೧೯. ಕುಟಜಪುಪ್ಫಿಯವಗ್ಗೋ

೧. ಕುಟಜಪುಪ್ಫಿಯತ್ಥೇರಅಪದಾನಂ

೧. ‘‘ಸುವಣ್ಣವಣ್ಣಂ ಸಮ್ಬುದ್ಧಂ, ಸತರಂಸಿಂವ ಉಗ್ಗತಂ;

ದಿಸಂ ಅನುವಿಲೋಕೇನ್ತಂ, ಗಚ್ಛನ್ತಂ ಅನಿಲಞ್ಜಸೇ.

೨. ‘‘ಕುಟಜಂ ಪುಪ್ಫಿತಂ ದಿಸ್ವಾ, ಸಂವಿತ್ಥತಸಮೋತ್ಥತಂ;

ರುಕ್ಖತೋ ಓಚಿನಿತ್ವಾನ, ಫುಸ್ಸಸ್ಸ ಅಭಿರೋಪಯಿಂ.

೩. ‘‘ದ್ವೇನವುತೇ ಇತೋ ಕಪ್ಪೇ, ಯಂ ಪುಪ್ಫಮಭಿರೋಪಯಿಂ;

ದುಗ್ಗತಿಂ ನಾಭಿಜಾನಾಮಿ, ಬುದ್ಧಪೂಜಾಯಿದಂ ಫಲಂ.

೪. ‘‘ಇತೋ ಸತ್ತರಸೇ ಕಪ್ಪೇ, ತಯೋ ಆಸುಂ ಸುಪುಪ್ಫಿತಾ;

ಸತ್ತರತನಸಮ್ಪನ್ನಾ, ಚಕ್ಕವತ್ತೀ ಮಹಬ್ಬಲಾ.

೫. ‘‘ಪಟಿಸಮ್ಭಿದಾ ಚತಸ್ಸೋ, ವಿಮೋಕ್ಖಾಪಿ ಚ ಅಟ್ಠಿಮೇ;

ಛಳಭಿಞ್ಞಾ ಸಚ್ಛಿಕತಾ, ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ಕುಟಜಪುಪ್ಫಿಯೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.

ಕುಟಜಪುಪ್ಫಿಯತ್ಥೇರಸ್ಸಾಪದಾನಂ ಪಠಮಂ.

೨. ಬನ್ಧುಜೀವಕತ್ಥೇರಅಪದಾನಂ

೬. ‘‘ಸಿದ್ಧತ್ಥೋ ನಾಮ ಸಮ್ಬುದ್ಧೋ, ಸಯಮ್ಭೂ ಸಬ್ಭಿ ವಣ್ಣಿತೋ;

ಸಮಾಧಿಂ ಸೋ ಸಮಾಪನ್ನೋ, ನಿಸೀದಿ ಪಬ್ಬತನ್ತರೇ.

೭. ‘‘ಜಾತಸ್ಸರೇ ಗವೇಸನ್ತೋ, ದಕಜಂ ಪುಪ್ಫಮುತ್ತಮಂ;

ಬನ್ಧುಜೀವಕಪುಪ್ಫಾನಿ, ಅದ್ದಸಂ ಸಮನನ್ತರಂ.

೮. ‘‘ಉಭೋ ಹತ್ಥೇಹಿ ಪಗ್ಗಯ್ಹ, ಉಪಾಗಚ್ಛಿಂ ಮಹಾಮುನಿಂ;

ಪಸನ್ನಚಿತ್ತೋ ಸುಮನೋ, ಸಿದ್ಧತ್ಥಸ್ಸಾಭಿರೋಪಯಿಂ.

೯. ‘‘ಚತುನ್ನವುತಿತೋ ಕಪ್ಪೇ, ಯಂ ಪುಪ್ಫಮಭಿರೋಪಯಿಂ;

ದುಗ್ಗತಿಂ ನಾಭಿಜಾನಾಮಿ, ಬುದ್ಧಪೂಜಾಯಿದಂ ಫಲಂ.

೧೦. ‘‘ಇತೋ ಚಾತುದ್ದಸೇ ಕಪ್ಪೇ, ಏಕೋ ಆಸಿಂ ಜನಾಧಿಪೋ;

ಸಮುದ್ದಕಪ್ಪೋ ನಾಮೇನ, ಚಕ್ಕವತ್ತೀ ಮಹಬ್ಬಲೋ.

೧೧. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ಬನ್ಧುಜೀವಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.

ಬನ್ಧುಜೀವಕತ್ಥೇರಸ್ಸಾಪದಾನಂ ದುತಿಯಂ.

೩. ಕೋಟುಮ್ಬರಿಯತ್ಥೇರಅಪದಾನಂ

೧೨. ‘‘ಕಣಿಕಾರಂವ ಜೋತನ್ತಂ, ನಿಸಿನ್ನಂ ಪಬ್ಬತನ್ತರೇ;

ಅಪ್ಪಮೇಯ್ಯಂವ ಉದಧಿಂ, ವಿತ್ಥತಂ ಧರಣಿಂ ಯಥಾ.

೧೩. ‘‘ಪೂಜಿತಂ [ಪರೇತಂ (ಸೀ.)] ದೇವಸಙ್ಘೇನ, ನಿಸಭಾಜಾನಿಯಂ ಯಥಾ;

ಹಟ್ಠೋ ಹಟ್ಠೇನ ಚಿತ್ತೇನ, ಉಪಾಗಚ್ಛಿಂ ನರುತ್ತಮಂ.

೧೪. ‘‘ಸತ್ತಪುಪ್ಫಾನಿ ಪಗ್ಗಯ್ಹ, ಕೋಟುಮ್ಬರಸಮಾಕುಲಂ;

ಬುದ್ಧಸ್ಸ ಅಭಿರೋಪೇಸಿಂ, ಸಿಖಿನೋ ಲೋಕಬನ್ಧುನೋ.

೧೫. ‘‘ಏಕತ್ತಿಂಸೇ ಇತೋ ಕಪ್ಪೇ, ಯಂ ಪುಪ್ಫಮಭಿರೋಪಯಿಂ;

ದುಗ್ಗತಿಂ ನಾಭಿಜಾನಾಮಿ, ಬುದ್ಧಪೂಜಾಯಿದಂ ಫಲಂ.

೧೬. ‘‘ಇತೋ ವೀಸತಿಕಪ್ಪಮ್ಹಿ, ಮಹಾನೇಲಸನಾಮಕೋ;

ಏಕೋ ಆಸಿ ಮಹಾತೇಜೋ, ಚಕ್ಕವತ್ತೀ ಮಹಬ್ಬಲೋ.

೧೭. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ಕೋಟುಮ್ಬರಿಯೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.

ಕೋಟುಮ್ಬರಿಯತ್ಥೇರಸ್ಸಾಪದಾನಂ ತತಿಯಂ.

೪. ಪಞ್ಚಹತ್ಥಿಯತ್ಥೇರಅಪದಾನಂ

೧೮. ‘‘ತಿಸ್ಸೋ ನಾಮಾಸಿ ಭಗವಾ, ಲೋಕಜೇಟ್ಠೋ ನರಾಸಭೋ;

ಪುರಕ್ಖತೋ ಸಾವಕೇಹಿ, ರಥಿಯಂ ಪಟಿಪಜ್ಜಥ.

೧೯. ‘‘ಪಞ್ಚ ಉಪ್ಪಲಹತ್ಥಾ ಚ, ಚಾತುರಾ ಠಪಿತಾ ಮಯಾ;

ಆಹುತಿಂ ದಾತುಕಾಮೋಹಂ, ಪಗ್ಗಣ್ಹಿಂ ವತಸಿದ್ಧಿಯಾ [ಪುತ್ತೋಮ್ಹಿ ಹಿತಸಿದ್ಧಿಯಾ (ಸ್ಯಾ.)].

೨೦. ‘‘ಸುವಣ್ಣವಣ್ಣಂ ಸಮ್ಬುದ್ಧಂ, ಗಚ್ಛನ್ತಂ ಅನ್ತರಾಪಣೇ;

ಬುದ್ಧರಂಸೀಹಿ ಫುಟ್ಠೋಸ್ಮಿ [ಬುದ್ಧರಂಸ್ಯಾಭಿಫುಟ್ಠೋಮ್ಹಿ (ಸೀ.), ಬುದ್ಧರಂಸಾಭಿಘುಟ್ಠೋಸ್ಮಿ (ಕ.)], ಪೂಜೇಸಿಂ ದ್ವಿಪದುತ್ತಮಂ.

೨೧. ‘‘ದ್ವೇನವುತೇ ಇತೋ ಕಪ್ಪೇ, ಯಂ ಪುಪ್ಫಮಭಿಪೂಜಯಿಂ;

ದುಗ್ಗತಿಂ ನಾಭಿಜಾನಾಮಿ, ಬುದ್ಧಪೂಜಾಯಿದಂ ಫಲಂ.

೨೨. ‘‘ಇತೋ ತೇರಸಕಪ್ಪಮ್ಹಿ, ಪಞ್ಚ ಸುಸಭಸಮ್ಮತಾ;

ಸತ್ತರತನಸಮ್ಪನ್ನಾ, ಚಕ್ಕವತ್ತೀ ಮಹಬ್ಬಲಾ.

೨೩. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ಪಞ್ಚಹತ್ಥಿಯೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.

ಪಞ್ಚಹತ್ಥಿಯತ್ಥೇರಸ್ಸಾಪದಾನಂ ಚತುತ್ಥಂ.

೫. ಇಸಿಮುಗ್ಗದಾಯಕತ್ಥೇರಅಪದಾನಂ

೨೪. ‘‘ಉದೇನ್ತಂ ಸತರಂಸಿಂವ, ಪೀತರಂಸಿಂವ [ಸಿತರಂಸಿಂವ (ಸೀ.)] ಭಾಣುಮಂ;

ಕಕುಧಂ ವಿಲಸನ್ತಂವ, ಪದುಮುತ್ತರನಾಯಕಂ.

೨೫. ‘‘ಇಸಿಮುಗ್ಗಾನಿ ಪಿಸಿತ್ವಾ [ಇಸಿಸುಗ್ಗಾನಿ ಪಿಂಸೇತ್ವಾ (ಸೀ.), ಇಸಿಮುಗ್ಗಂ ನಿಮನ್ತೇತ್ವಾ (ಸ್ಯಾ.)], ಮಧುಖುದ್ದೇ ಅನೀಳಕೇ;

ಪಾಸಾದೇವ ಠಿತೋ ಸನ್ತೋ, ಅದಾಸಿಂ ಲೋಕಬನ್ಧುನೋ.

೨೬. ‘‘ಅಟ್ಠಸತಸಹಸ್ಸಾನಿ, ಅಹೇಸುಂ ಬುದ್ಧಸಾವಕಾ;

ಸಬ್ಬೇಸಂ ಪತ್ತಪೂರೇನ್ತಂ [ಪತ್ತಪೂರಂ ತಂ (ಸೀ.)], ತತೋ ಚಾಪಿ ಬಹುತ್ತರಂ.

೨೭. ‘‘ತೇನ ಚಿತ್ತಪ್ಪಸಾದೇನ, ಸುಕ್ಕಮೂಲೇನ ಚೋದಿತೋ;

ಕಪ್ಪಾನಂ ಸತಸಹಸ್ಸಂ, ದುಗ್ಗತಿಂ ನುಪಪಜ್ಜಹಂ.

೨೮. ‘‘ಚತ್ತಾಲೀಸಮ್ಹಿ ಸಹಸ್ಸೇ, ಕಪ್ಪಾನಂ ಅಟ್ಠತಿಂಸ ತೇ;

ಇಸಿಮುಗ್ಗಸನಾಮಾ [ಮಹಿಸಮನ್ತನಾಮಾ (ಸ್ಯಾ.)] ತೇ, ಚಕ್ಕವತ್ತೀ ಮಹಬ್ಬಲಾ.

೨೯. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ಇಸಿಮುಗ್ಗದಾಯಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.

ಇಸಿಮುಗ್ಗದಾಯಕತ್ಥೇರಸ್ಸಾಪದಾನಂ ಪಞ್ಚಮಂ.

೬. ಬೋಧಿಉಪಟ್ಠಾಕತ್ಥೇರಅಪದಾನಂ

೩೦. ‘‘ನಗರೇ ರಮ್ಮವತಿಯಾ, ಆಸಿಂ ಮುರಜವಾದಕೋ;

ನಿಚ್ಚುಪಟ್ಠಾನಯುತ್ತೋಮ್ಹಿ, ಗತೋಹಂ ಬೋಧಿಮುತ್ತಮಂ.

೩೧. ‘‘ಸಾಯಂ ಪಾತಂ ಉಪಟ್ಠಿತ್ವಾ, ಸುಕ್ಕಮೂಲೇನ ಚೋದಿತೋ;

ಅಟ್ಠಾರಸಕಪ್ಪಸತೇ, ದುಗ್ಗತಿಂ ನುಪಪಜ್ಜಹಂ.

೩೨. ‘‘ಪನ್ನರಸೇ ಕಪ್ಪಸತೇ, ಇತೋ ಆಸಿಂ ಜನಾಧಿಪೋ;

ಮುರಜೋ [ದಮಥೋ (ಸ್ಯಾ.)] ನಾಮ ನಾಮೇನ, ಚಕ್ಕವತ್ತೀ ಮಹಬ್ಬಲೋ.

೩೩. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ಬೋಧಿಉಪಟ್ಠಾಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.

ಬೋಧಿಉಪಟ್ಠಾಕತ್ಥೇರಸ್ಸಾಪದಾನಂ ಛಟ್ಠಂ.

೭. ಏಕಚಿನ್ತಿಕತ್ಥೇರಅಪದಾನಂ

೩೪. ‘‘ಯದಾ ದೇವೋ [ದೇವಾ (ಕ.)] ದೇವಕಾಯಾ, ಚವತೇ [ಚವನ್ತಿ (ಕ.)] ಆಯುಸಙ್ಖಯಾ;

ತಯೋ ಸದ್ದಾ ನಿಚ್ಛರನ್ತಿ, ದೇವಾನಂ ಅನುಮೋದತಂ.

೩೫. ‘ಇತೋ ಭೋ ಸುಗತಿಂ ಗಚ್ಛ, ಮನುಸ್ಸಾನಂ ಸಹಬ್ಯತಂ;

ಮನುಸ್ಸಭೂತೋ ಸದ್ಧಮ್ಮೇ, ಲಭ ಸದ್ಧಂ ಅನುತ್ತರಂ.

೩೬. ‘‘‘ಸಾ ತೇ ಸದ್ಧಾ ನಿವಿಟ್ಠಾಸ್ಸ, ಮೂಲಜಾತಾ ಪತಿಟ್ಠಿತಾ;

ಯಾವಜೀವಂ ಅಸಂಹೀರಾ, ಸದ್ಧಮ್ಮೇ ಸುಪ್ಪವೇದಿತೇ.

೩೭. ‘‘‘ಕಾಯೇನ ಕುಸಲಂ ಕತ್ವಾ, ವಾಚಾಯ ಕುಸಲಂ ಬಹುಂ;

ಮನಸಾ ಕುಸಲಂ ಕತ್ವಾ, ಅಬ್ಯಾಪಜ್ಜಂ [ಅಬ್ಯಾಪಜ್ಝಂ (ಸ್ಯಾ.), ಅಪ್ಪಮಾಣಂ (ಇತಿವುತ್ತಕೇ ೮೩)] ನಿರೂಪಧಿಂ.

೩೮. ‘‘‘ತತೋ ಓಪಧಿಕಂ ಪುಞ್ಞಂ, ಕತ್ವಾ ದಾನೇನ ತಂ ಬಹುಂ;

ಅಞ್ಞೇಪಿ ಮಚ್ಚೇ ಸದ್ಧಮ್ಮೇ, ಬ್ರಹ್ಮಚರಿಯೇ ನಿವೇಸಯ’.

೩೯. ‘‘ಇಮಾಯ ಅನುಕಮ್ಪಾಯ, ದೇವಾ ದೇವಂ ಯದಾ ವಿದೂ;

ಚವನ್ತಂ ಅನುಮೋದನ್ತಿ, ಏಹಿ ದೇವ ಪುನಪ್ಪುನಂ [ದೇವಪುರಂ ಪುನ (ಸ್ಯಾ.)].

೪೦. ‘‘ಸಂವೇಗೋ ಮೇ [ಸಂವಿಗ್ಗೋಹಂ (ಸ್ಯಾ.)] ತದಾ ಆಸಿ, ದೇವಸಙ್ಘೇ ಸಮಾಗತೇ;

ಕಂಸು ನಾಮ ಅಹಂ ಯೋನಿಂ, ಗಮಿಸ್ಸಾಮಿ ಇತೋ ಚುತೋ.

೪೧. ‘‘ಮಮ ಸಂವೇಗಮಞ್ಞಾಯ, ಸಮಣೋ ಭಾವಿತಿನ್ದ್ರಿಯೋ;

ಮಮುದ್ಧರಿತುಕಾಮೋ ಸೋ, ಆಗಚ್ಛಿ ಮಮ ಸನ್ತಿಕಂ.

೪೨. ‘‘ಸುಮನೋ ನಾಮ ನಾಮೇನ, ಪದುಮುತ್ತರಸಾವಕೋ;

ಅತ್ಥಧಮ್ಮಾನುಸಾಸಿತ್ವಾ, ಸಂವೇಜೇಸಿ ಮಮಂ ತದಾ.

೪೩. ‘‘ತಸ್ಸಾಹಂ ವಚನಂ ಸುತ್ವಾ, ಬುದ್ಧೇ ಚಿತ್ತಂ ಪಸಾದಯಿಂ;

ತಂ ಧೀರಂ ಅಭಿವಾದೇತ್ವಾ, ತತ್ಥ ಕಾಲಂಕತೋ ಅಹಂ.

೪೪. ‘‘ಉಪಪಜ್ಜಿಂ ಸ [ಉಪಪಜ್ಜಿಸ್ಸಂ (ಸೀ.)] ತತ್ಥೇವ, ಸುಕ್ಕಮೂಲೇನ ಚೋದಿತೋ;

ಕಪ್ಪಾನಂ ಸತಸಹಸ್ಸಂ, ದುಗ್ಗತಿಂ ನುಪಪಜ್ಜಹಂ.

೪೫. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ಏಕಚಿನ್ತಿಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.

ಏಕಚಿನ್ತಿಕತ್ಥೇರಸ್ಸಾಪದಾನಂ ಸತ್ತಮಂ.

೮. ತಿಕಣ್ಣಿಪುಪ್ಫಿಯತ್ಥೇರಅಪದಾನಂ

೪೬. ‘‘ದೇವಭೂತೋ ಅಹಂ ಸನ್ತೋ, ಅಚ್ಛರಾಹಿ ಪುರಕ್ಖತೋ;

ಪುಬ್ಬಕಮ್ಮಂ ಸರಿತ್ವಾನ, ಬುದ್ಧಸೇಟ್ಠಂ ಅನುಸ್ಸರಿಂ.

೪೭. ‘‘ತಿಕಣ್ಣಿಪುಪ್ಫಂ [ಕಿಂಕಣಿಪುಪ್ಫಂ (ಕ.)] ಪಗ್ಗಯ್ಹ, ಸಕಂ ಚಿತ್ತಂ ಪಸಾದಯಿಂ;

ಬುದ್ಧಮ್ಹಿ ಅಭಿರೋಪೇಸಿಂ, ವಿಪಸ್ಸಿಮ್ಹಿ ನರಾಸಭೇ.

೪೮. ‘‘ಏಕನವುತಿತೋ ಕಪ್ಪೇ, ಯಂ ಪುಪ್ಫಮಭಿಪೂಜಯಿಂ;

ದುಗ್ಗತಿಂ ನಾಭಿಜಾನಾಮಿ, ಬುದ್ಧಪೂಜಾಯಿದಂ ಫಲಂ.

೪೯. ‘‘ತೇಸತ್ತತಿಮ್ಹಿತೋ ಕಪ್ಪೇ, ಚತುರಾಸುಂ ರಮುತ್ತಮಾ;

ಸತ್ತರತನಸಮ್ಪನ್ನಾ, ಚಕ್ಕವತ್ತೀ ಮಹಬ್ಬಲಾ.

೫೦. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ತಿಕಣ್ಣಿಪುಪ್ಫಿಯೋ [ಕಿಂಕಣಿಕಪುಪ್ಫಿಯೋ (ಕ.)] ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.

ತಿಕಣ್ಣಿಪುಪ್ಫಿಯತ್ಥೇರಸ್ಸಾಪದಾನಂ ಅಟ್ಠಮಂ.

೯. ಏಕಚಾರಿಯತ್ಥೇರಅಪದಾನಂ

೫೧. ‘‘ತಾವತಿಂಸೇಸು ದೇವೇಸು, ಮಹಾಘೋಸೋ ತದಾ ಅಹು;

ಬುದ್ಧೋ ಚ ಲೋಕೇ ನಿಬ್ಬಾತಿ, ಮಯಞ್ಚಮ್ಹ ಸರಾಗಿನೋ.

೫೨. ‘‘ತೇಸಂ ಸಂವೇಗಜಾತಾನಂ, ಸೋಕಸಲ್ಲಸಮಙ್ಗಿನಂ;

ಸಬಲೇನ ಉಪತ್ಥದ್ಧೋ, ಅಗಮಂ ಬುದ್ಧಸನ್ತಿಕಂ.

೫೩. ‘‘ಮನ್ದಾರವಂ ಗಹೇತ್ವಾನ, ಸಙ್ಗೀತಿ [ಸಣ್ಹಿತಂ (ಸೀ.), ಸಙ್ಗಿತಂ (ಸ್ಯಾ.)] ಅಭಿನಿಮ್ಮಿತಂ;

ಪರಿನಿಬ್ಬುತಕಾಲಮ್ಹಿ, ಬುದ್ಧಸ್ಸ ಅಭಿರೋಪಯಿಂ.

೫೪. ‘‘ಸಬ್ಬೇ ದೇವಾನುಮೋದಿಂಸು, ಅಚ್ಛರಾಯೋ ಚ ಮೇ ತದಾ;

ಕಪ್ಪಾನಂ ಸತಸಹಸ್ಸಂ, ದುಗ್ಗತಿಂ ನುಪಪಜ್ಜಹಂ.

೫೫. ‘‘ಸಟ್ಠಿಕಪ್ಪಸಹಸ್ಸಮ್ಹಿ, ಇತೋ ಸೋಳಸ ತೇ ಜನಾ;

ಮಹಾಮಲ್ಲಜನಾ ನಾಮ, ಚಕ್ಕವತ್ತೀ ಮಹಬ್ಬಲಾ.

೫೬. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ಏಕಚಾರಿಯೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.

ಏಕಚಾರಿಯತ್ಥೇರಸ್ಸಾಪದಾನಂ ನವಮಂ.

೧೦. ತಿವಣ್ಟಿಪುಪ್ಫಿಯತ್ಥೇರಅಪದಾನಂ

೫೭. ‘‘ಅಭಿಭೂತಂ ಪನಿಜ್ಝನ್ತಿ [ಅಭಿಭೂತೋಪನಿಜ್ಝನ್ತಿ (ಸೀ.)], ಸಬ್ಬೇ ಸಙ್ಗಮ್ಮ ತೇ ಮಮಂ [ಅಭಿಭುಂ ಥೇರಂ ಪನಿಜ್ಝಾಮ, ಸಬ್ಬೇ ಸಙ್ಗಮ್ಮ ತೇ ಮಯಂ (ಸ್ಯಾ.)];

ತೇಸಂ ನಿಜ್ಝಾಯಮಾನಾನಂ, ಪರಿಳಾಹೋ ಅಜಾಯಥ.

೫೮. ‘‘ಸುನನ್ದೋ ನಾಮ ನಾಮೇನ, ಬುದ್ಧಸ್ಸ ಸಾವಕೋ ತದಾ;

ಧಮ್ಮದಸ್ಸಿಸ್ಸ ಮುನಿನೋ, ಆಗಚ್ಛಿ ಮಮ ಸನ್ತಿಕಂ.

೫೯. ‘‘ಯೇ ಮೇ ಬದ್ಧಚರಾ ಆಸುಂ, ತೇ ಮೇ ಪುಪ್ಫಂ ಅದುಂ ತದಾ;

ತಾಹಂ ಪುಪ್ಫಂ ಗಹೇತ್ವಾನ, ಸಾವಕೇ ಅಭಿರೋಪಯಿಂ.

೬೦. ‘‘ಸೋಹಂ ಕಾಲಂಕತೋ ತತ್ಥ, ಪುನಾಪಿ ಉಪಪಜ್ಜಹಂ;

ಅಟ್ಠಾರಸೇ ಕಪ್ಪಸತೇ, ವಿನಿಪಾತಂ ನ ಗಚ್ಛಹಂ.

೬೧. ‘‘ತೇರಸೇತೋ ಕಪ್ಪಸತೇ, ಅಟ್ಠಾಸುಂ ಧೂಮಕೇತುನೋ;

ಸತ್ತರತನಸಮ್ಪನ್ನಾ, ಚಕ್ಕವತ್ತೀ ಮಹಬ್ಬಲಾ.

೬೨. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ತಿವಣ್ಟಿಪುಪ್ಫಿಯೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ;

ತಿವಣ್ಟಿಪುಪ್ಫಿಯತ್ಥೇರಸ್ಸಾಪದಾನಂ ದಸಮಂ.

ಕುಟಜಪುಪ್ಫಿಯವಗ್ಗೋ ಏಕೂನವೀಸತಿಮೋ.