೨. ಪುಪ್ಫಥೂಪಿಯತ್ಥೇರಅಪದಾನಂ

೧೦. ‘‘ಹಿಮವನ್ತಸ್ಸಾವಿದೂರೇ, ಕುಕ್ಕುರೋ ನಾಮ [ಕುಕ್ಕುಟೋ ನಾಮ (ಸೀ.)] ಪಬ್ಬತೋ;

ವೇಮಜ್ಝೇ ತಸ್ಸ ವಸತಿ, ಬ್ರಾಹ್ಮಣೋ ಮನ್ತಪಾರಗೂ.

೧೧. ‘‘ಪಞ್ಚ ಸಿಸ್ಸಸಹಸ್ಸಾನಿ, ಪರಿವಾರೇನ್ತಿ ಮಂ ಸದಾ;

ಪುಬ್ಬುಟ್ಠಾಯೀ ಚ ತೇ ಆಸುಂ, ಮನ್ತೇಸು ಚ ವಿಸಾರದಾ.

೧೨. ‘‘ಬುದ್ಧೋ ಲೋಕೇ ಸಮುಪ್ಪನ್ನೋ, ತಂ ವಿಜಾನಾಥ ನೋ ಭವಂ;

ಅಸೀತಿಬ್ಯಞ್ಜನಾನಸ್ಸ, ಬಾತ್ತಿಂಸವರಲಕ್ಖಣಾ.

೧೩. ‘‘ಬ್ಯಾಮಪ್ಪಭೋ ಜಿನವರೋ, ಆದಿಚ್ಚೋವ ವಿರೋಚತಿ;

ಸಿಸ್ಸಾನಂ ವಚನಂ ಸುತ್ವಾ, ಬ್ರಾಹ್ಮಣೋ ಮನ್ತಪಾರಗೂ.

೧೪. ‘‘ಅಸ್ಸಮಾ ಅಭಿನಿಕ್ಖಮ್ಮ, ದಿಸಂ ಪುಚ್ಛತಿ ಸಿಸ್ಸಕೇ [ಬ್ರಾಹ್ಮಣೋ (ಸ್ಯಾ.)];

ಯಮ್ಹಿ ದೇಸೇ ಮಹಾವೀರೋ, ವಸತಿ ಲೋಕನಾಯಕೋ.

೧೫. ‘‘ತಾಹಂ ದಿಸಂ ನಮಸ್ಸಿಸ್ಸಂ, ಜಿನಂ ಅಪ್ಪಟಿಪುಗ್ಗಲಂ;

ಉದಗ್ಗಚಿತ್ತೋ ಸುಮನೋ, ಪೂಜೇಸಿಂ ತಂ ತಥಾಗತಂ.

೧೬. ‘‘ಏಥ ಸಿಸ್ಸಾ ಗಮಿಸ್ಸಾಮ, ದಕ್ಖಿಸ್ಸಾಮ ತಥಾಗತಂ;

ವನ್ದಿತ್ವಾ ಸತ್ಥುನೋ ಪಾದೇ, ಸೋಸ್ಸಾಮ ಜಿನಸಾಸನಂ.

೧೭. ‘‘ಏಕಾಹಂ ಅಭಿನಿಕ್ಖಮ್ಮ, ಬ್ಯಾಧಿಂ ಪಟಿಲಭಿಂ ಅಹಂ;

ಬ್ಯಾಧಿನಾ ಪೀಳಿತೋ ಸನ್ತೋ, ಸಾಲಂ ವಾಸಯಿತುಂ ಗಮಿಂ.

೧೮. ‘‘ಸಬ್ಬೇ ಸಿಸ್ಸೇ ಸಮಾನೇತ್ವಾ, ಅಪುಚ್ಛಿಂ ತೇ ತಥಾಗತಂ;

ಕೀದಿಸಂ ಲೋಕನಾಥಸ್ಸ, ಗುಣಂ ಪರಮಬುದ್ಧಿನೋ.

೧೯. ‘‘ತೇ ಮೇ ಪುಟ್ಠಾ ವಿಯಾಕಂಸು, ಯಥಾ ದಸ್ಸಾವಿನೋ ತಥಾ;

ಸಕ್ಕಚ್ಚಂ ಬುದ್ಧಸೇಟ್ಠಂ ತಂ, ದೇಸೇಸುಂ [ದಸ್ಸೇಸುಂ (ಸೀ. ಸ್ಯಾ.)] ಮಮ ಸಮ್ಮುಖಾ.

೨೦. ‘‘ತೇಸಾಹಂ ವಚನಂ ಸುತ್ವಾ, ಸಕಂ ಚಿತ್ತಂ ಪಸಾದಯಿಂ;

ಪುಪ್ಫೇಹಿ ಥೂಪಂ ಕತ್ವಾನ, ತತ್ಥ ಕಾಲಙ್ಕತೋ ಅಹಂ.

೨೧. ‘‘ತೇ ಮೇ ಸರೀರಂ ಝಾಪೇತ್ವಾ, ಅಗಮುಂ ಬುದ್ಧಸನ್ತಿಕಂ;

ಅಞ್ಜಲಿಂ ಪಗ್ಗಹೇತ್ವಾನ, ಸತ್ಥಾರಮಭಿವಾದಯುಂ.

೨೨. ‘‘ಪುಪ್ಫೇಹಿ ಥೂಪಂ ಕತ್ವಾನ, ಸುಗತಸ್ಸ ಮಹೇಸಿನೋ;

ಕಪ್ಪಾನಂ ಸತಸಹಸ್ಸಂ, ದುಗ್ಗತಿಂ ನುಪಪಜ್ಜಹಂ.

೨೩. ‘‘ಚತ್ತಾಲೀಸಸಹಸ್ಸಮ್ಹಿ, ಕಪ್ಪೇ ಸೋಳಸ ಖತ್ತಿಯಾ;

ನಾಮೇನಗ್ಗಿಸಮಾ ನಾಮ, ಚಕ್ಕವತ್ತೀ ಮಹಬ್ಬಲಾ.

೨೪. ‘‘ವೀಸಕಪ್ಪಸಹಸ್ಸಮ್ಹಿ, ರಾಜಾನೋ ಚಕ್ಕವತ್ತಿನೋ;

ಘತಾಸನಸನಾಮಾವ, ಅಟ್ಠತ್ತಿಂಸ ಮಹೀಪತೀ.

೨೫. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ಪುಪ್ಫಥೂಪಿಯೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.

ಪುಪ್ಫಥೂಪಿಯತ್ಥೇರಸ್ಸಾಪದಾನಂ ದುತಿಯಂ.