿಂಕಣಿಕಪುಪ್ಫಿಯೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.

ಕಿಂಕಣಿಕಪುಪ್ಫಿಯತ್ಥೇರಸ್ಸಾಪದಾನಂ ನವಮಂ.

೧೦. ಯೂಥಿಕಪುಪ್ಫಿಯತ್ಥೇರಅಪದಾನಂ

೫೩. ‘‘ಪದುಮುತ್ತರೋ ನಾಮ ಜಿನೋ, ಆಹುತೀನಂ ಪಟಿಗ್ಗಹೋ;

ಪವನಾ ನಿಕ್ಖಮಿತ್ವಾನ, ವಿಹಾರಂ ಯಾತಿ ಚಕ್ಖುಮಾ.

೫೪. ‘‘ಉಭೋ ಹತ್ಥೇಹಿ ಪಗ್ಗಯ್ಹ, ಯೂಥಿಕಂ ಪುಪ್ಫಮುತ್ತಮಂ;

ಬುದ್ಧಸ್ಸ ಅಭಿರೋಪಯಿಂ, ಮೇತ್ತಚಿತ್ತಸ್ಸ ತಾದಿನೋ.

೫೫. ‘‘ತೇನ ಚಿತ್ತಪ್ಪಸಾದೇನ, ಅನುಭೋತ್ವಾನ ಸಮ್ಪದಾ;

ಕಪ್ಪಾನಂ ಸತಸಹಸ್ಸಂ, ದುಗ್ಗತಿಂ ನುಪಪಜ್ಜಹಂ.

೫೬. ‘‘ಇತೋ ಪಞ್ಞಾಸಕಪ್ಪೇಸು, ಏಕೋ ಆಸಿಂ ಜನಾಧಿಪೋ;

ಸಮಿತ್ತನನ್ದನೋ ನಾಮ, ಚಕ್ಕವತ್ತೀ ಮಹಬ್ಬಲೋ.

೫೭. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ಯೂಥಿಕಪುಪ್ಫಿಯೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ;

ಯೂಥಿಕಪುಪ್ಫಿಯತ್ಥೇರಸ್ಸಾಪದಾನಂ ದಸಮಂ.

ತಮಾಲಪುಪ್ಫಿಯವಗ್ಗೋ ವೀಸತಿಮೋ.

ತಸ್ಸುದ್ದಾನಂ –

ತಮಾಲತಿಣಸನ್ಥಾರೋ, ಖಣ್ಡಫುಲ್ಲಿ ಅಸೋಕಿಯೋ;

ಅಙ್ಕೋಲಕೀ ಕಿಸಲಯೋ, ತಿನ್ದುಕೋ ನೇಲಪುಪ್ಫಿಯೋ;

ಕಿಂಕಣಿಕೋ ಯೂಥಿಕೋ ಚ, ಗಾಥಾ ಪಞ್ಞಾಸ ಅಟ್ಠ ಚಾತಿ.

ಅಥ ವಗ್ಗುದ್ದಾನಂ –

ಭಿಕ್ಖಾದಾಯೀ ಪರಿವಾರೋ, ಸೇರೇಯ್ಯೋ ಸೋಭಿತೋ ತಥಾ;

ಛತ್ತಞ್ಚ ಬನ್ಧುಜೀವೀ ಚ, ಸುಪಾರಿಚರಿಯೋಪಿ ಚ.

ಕುಮುದೋ ಕುಟಜೋ ಚೇವ, ತಮಾಲಿ ದಸಮೋ ಕತೋ;

ಛಸತಾನಿ ಚ ಗಾಥಾನಿ, ಛಸಟ್ಠಿ ಚ ತತುತ್ತರಿ.

ಭಿಕ್ಖಾವಗ್ಗದಸಕಂ.