೧. ಆಲಮ್ಬಣದಾಯಕತ್ಥೇರಅಪದಾನಂ

೧. ‘‘ಅತ್ಥದಸ್ಸಿಸ್ಸ ಭಗವತೋ, ಲೋಕಜೇಟ್ಠಸ್ಸ ತಾದಿನೋ;

ಆಲಮ್ಬಣಂ ಮಯಾ ದಿನ್ನಂ, ದ್ವಿಪದಿನ್ದಸ್ಸ ತಾದಿನೋ.

೨. ‘‘ಧರಣಿಂ ಪಟಿಪಜ್ಜಾಮಿ, ವಿಪುಲಂ ಸಾಗರಪ್ಪರಂ;

ಪಾಣೇಸು ಚ ಇಸ್ಸರಿಯಂ, ವತ್ತೇಮಿ ವಸುಧಾಯ ಚ.

೩. ‘‘ಕಿಲೇಸಾ ಝಾಪಿತಾ ಮಯ್ಹಂ, ಭವಾ ಸಬ್ಬೇ ಸಮೂಹತಾ;

ತಿಸ್ಸೋ ವಿಜ್ಜಾ ಅನುಪ್ಪತ್ತಾ, ಕತಂ ಬುದ್ಧಸ್ಸ ಸಾಸನಂ.

೪. ‘‘ಇತೋ ದ್ವೇಸಟ್ಠಿಕಪ್ಪಮ್ಹಿ, ತಯೋ ಆಸಿಂಸು ಖತ್ತಿಯಾ;

ಏಕಾಪಸ್ಸಿತನಾಮಾ ತೇ, ಚಕ್ಕವತ್ತೀ ಮಹಬ್ಬಲಾ.

೫. ‘‘ಪಟಿಸಮ್ಭಿದಾ ಚತಸ್ಸೋ, ವಿಮೋಕ್ಖಾಪಿ ಚ ಅಟ್ಠಿಮೇ;

ಛಳಭಿಞ್ಞಾ ಸಚ್ಛಿಕತಾ, ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ಆಲಮ್ಬಣದಾಯಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.

ಆಲಮ್ಬಣದಾಯಕತ್ಥೇರಸ್ಸಾಪದಾನಂ ಪಠಮಂ.