೧೦. ಪಞ್ಚಙ್ಗುಲಿಯತ್ಥೇರಅಪದಾನಂ

೫೦. ‘‘ತಿಸ್ಸೋ ನಾಮಾಸಿ ಭಗವಾ, ಲೋಕಜೇಟ್ಠೋ ನರಾಸಭೋ;

ಪವಿಸತಿ ಗನ್ಧಕುಟಿಂ, ವಿಹಾರಕುಸಲೋ ಮುನಿ.

೫೧. ‘‘ಸುಗನ್ಧಮಾಲಮಾದಾಯ, ಅಗಮಾಸಿಂ ಜಿನನ್ತಿಕಂ;

ಅಪಸದ್ದೋ ಚ ಸಮ್ಬುದ್ಧೇ, ಪಞ್ಚಙ್ಗುಲಿಮದಾಸಹಂ.

೫೨. ‘‘ದ್ವೇನವುತೇ ಇತೋ ಕಪ್ಪೇ, ಯಂ ಗನ್ಧಮಭಿರೋಪಯಿಂ;

ದುಗ್ಗತಿಂ ನಾಭಿಜಾನಾಮಿ, ಪಞ್ಚಙ್ಗುಲಿಸ್ಸಿದಂ [ಪಞ್ಚಙ್ಗುಲಿಯಿದಂ (ಸೀ.)] ಫಲಂ.

೫೩. ‘‘ದ್ವೇಸತ್ತತಿಮ್ಹಿತೋ ಕಪ್ಪೇ, ರಾಜಾ ಆಸಿಂ ಸಯಮ್ಪಭೋ;

ಸತ್ತರತನಸಮ್ಪನ್ನೋ, ಚಕ್ಕವತ್ತೀ ಮಹಬ್ಬಲೋ.

೫೪. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ಪಞ್ಚಙ್ಗುಲಿಯೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ;

ಪಞ್ಚಙ್ಗುಲಿಯತ್ಥೇರಸ್ಸಾಪದಾನಂ ದಸಮಂ.

ಸುಪಾರಿಚರಿಯವಗ್ಗೋ ಸತ್ತರಸಮೋ.