೧೦. ಬುದ್ಧುಪಟ್ಠಾಕತ್ಥೇರಅಪದಾನಂ

೫೬. ‘‘ವಿಪಸ್ಸಿಸ್ಸ ಭಗವತೋ, ಅಹೋಸಿಂ ಸಙ್ಖಧಮ್ಮಕೋ;

ನಿಚ್ಚುಪಟ್ಠಾನಯುತ್ತೋಮ್ಹಿ, ಸುಗತಸ್ಸ ಮಹೇಸಿನೋ.

೫೭. ‘‘ಉಪಟ್ಠಾನಫಲಂ ಪಸ್ಸ, ಲೋಕನಾಥಸ್ಸ ತಾದಿನೋ;

ಸಟ್ಠಿತೂರಿಯಸಹಸ್ಸಾನಿ, ಪರಿವಾರೇನ್ತಿ ಮಂ ಸದಾ.

೫೮. ‘‘ಏಕನವುತಿತೋ ಕಪ್ಪೇ, ಉಪಟ್ಠಹಿಂ ಮಹಾಇಸಿಂ;

ದುಗ್ಗತಿಂ ನಾಭಿಜಾನಾಮಿ, ಉಪಟ್ಠಾನಸ್ಸಿದಂ ಫಲಂ.

೫೯. ‘‘ಚತುವೀಸೇ [ಚತುನವುತೇ (ಸ್ಯಾ.)] ಇತೋ ಕಪ್ಪೇ, ಮಹಾನಿಗ್ಘೋಸನಾಮಕಾ;

ಸೋಳಸಾಸಿಂಸು ರಾಜಾನೋ, ಚಕ್ಕವತ್ತೀ ಮಹಬ್ಬಲಾ.

೬೦. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ಬುದ್ಧುಪಟ್ಠಾಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.

ಬುದ್ಧುಪಟ್ಠಾಕತ್ಥೇರಸ್ಸಾಪದಾನಂ ದಸಮಂ.

ಸುಧಾವಗ್ಗೋ ದಸಮೋ.

ತಸ್ಸುದ್ದಾನಂ –

ಸುಧಾ ಸುಚಿನ್ತಿ ಚೇಳಞ್ಚ, ಸೂಚೀ ಚ ಗನ್ಧಮಾಲಿಯೋ;

ತಿಪುಪ್ಫಿಯೋ ಮಧುಸೇನಾ, ವೇಯ್ಯಾವಚ್ಚೋ ಚುಪಟ್ಠಕೋ;

ಸಮಸಟ್ಠಿ ಚ ಗಾಥಾಯೋ, ಅಸ್ಮಿಂ ವಗ್ಗೇ ಪಕಿತ್ತಿತಾ.

ಅಥ ವಗ್ಗುದ್ದಾನಂ –

ಬುದ್ಧವಗ್ಗೋ ಹಿ ಪಠಮೋ, ಸೀಹಾಸನಿ ಸುಭೂತಿ ಚ;

ಕುಣ್ಡಧಾನೋ ಉಪಾಲಿ ಚ, ಬೀಜನಿಸಕಚಿನ್ತಿ ಚ.

ನಾಗಸಮಾಲೋ ತಿಮಿರೋ, ಸುಧಾವಗ್ಗೇನ ತೇ ದಸ;

ಚತುದ್ದಸಸತಾ ಗಾಥಾ, ಪಞ್ಚಪಞ್ಞಾಸಮೇವ ಚ.

ಬುದ್ಧವಗ್ಗದಸಕಂ.