೫. ಗನ್ಧಮಾಲಿಯತ್ಥೇರಅಪದಾನಂ

೨೪. ‘‘ಸಿದ್ಧತ್ಥಸ್ಸ ಭಗವತೋ, ಗನ್ಧಥೂಪಂ ಅಕಾಸಹಂ;

ಸುಮನೇಹಿ ಪಟಿಚ್ಛನ್ನಂ, ಬುದ್ಧಾನುಚ್ಛವಿಕಂ ಕತಂ.

೨೫. ‘‘ಕಞ್ಚನಗ್ಘಿಯಸಙ್ಕಾಸಂ, ಬುದ್ಧಂ ಲೋಕಗ್ಗನಾಯಕಂ;

ಇನ್ದೀವರಂವ ಜಲಿತಂ, ಆದಿತ್ತಂವ ಹುತಾಸನಂ.

೨೬. ‘‘ಬ್ಯಗ್ಘೂಸಭಂವ ಪವರಂ, ಅಭಿಜಾತಂವ ಕೇಸರಿಂ;

ನಿಸಿನ್ನಂ ಸಮಣಾನಗ್ಗಂ, ಭಿಕ್ಖುಸಙ್ಘಪುರಕ್ಖತಂ.

೨೭. ‘‘ವನ್ದಿತ್ವಾ ಸತ್ಥುನೋ ಪಾದೇ, ಪಕ್ಕಾಮಿಂ ಉತ್ತರಾಮುಖೋ;

ಚತುನ್ನವುತಿತೋ ಕಪ್ಪೇ, ಗನ್ಧಮಾಲಂ ಯತೋ ಅದಂ.

೨೮. ‘‘ಬುದ್ಧೇ ಕತಸ್ಸ ಕಾರಸ್ಸ, ಫಲೇನಾಹಂ ವಿಸೇಸತೋ;

ದುಗ್ಗತಿಂ ನಾಭಿಜಾನಾಮಿ, ಬುದ್ಧಪೂಜಾಯಿದಂ ಫಲಂ.

೨೯. ‘‘ಚತ್ತಾರೀಸಮ್ಹಿ ಏಕೂನೇ, ಕಪ್ಪೇ ಆಸಿಂಸು ಸೋಳಸ;

ದೇವಗನ್ಧಸನಾಮಾ ತೇ, ರಾಜಾನೋ ಚಕ್ಕವತ್ತಿನೋ.

೩೦. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ಗನ್ಧಮಾಲಿಯೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.

ಗನ್ಧಮಾಲಿಯತ್ಥೇರಸ್ಸಾಪದಾನಂ ಪಞ್ಚಮಂ.