೩. ಪಾಯಸದಾಯಕತ್ಥೇರಅಪದಾನಂ

೨೬. ‘‘ಸುವಣ್ಣವಣ್ಣೋ ಸಮ್ಬುದ್ಧೋ, ಬಾತ್ತಿಂಸವರಲಕ್ಖಣೋ;

ಪವನಾ [ಪಧಾನೋ (ಕ.)] ಅಭಿನಿಕ್ಖನ್ತೋ, ಭಿಕ್ಖುಸಙ್ಘಪುರಕ್ಖತೋ [ಸುವಣ್ಣವಣ್ಣಂ …ಪೇ… ಪುರಕ್ಖತಂ-ಏವಂ ದುತಿಯನ್ತವಸೇನ ಸೀ. ಸ್ಯಾ. ಪೋತ್ಥಕೇಸು ದಿಸ್ಸತಿ].

೨೭. ‘‘ಮಹಚ್ಚಾ [ಸಹತ್ಥಾ (ಸ್ಯಾ. ಕ.)] ಕಂಸಪಾತಿಯಾ, ವಡ್ಢೇತ್ವಾ ಪಾಯಸಂ [ಪಾಯಾಸಂ (ಸ್ಯಾ. ಕ.)] ಅಹಂ;

ಆಹುತಿಂ ಯಿಟ್ಠುಕಾಮೋ ಸೋ, ಉಪನೇಸಿಂ ಬಲಿಂ ಅಹಂ.

೨೮. ‘‘ಭಗವಾ ತಮ್ಹಿ ಸಮಯೇ, ಲೋಕಜೇಟ್ಠೋ ನರಾಸಭೋ;

ಚಙ್ಕಮಂ ಸುಸಮಾರೂಳ್ಹೋ, ಅಮ್ಬರೇ ಅನಿಲಾಯನೇ.

೨೯. ‘‘ತಞ್ಚ ಅಚ್ಛರಿಯಂ ದಿಸ್ವಾ, ಅಬ್ಭುತಂ ಲೋಮಹಂಸನಂ;

ಠಪಯಿತ್ವಾ ಕಂಸಪಾತಿಂ, ವಿಪಸ್ಸಿಂ ಅಭಿವಾದಯಿಂ.

೩೦. ‘‘ತುವಂ ದೇವೋಸಿ [ಬುದ್ಧೋಸಿ (ಸ್ಯಾ.)] ಸಬ್ಬಞ್ಞೂ, ಸದೇವೇ ಸಹಮಾನುಸೇ;

ಅನುಕಮ್ಪಂ ಉಪಾದಾಯ, ಪಟಿಗಣ್ಹ ಮಹಾಮುನಿ.

೩೧. ‘‘ಪಟಿಗ್ಗಹೇಸಿ ಭಗವಾ, ಸಬ್ಬಞ್ಞೂ ಲೋಕನಾಯಕೋ;

ಮಮ ಸಙ್ಕಪ್ಪಮಞ್ಞಾಯ, ಸತ್ಥಾ ಲೋಕೇ ಮಹಾಮುನಿ [ಅನುತ್ತರೋ (ಸ್ಯಾ.)].

೩೨. ‘‘ಏಕನವುತಿತೋ ಕಪ್ಪೇ, ಯಂ ದಾನಮದದಿಂ ತದಾ;

ದುಗ್ಗತಿಂ ನಾಭಿಜಾನಾಮಿ, ಪಾಯಸಸ್ಸ [ಪಾಯಾಸಸ್ಸ (ಸ್ಯಾ. ಕ.)] ಇದಂ ಫಲಂ.

೩೩. ‘‘ಏಕತಾಲೀಸಿತೋ ಕಪ್ಪೇ, ಬುದ್ಧೋ ನಾಮಾಸಿ ಖತ್ತಿಯೋ;

ಸತ್ತರತನಸಮ್ಪನ್ನೋ, ಚಕ್ಕವತ್ತೀ ಮಹಬ್ಬಲೋ.

೩೪. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ಪಾಯಸದಾಯಕೋ [ಪಾಯಾಸದಾಯಕೋ (ಸ್ಯಾ. ಕ.)] ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.

ಪಾಯಸದಾಯಕತ್ಥೇರಸ್ಸಾಪದಾನಂ ತತಿಯಂ.