೧. ಕುಮುದಮಾಲಿಯತ್ಥೇರಅಪದಾನಂ

೧. ‘‘ಪಬ್ಬತೇ ಹಿಮವನ್ತಮ್ಹಿ, ಮಹಾಜಾತಸ್ಸರೋ ಅಹು;

ತತ್ಥಜೋ ರಕ್ಖಸೋ ಆಸಿಂ, ಘೋರರೂಪೋ ಮಹಬ್ಬಲೋ.

೨. ‘‘ಕುಮುದಂ ಪುಪ್ಫತೇ ತತ್ಥ, ಚಕ್ಕಮತ್ತಾನಿ ಜಾಯರೇ;

ಓಚಿನಾಮಿ ಚ ತಂ ಪುಪ್ಫಂ, ಬಲಿನೋ ಸಮಿತಿಂ ತದಾ.

೩. ‘‘ಅತ್ಥದಸ್ಸೀ ತು ಭಗವಾ, ದ್ವಿಪದಿನ್ದೋ ನರಾಸಭೋ;

ಪುಪ್ಫಸಙ್ಕೋಚಿತಂ [ಪುಪ್ಫಂ ಸಙ್ಕೋಚಿತಂ (ಸೀ. ಸ್ಯಾ.), ಪುಪ್ಫಂ ಸಮೋಚಿತಂ (?)] ದಿಸ್ವಾ, ಆಗಚ್ಛಿ ಮಮ ಸನ್ತಿಕಂ.

೪. ‘‘ಉಪಾಗತಞ್ಚ ಸಮ್ಬುದ್ಧಂ, ದೇವದೇವಂ ನರಾಸಭಂ;

ಸಬ್ಬಞ್ಚ ಪುಪ್ಫಂ ಪಗ್ಗಯ್ಹ, ಬುದ್ಧಸ್ಸ ಅಭಿರೋಪಯಿಂ.

೫. ‘‘ಯಾವತಾ ಹಿಮವನ್ತನ್ತಾ, ಪರಿಸಾ ಸಾ [ಹಿಮವನ್ತಸ್ಮಿಂ, ಯಾವ ಮಾಲಾ (ಸ್ಯಾ.)] ತದಾ ಅಹು;

ತಾವಚ್ಛದನಸಮ್ಪನ್ನೋ, ಅಗಮಾಸಿ ತಥಾಗತೋ.

೬. ‘‘ಅಟ್ಠಾರಸೇ ಕಪ್ಪಸತೇ, ಯಂ ಪುಪ್ಫಮಭಿರೋಪಯಿಂ;

ದುಗ್ಗತಿಂ ನಾಭಿಜಾನಾಮಿ, ಬುದ್ಧಪೂಜಾಯಿದಂ ಫಲಂ.

೭. ‘‘ಇತೋ ಪನ್ನರಸೇ ಕಪ್ಪೇ, ಸತ್ತಾಹೇಸುಂ ಜನಾಧಿಪಾ;

ಸಹಸ್ಸರಥನಾಮಾ ತೇ, ಚಕ್ಕವತ್ತೀ ಮಹಬ್ಬಲಾ.

೮. ‘‘ಪಟಿಸಮ್ಭಿದಾ ಚತಸ್ಸೋ, ವಿಮೋಕ್ಖಾಪಿ ಚ ಅಟ್ಠಿಮೇ;

ಛಳಭಿಞ್ಞಾ ಸಚ್ಛಿಕತಾ, ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ಕುಮುದಮಾಲಿಯೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.

ಕುಮುದಮಾಲಿಯತ್ಥೇರಸ್ಸಾಪದಾನಂ ಪಠಮಂ.