೧. ಕುಟಜಪುಪ್ಫಿಯತ್ಥೇರಅಪದಾನಂ

೧. ‘‘ಸುವಣ್ಣವಣ್ಣಂ ಸಮ್ಬುದ್ಧಂ, ಸತರಂಸಿಂವ ಉಗ್ಗತಂ;

ದಿಸಂ ಅನುವಿಲೋಕೇನ್ತಂ, ಗಚ್ಛನ್ತಂ ಅನಿಲಞ್ಜಸೇ.

೨. ‘‘ಕುಟಜಂ ಪುಪ್ಫಿತಂ ದಿಸ್ವಾ, ಸಂವಿತ್ಥತಸಮೋತ್ಥತಂ;

ರುಕ್ಖತೋ ಓಚಿನಿತ್ವಾನ, ಫುಸ್ಸಸ್ಸ ಅಭಿರೋಪಯಿಂ.

೩. ‘‘ದ್ವೇನವುತೇ ಇತೋ ಕಪ್ಪೇ, ಯಂ ಪುಪ್ಫಮಭಿರೋಪಯಿಂ;

ದುಗ್ಗತಿಂ ನಾಭಿಜಾನಾಮಿ, ಬುದ್ಧಪೂಜಾಯಿದಂ ಫಲಂ.

೪. ‘‘ಇತೋ ಸತ್ತರಸೇ ಕಪ್ಪೇ, ತಯೋ ಆಸುಂ ಸುಪುಪ್ಫಿತಾ;

ಸತ್ತರತನಸಮ್ಪನ್ನಾ, ಚಕ್ಕವತ್ತೀ ಮಹಬ್ಬಲಾ.

೫. ‘‘ಪಟಿಸಮ್ಭಿದಾ ಚತಸ್ಸೋ, ವಿಮೋಕ್ಖಾಪಿ ಚ ಅಟ್ಠಿಮೇ;

ಛಳಭಿಞ್ಞಾ ಸಚ್ಛಿಕತಾ, ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ಕುಟಜಪುಪ್ಫಿಯೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.

ಕುಟಜಪುಪ್ಫಿಯತ್ಥೇರಸ್ಸಾಪದಾನಂ ಪಠಮಂ.