೩-೩. ಮಹಾಕಸ್ಸಪತ್ಥೇರಅಪದಾನಂ

೩೯೮. ‘‘ಪದುಮುತ್ತರಸ್ಸ ಭಗವತೋ, ಲೋಕಜೇಟ್ಠಸ್ಸ ತಾದಿನೋ;

ನಿಬ್ಬುತೇ ಲೋಕನಾಥಮ್ಹಿ, ಪೂಜಂ ಕುಬ್ಬನ್ತಿ ಸತ್ಥುನೋ.

೩೯೯. ‘‘ಉದಗ್ಗಚಿತ್ತಾ ಜನತಾ, ಆಮೋದಿತಪಮೋದಿತಾ;

ತೇಸು ಸಂವೇಗಜಾತೇಸು, ಪೀತಿ ಮೇ ಉದಪಜ್ಜಥ.

೪೦೦. ‘‘ಞಾತಿಮಿತ್ತೇ ಸಮಾನೇತ್ವಾ, ಇದಂ ವಚನಮಬ್ರವಿಂ;

ಪರಿನಿಬ್ಬುತೋ ಮಹಾವೀರೋ, ಹನ್ದ ಪೂಜಂ ಕರೋಮಸೇ.

೪೦೧. ‘‘ಸಾಧೂತಿ ತೇ ಪಟಿಸ್ಸುತ್ವಾ, ಭಿಯ್ಯೋ ಹಾಸಂ ಜನಿಂಸು ಮೇ;

ಬುದ್ಧಸ್ಮಿಂ ಲೋಕನಾಥಮ್ಹಿ, ಕಾಹಾಮ ಪುಞ್ಞಸಞ್ಚಯಂ.

೪೦೨. ‘‘ಅಗ್ಘಿಯಂ ಸುಕತಂ ಕತ್ವಾ, ಸತಹತ್ಥಸಮುಗ್ಗತಂ;

ದಿಯಡ್ಢಹತ್ಥಪತ್ಥಟಂ, ವಿಮಾನಂ ನಭಮುಗ್ಗತಂ.

೪೦೩. ‘‘ಕತ್ವಾನ ಹಮ್ಮಿಯಂ ತತ್ಥ, ತಾಲಪನ್ತೀಹಿ ಚಿತ್ತಿತಂ;

ಸಕಂ ಚಿತ್ತಂ ಪಸಾದೇತ್ವಾ, ಚೇತಿಯಂ ಪೂಜಯುತ್ತಮಂ.

೪೦೪. ‘‘ಅಗ್ಗಿಕ್ಖನ್ಧೋವ ಜಲಿತೋ, ಕಿಂಸುಕೋ ಇವ [ಸಾಲರಾಜಾವ (ಸೀ.)] ಫುಲ್ಲಿತೋ;

ಇನ್ದಲಟ್ಠೀವ ಆಕಾಸೇ, ಓಭಾಸೇತಿ ಚತುದ್ದಿಸಾ.

೪೦೫. ‘‘ತತ್ಥ ಚಿತ್ತಂ ಪಸಾದೇತ್ವಾ, ಕತ್ವಾನ ಕುಸಲಂ ಬಹುಂ;

ಪುಬ್ಬಕಮ್ಮಂ ಸರಿತ್ವಾನ, ತಿದಸಂ ಉಪಪಜ್ಜಹಂ.

೪೦೬. ‘‘ಸಹಸ್ಸಯುತ್ತಂ ಹಯವಾಹಿಂ, ದಿಬ್ಬಯಾನಮಧಿಟ್ಠಿತೋ;

ಉಬ್ಬಿದ್ಧಂ ಭವನಂ ಮಯ್ಹಂ, ಸತ್ತಭೂಮಂ ಸಮುಗ್ಗತಂ.

೪೦೭. ‘‘ಕೂಟಾಗಾರಸಹಸ್ಸಾನಿ, ಸಬ್ಬಸೋಣ್ಣಮಯಾ ಅಹುಂ;

ಜಲನ್ತಿ ಸಕತೇಜೇನ, ದಿಸಾ ಸಬ್ಬಾ ಪಭಾಸಯಂ.

೪೦೮. ‘‘ಸನ್ತಿ ಅಞ್ಞೇಪಿ ನಿಯ್ಯೂಹಾ, ಲೋಹಿತಙ್ಗಮಯಾ ತದಾ;

ತೇಪಿ ಜೋತನ್ತಿ ಆಭಾಯ, ಸಮನ್ತಾ ಚತುರೋ ದಿಸಾ.

೪೦೯. ‘‘ಪುಞ್ಞಕಮ್ಮಾಭಿನಿಬ್ಬತ್ತಾ, ಕೂಟಾಗಾರಾ ಸುನಿಮ್ಮಿತಾ;

ಮಣಿಮಯಾಪಿ ಜೋತನ್ತಿ, ದಿಸಾ ದಸ [ದಿಸೋದಿಸಂ (ಸ್ಯಾ.)] ಸಮನ್ತತೋ.

೪೧೦. ‘‘ತೇಸಂ ಉಜ್ಜೋತಮಾನಾನಂ, ಓಭಾಸೋ ವಿಪುಲೋ ಅಹು;

ಸಬ್ಬೇ ದೇವೇ ಅಭಿಭೋಮಿ, ಪುಞ್ಞಕಮ್ಮಸ್ಸಿದಂ ಫಲಂ.

೪೧೧. ‘‘ಸಟ್ಠಿಕಪ್ಪಸಹಸ್ಸಮ್ಹಿ, ಉಬ್ಬಿದ್ಧೋ ನಾಮ ಖತ್ತಿಯೋ;

ಚಾತುರನ್ತೋ ವಿಜಿತಾವೀ, ಪಥವಿಂ ಆವಸಿಂ ಅಹಂ.

೪೧೨. ‘‘ತಥೇವ ಭದ್ದಕೇ ಕಪ್ಪೇ, ತಿಂಸಕ್ಖತ್ತುಂ ಅಹೋಸಹಂ;

ಸಕಕಮ್ಮಾಭಿರದ್ಧೋಮ್ಹಿ, ಚಕ್ಕವತ್ತೀ ಮಹಬ್ಬಲೋ.

೪೧೩. ‘‘ಸತ್ತರತನಸಮ್ಪನ್ನೋ, ಚತುದೀಪಮ್ಹಿ ಇಸ್ಸರೋ;

ತತ್ಥಾಪಿ ಭವನಂ ಮಯ್ಹಂ, ಇನ್ದಲಟ್ಠೀವ ಉಗ್ಗತಂ.

೪೧೪. ‘‘ಆಯಾಮತೋ ಚತುಬ್ಬೀಸಂ, ವಿತ್ಥಾರೇನ ಚ ದ್ವಾದಸ;

ರಮ್ಮಣಂ [ರಮ್ಮಕಂ (ಸೀ. ಸ್ಯಾ.)] ನಾಮ ನಗರಂ, ದಳ್ಹಪಾಕಾರತೋರಣಂ.

೪೧೫. ‘‘ಆಯಾಮತೋ ಪಞ್ಚಸತಂ, ವಿತ್ಥಾರೇನ ತದಡ್ಢಕಂ;

ಆಕಿಣ್ಣಂ ಜನಕಾಯೇಹಿ, ತಿದಸಾನಂ ಪುರಂ ವಿಯ.

೪೧೬. ‘‘ಯಥಾ ಸೂಚಿಘರೇ ಸೂಚೀ, ಪಕ್ಖಿತ್ತಾ ಪಣ್ಣವೀಸತಿ;

ಅಞ್ಞಮಞ್ಞಂ ಪಘಟ್ಟೇನ್ತಿ, ಆಕಿಣ್ಣಂ ಹೋತಿ ಲಙ್ಕತಂ [ತಂ ತದಾ (ಸೀ.), ಸತತಾ (ಸ್ಯಾ.), ಸಙ್ಕರಂ (?)].

೪೧೭. ‘‘ಏವಮ್ಪಿ ನಗರಂ ಮಯ್ಹಂ, ಹತ್ಥಿಸ್ಸರಥಸಂಕುಲಂ;

ಮನುಸ್ಸೇಹಿ ಸದಾಕಿಣ್ಣಂ, ರಮ್ಮಣಂ ನಗರುತ್ತಮಂ.

೪೧೮. ‘‘ತತ್ಥ ಭುತ್ವಾ ಪಿವಿತ್ವಾ ಚ, ಪುನ ದೇವತ್ತನಂ ಗತೋ [ಪುನಪಿ ದೇವತಙ್ಗತೋ (ಕ.)].

ಭವೇ ಪಚ್ಛಿಮಕೇ ಮಯ್ಹಂ, ಅಹೋಸಿ ಕುಲಸಮ್ಪದಾ.

೪೧೯. ‘‘ಬ್ರಾಹ್ಮಞ್ಞಕುಲಸಮ್ಭೂತೋ, ಮಹಾರತನಸಞ್ಚಯೋ;

ಅಸೀತಿಕೋಟಿಯೋ ಹಿತ್ವಾ, ಹಿರಞ್ಞಸ್ಸಾಪಿ ಪಬ್ಬಜಿಂ.

೪೨೦. ‘‘ಪಟಿಸಮ್ಭಿದಾ ಚತಸ್ಸೋ, ವಿಮೋಕ್ಖಾಪಿ ಚ ಅಟ್ಠಿಮೇ;

ಛಳಭಿಞ್ಞಾ ಸಚ್ಛಿಕತಾ, ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ಮಹಾಕಸ್ಸಪೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.

ಮಹಾಕಸ್ಸಪತ್ಥೇರಸ್ಸಾಪದಾನಂ ತತಿಯಂ.