೯. ಏಕಚಾರಿಯತ್ಥೇರಅಪದಾನಂ

೫೧. ‘‘ತಾವತಿಂಸೇಸು ದೇವೇಸು, ಮಹಾಘೋಸೋ ತದಾ ಅಹು;

ಬುದ್ಧೋ ಚ ಲೋಕೇ ನಿಬ್ಬಾತಿ, ಮಯಞ್ಚಮ್ಹ ಸರಾಗಿನೋ.

೫೨. ‘‘ತೇಸಂ ಸಂವೇಗಜಾತಾನಂ, ಸೋಕಸಲ್ಲಸಮಙ್ಗಿನಂ;

ಸಬಲೇನ ಉಪತ್ಥದ್ಧೋ, ಅಗಮಂ ಬುದ್ಧಸನ್ತಿಕಂ.

೫೩. ‘‘ಮನ್ದಾರವಂ ಗಹೇತ್ವಾನ, ಸಙ್ಗೀತಿ [ಸಣ್ಹಿತಂ (ಸೀ.), ಸಙ್ಗಿತಂ (ಸ್ಯಾ.)] ಅಭಿನಿಮ್ಮಿತಂ;

ಪರಿನಿಬ್ಬುತಕಾಲಮ್ಹಿ, ಬುದ್ಧಸ್ಸ ಅಭಿರೋಪಯಿಂ.

೫೪. ‘‘ಸಬ್ಬೇ ದೇವಾನುಮೋದಿಂಸು, ಅಚ್ಛರಾಯೋ ಚ ಮೇ ತದಾ;

ಕಪ್ಪಾನಂ ಸತಸಹಸ್ಸಂ, ದುಗ್ಗತಿಂ ನುಪಪಜ್ಜಹಂ.

೫೫. ‘‘ಸಟ್ಠಿಕಪ್ಪಸಹಸ್ಸಮ್ಹಿ, ಇತೋ ಸೋಳಸ ತೇ ಜನಾ;

ಮಹಾಮಲ್ಲಜನಾ ನಾಮ, ಚಕ್ಕವತ್ತೀ ಮಹಬ್ಬಲಾ.

೫೬. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ಏಕಚಾರಿಯೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.

ಏಕಚಾರಿಯತ್ಥೇರಸ್ಸಾಪದಾನಂ ನವಮಂ.