೩-೪. ಅನುರುದ್ಧತ್ಥೇರಅಪದಾನಂ

೪೨೧. ‘‘ಸುಮೇಧಂ ಭಗವನ್ತಾಹಂ, ಲೋಕಜೇಟ್ಠಂ ನರಾಸಭಂ;

ವೂಪಕಟ್ಠಂ ವಿಹರನ್ತಂ, ಅದ್ದಸಂ ಲೋಕನಾಯಕಂ.

೪೨೨. ‘‘ಉಪಗನ್ತ್ವಾನ ಸಮ್ಬುದ್ಧಂ, ಸುಮೇಧಂ ಲೋಕನಾಯಕಂ;

ಅಞ್ಜಲಿಂ ಪಗ್ಗಹೇತ್ವಾನ, ಬುದ್ಧಸೇಟ್ಠಮಯಾಚಹಂ.

೪೨೩. ‘‘ಅನುಕಮ್ಪ ಮಹಾವೀರ, ಲೋಕಜೇಟ್ಠ ನರಾಸಭ;

ಪದೀಪಂ ತೇ ಪದಸ್ಸಾಮಿ, ರುಕ್ಖಮೂಲಮ್ಹಿ ಝಾಯತೋ.

೪೨೪. ‘‘ಅಧಿವಾಸೇಸಿ ಸೋ ಧೀರೋ, ಸಯಮ್ಭೂ ವದತಂ ವರೋ;

ದುಮೇಸು ವಿನಿವಿಜ್ಝಿತ್ವಾ, ಯನ್ತಂ ಯೋಜಿಯಹಂ ತದಾ.

೪೨೫. ‘‘ಸಹಸ್ಸವಟ್ಟಿಂ ಪಾದಾಸಿಂ, ಬುದ್ಧಸ್ಸ ಲೋಕಬನ್ಧುನೋ;

ಸತ್ತಾಹಂ ಪಜ್ಜಲಿತ್ವಾನ, ದೀಪಾ ವೂಪಸಮಿಂಸು ಮೇ.

೪೨೬. ‘‘ತೇನ ಚಿತ್ತಪ್ಪಸಾದೇನ, ಚೇತನಾಪಣಿಧೀಹಿ ಚ;

ಜಹಿತ್ವಾ ಮಾನುಸಂ ದೇಹಂ, ವಿಮಾನಮುಪಪಜ್ಜಹಂ.

೪೨೭. ‘‘ಉಪಪನ್ನಸ್ಸ ದೇವತ್ತಂ, ಬ್ಯಮ್ಹಂ ಆಸಿ ಸುನಿಮ್ಮಿತಂ;

ಸಮನ್ತತೋ ಪಜ್ಜಲತಿ, ದೀಪದಾನಸ್ಸಿದಂ ಫಲಂ.

೪೨೮. ‘‘ಸಮನ್ತಾ ಯೋಜನಸತಂ, ವಿರೋಚೇಸಿಮಹಂ ತದಾ;

ಸಬ್ಬೇ ದೇವೇ ಅಭಿಭೋಮಿ, ದೀಪದಾನಸ್ಸಿದಂ ಫಲಂ.

೪೨೯. ‘‘ತಿಂಸಕಪ್ಪಾನಿ ದೇವಿನ್ದೋ, ದೇವರಜ್ಜಮಕಾರಯಿಂ;

ನ ಮಂ ಕೇಚೀತಿಮಞ್ಞನ್ತಿ, ದೀಪದಾನಸ್ಸಿದಂ ಫಲಂ.

೪೩೦. ‘‘ಅಟ್ಠವೀಸತಿಕ್ಖತ್ತುಞ್ಚ, ಚಕ್ಕವತ್ತೀ ಅಹೋಸಹಂ;

ದಿವಾ ರತ್ತಿಞ್ಚ ಪಸ್ಸಾಮಿ, ಸಮನ್ತಾ ಯೋಜನಂ ತದಾ.

೪೩೧. ‘‘ಸಹಸ್ಸಲೋಕಂ ಞಾಣೇನ, ಪಸ್ಸಾಮಿ ಸತ್ಥು ಸಾಸನೇ;

ದಿಬ್ಬಚಕ್ಖುಮನುಪ್ಪತ್ತೋ, ದೀಪದಾನಸ್ಸಿದಂ ಫಲಂ.

೪೩೨. ‘‘ಸುಮೇಧೋ ನಾಮ ಸಮ್ಬುದ್ಧೋ, ತಿಂಸಕಪ್ಪಸಹಸ್ಸಿತೋ;

ತಸ್ಸ ದೀಪೋ ಮಯಾ ದಿನ್ನೋ, ವಿಪ್ಪಸನ್ನೇನ ಚೇತಸಾ.

೪೩೩. ‘‘ಪಟಿಸಮ್ಭಿದಾ ಚತಸ್ಸೋ, ವಿಮೋಕ್ಖಾಪಿ ಚ ಅಟ್ಠಿಮೇ;

ಛಳಭಿಞ್ಞಾ ಸಚ್ಛಿಕತಾ, ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ಅನುರುದ್ಧೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.

ಅನುರುದ್ಧತ್ಥೇರಸ್ಸಾಪದಾನಂ ಚತುತ್ಥಂ.