೨. ಪಚ್ಚೇಕಬುದ್ಧಅಪದಾನಂ

ಅಥ ಪಚ್ಚೇಕಬುದ್ಧಾಪದಾನಂ ಸುಣಾಥ –

೮೩. ‘‘ತಥಾಗತಂ ಜೇತವನೇ ವಸನ್ತಂ, ಅಪುಚ್ಛಿ ವೇದೇಹಮುನೀ ನತಙ್ಗೋ;

‘ಪಚ್ಚೇಕಬುದ್ಧಾ ಕಿರ ನಾಮ ಹೋನ್ತಿ, ಭವನ್ತಿ ತೇ ಹೇತುಭಿ ಕೇಹಿ ವೀರ’ [ಧೀರ (ಸೀ.) ಧೀರಾ (ಸ್ಯಾ.)].

೮೪. ‘‘ತದಾಹ ಸಬ್ಬಞ್ಞುವರೋ ಮಹೇಸೀ, ಆನನ್ದಭದ್ದಂ ಮಧುರಸ್ಸರೇನ;

‘ಯೇ ಪುಬ್ಬಬುದ್ಧೇಸು [ಸಬ್ಬಬುದ್ಧೇಸು (ಸ್ಯಾ. ಕ.)] ಕತಾಧಿಕಾರಾ, ಅಲದ್ಧಮೋಕ್ಖಾ ಜಿನಸಾಸನೇಸು.

೮೫. ‘‘‘ತೇನೇವ ಸಂವೇಗಮುಖೇನ ಧೀರಾ, ವಿನಾಪಿ ಬುದ್ಧೇಹಿ ಸುತಿಕ್ಖಪಞ್ಞಾ;

ಆರಮ್ಮಣೇನಾಪಿ ಪರಿತ್ತಕೇನ, ಪಚ್ಚೇಕಬೋಧಿಂ ಅನುಪಾಪುಣನ್ತಿ.

೮೬. ‘‘‘ಸಬ್ಬಮ್ಹಿ ಲೋಕಮ್ಹಿ ಮಮಂ ಠಪೇತ್ವಾ, ಪಚ್ಚೇಕಬುದ್ಧೇಹಿ ಸಮೋವ ನತ್ಥಿ;

ತೇಸಂ ಇಮಂ ವಣ್ಣಪದೇಸಮತ್ತಂ, ವಕ್ಖಾಮಹಂ ಸಾಧು ಮಹಾಮುನೀನಂ.

೮೭. ‘‘‘ಸಯಮೇವ ಬುದ್ಧಾನಂ ಮಹಾಇಸೀನಂ, ಸಾಧೂನಿ ವಾಕ್ಯಾನಿ ಮಧೂವ [ಮಧುಂವ (ಸೀ.)] ಖುದ್ದಂ;

ಅನುತ್ತರಂ ಭೇಸಜಂ ಪತ್ಥಯನ್ತಾ, ಸುಣಾಥ ಸಬ್ಬೇಸು ಪಸನ್ನಚಿತ್ತಾ.

೮೮. ‘‘‘ಪಚ್ಚೇಕಬುದ್ಧಾನಂ ಸಮಾಗತಾನಂ, ಪರಮ್ಪರಂ ಬ್ಯಾಕರಣಾನಿ ಯಾನಿ;

ಆದೀನವೋ ಯಞ್ಚ ವಿರಾಗವತ್ಥುಂ, ಯಥಾ ಚ ಬೋಧಿಂ ಅನುಪಾಪುಣಿಂಸು.

೮೯. ‘‘‘ಸರಾಗವತ್ಥೂಸು ವಿರಾಗಸಞ್ಞೀ, ರತ್ತಮ್ಹಿ ಲೋಕಮ್ಹಿ ವಿರತ್ತಚಿತ್ತಾ;

ಹಿತ್ವಾ ಪಪಞ್ಚೇ ಜಿತಫನ್ದಿತಾನಿ [ವಿದಿಯ ಫನ್ದಿತಾನಿ (ಸೀ.) ಜಿತಬನ್ಧಿತಾನಿ (ಕ.)], ತಥೇವ ಬೋಧಿಂ ಅನುಪಾಪುಣಿಂಸು.

೯೦. ‘‘‘ಸಬ್ಬೇಸು ಭೂತೇಸು ನಿಧಾಯ ದಣ್ಡಂ, ಅವಿಹೇಠಯಂ ಅಞ್ಞತರಮ್ಪಿ ತೇಸಂ;

ಮೇತ್ತೇನ ಚಿತ್ತೇನ ಹಿತಾನುಕಮ್ಪೀ, ಏಕೋ ಚರೇ ಖಗ್ಗವಿಸಾಣಕಪ್ಪೋ.

೯೧. ‘‘‘ಸಬ್ಬೇಸು ಭೂತೇಸು ನಿಧಾಯ ದಣ್ಡಂ, ಅವಿಹೇಠಯಂ ಅಞ್ಞತರಮ್ಪಿ ತೇಸಂ;

ನ ಪುತ್ತಮಿಚ್ಛೇಯ್ಯ ಕುತೋ ಸಹಾಯಂ, ಏಕೋ ಚರೇ ಖಗ್ಗವಿಸಾಣಕಪ್ಪೋ.

೯೨. ‘‘‘ಸಂಸಗ್ಗಜಾತಸ್ಸ ಭವನ್ತಿ ಸ್ನೇಹಾ, ಸ್ನೇಹನ್ವಯಂ ದುಕ್ಖಮಿದಂ ಪಹೋತಿ;

ಆದೀನವಂ ಸ್ನೇಹಜಂ ಪೇಕ್ಖಮಾನೋ, ಏಕೋ ಚರೇ ಖಗ್ಗವಿಸಾಣಕಪ್ಪೋ.

೯೩. ‘‘‘ಮಿತ್ತೇ ಸುಹಜ್ಜೇ ಅನುಕಮ್ಪಮಾನೋ, ಹಾಪೇತಿ ಅತ್ಥಂ ಪಟಿಬದ್ಧಚಿತ್ತೋ;

ಏತಂ ಭಯಂ ಸನ್ಥವೇ ಪೇಕ್ಖಮಾನೋ, ಏಕೋ ಚರೇ ಖಗ್ಗವಿಸಾಣಕಪ್ಪೋ.

೯೪. ‘‘‘ವಂಸೋ ವಿಸಾಲೋವ ಯಥಾ ವಿಸತ್ತೋ, ಪುತ್ತೇಸು ದಾರೇಸು ಚ ಯಾ ಅಪೇಕ್ಖಾ;

ವಂಸೇ ಕಳೀರೋವ ಅಸಜ್ಜಮಾನೋ, ಏಕೋ ಚರೇ ಖಗ್ಗವಿಸಾಣಕಪ್ಪೋ.

೯೫. ‘‘‘ಮಿಗೋ ಅರಞ್ಞಮ್ಹಿ ಯಥಾ ಅಬದ್ಧೋ, ಯೇನಿಚ್ಛಕಂ ಗಚ್ಛತಿ ಗೋಚರಾಯ;

ವಿಞ್ಞೂ ನರೋ ಸೇರಿತಂ ಪೇಕ್ಖಮಾನೋ, ಏಕೋ ಚರೇ ಖಗ್ಗವಿಸಾಣಕಪ್ಪೋ.

೯೬. ‘‘‘ಆಮನ್ತನಾ ಹೋತಿ ಸಹಾಯಮಜ್ಝೇ, ವಾಸೇ ಚ [ವಾಸೇ (ಸೀ. ಸ್ಯಾ.) ಸುತ್ತನಿಪಾತೇಪಿ ‘‘ಚ‘‘ಕಾರೋ ನತ್ಥಿ] ಠಾನೇ ಗಮನೇ ಚಾರಿಕಾಯ;

ಅನಭಿಜ್ಝಿತಂ ಸೇರಿತಂ ಪೇಕ್ಖಮಾನೋ, ಏಕೋ ಚರೇ ಖಗ್ಗವಿಸಾಣಕಪ್ಪೋ.

೯೭. ‘‘‘ಖಿಡ್ಡಾ ರತೀ ಹೋತಿ ಸಹಾಯಮಜ್ಝೇ, ಪುತ್ತೇಸು ಪೇಮಂ ವಿಪುಲಞ್ಚ ಹೋತಿ;

ಪಿಯವಿಪ್ಪಯೋಗಂ ವಿಜಿಗುಚ್ಛಮಾನೋ, ಏಕೋ ಚರೇ ಖಗ್ಗವಿಸಾಣಕಪ್ಪೋ.

೯೮. ‘‘‘ಚಾತುದ್ದಿಸೋ ಅಪ್ಪಟಿಘೋ ಚ ಹೋತಿ, ಸನ್ತುಸ್ಸಮಾನೋ ಇತರೀತರೇನ;

ಪರಿಸ್ಸಯಾನಂ ಸಹಿತಾ ಅಛಮ್ಭೀ, ಏಕೋ ಚರೇ ಖಗ್ಗವಿಸಾಣಕಪ್ಪೋ.

೯೯. ‘‘‘ದುಸ್ಸಙ್ಗಹಾ ಪಬ್ಬಜಿತಾಪಿ ಏಕೇ, ಅಥೋ ಗಹಟ್ಠಾ ಘರಮಾವಸನ್ತಾ;

ಅಪ್ಪೋಸ್ಸುಕ್ಕೋ ಪರಪುತ್ತೇಸು ಹುತ್ವಾ, ಏಕೋ ಚರೇ ಖಗ್ಗವಿಸಾಣಕಪ್ಪೋ.

೧೦೦. ‘‘‘ಓರೋಪಯಿತ್ವಾ ಗಿಹಿಬ್ಯಞ್ಜನಾನಿ, ಸಞ್ಛಿನ್ನಪತ್ತೋ ಯಥಾ ಕೋವಿಳಾರೋ;

ಛೇತ್ವಾನ ವೀರೋ ಗಿಹಿಬನ್ಧನಾನಿ, ಏಕೋ ಚರೇ ಖಗ್ಗವಿಸಾಣಕಪ್ಪೋ.

೧೦೧. ‘‘‘ಸಚೇ ಲಭೇಥ ನಿಪಕಂ ಸಹಾಯಂ, ಸದ್ಧಿಂ ಚರಂ ಸಾಧುವಿಹಾರಿಧೀರಂ;

ಅಭಿಭುಯ್ಯ ಸಬ್ಬಾನಿ ಪರಿಸ್ಸಯಾನಿ, ಚರೇಯ್ಯ ತೇನತ್ತಮನೋ ಸತೀಮಾ.

೧೦೨. ‘‘‘ನೋ ಚೇ ಲಭೇಥ ನಿಪಕಂ ಸಹಾಯಂ, ಸದ್ಧಿಂ ಚರಂ ಸಾಧುವಿಹಾರಿಧೀರಂ;

ರಾಜಾವ ರಟ್ಠಂ ವಿಜಿತಂ ಪಹಾಯ, ಏಕೋ ಚರೇ ಮಾತಙ್ಗರಞ್ಞೇವ ನಾಗೋ.

೧೦೩. ‘‘‘ಅದ್ಧಾ ಪಸಂಸಾಮ ಸಹಾಯಸಮ್ಪದಂ, ಸೇಟ್ಠಾ ಸಮಾ ಸೇವಿತಬ್ಬಾ ಸಹಾಯಾ;

ಏತೇ ಅಲದ್ಧಾ ಅನವಜ್ಜಭೋಜೀ, ಏಕೋ ಚರೇ ಖಗ್ಗವಿಸಾಣಕಪ್ಪೋ.

೧೦೪. ‘‘‘ದಿಸ್ವಾ ಸುವಣ್ಣಸ್ಸ ಪಭಸ್ಸರಾನಿ, ಕಮ್ಮಾರಪುತ್ತೇನ ಸುನಿಟ್ಠಿತಾನಿ;

ಸಙ್ಘಟ್ಟಮಾನಾನಿ ದುವೇ ಭುಜಸ್ಮಿಂ, ಏಕೋ ಚರೇ ಖಗ್ಗವಿಸಾಣಕಪ್ಪೋ.

೧೦೫. ‘‘‘ಏವಂ ದುತೀಯೇನ ಸಹಾ ಮಮಸ್ಸ, ವಾಚಾಭಿಲಾಪೋ ಅಭಿಸಜ್ಜನಾ ವಾ;

ಏತಂ ಭಯಂ ಆಯತಿಂ ಪೇಕ್ಖಮಾನೋ, ಏಕೋ ಚರೇ ಖಗ್ಗವಿಸಾಣಕಪ್ಪೋ.

೧೦೬. ‘‘‘ಕಾಮಾ ಹಿ ಚಿತ್ರಾ ಮಧುರಾ ಮನೋರಮಾ, ವಿರೂಪರೂಪೇನ ಮಥೇನ್ತಿ ಚಿತ್ತಂ;

ಆದೀನವಂ ಕಾಮಗುಣೇಸು ದಿಸ್ವಾ, ಏಕೋ ಚರೇ ಖಗ್ಗವಿಸಾಣಕಪ್ಪೋ.

೧೦೭. ‘‘‘ಈತೀ ಚ ಗಣ್ಡೋ ಚ ಉಪದ್ದವೋ ಚ, ರೋಗೋ ಚ ಸಲ್ಲಞ್ಚ ಭಯಞ್ಚ ಮೇತಂ;

ಏತಂ ಭಯಂ ಕಾಮಗುಣೇಸು ದಿಸ್ವಾ, ಏಕೋ ಚರೇ ಖಗ್ಗವಿಸಾಣಕಪ್ಪೋ.

೧೦೮. ‘‘‘ಸೀತಞ್ಚ ಉಣ್ಹಞ್ಚ ಖುದಂ ಪಿಪಾಸಂ, ವಾತಾತಪೇ ಡಂಸಸರೀಸಪೇ [ಡಂಸಸಿರಿಂಸಪೇ (ಸೀ. ಸ್ಯಾ.)] ಚ;

ಸಬ್ಬಾನಿಪೇತಾನಿ ಅಭಿಬ್ಭವಿತ್ವಾ [ಅಭಿಸಂಭವಿತ್ವಾ (ಸುತ್ತನಿಪಾತೇ)], ಏಕೋ ಚರೇ ಖಗ್ಗವಿಸಾಣಕಪ್ಪೋ.

೧೦೯. ‘‘‘ನಾಗೋವ ಯೂಥಾನಿ ವಿವಜ್ಜಯಿತ್ವಾ, ಸಞ್ಜಾತಖನ್ಧೋ ಪದುಮೀ ಉಳಾರೋ;

ಯಥಾಭಿರನ್ತಂ ವಿಹರಂ ಅರಞ್ಞೇ, ಏಕೋ ಚರೇ ಖಗ್ಗವಿಸಾಣಕಪ್ಪೋ.

೧೧೦. ‘‘‘ಅಟ್ಠಾನತಂ ಸಙ್ಗಣಿಕಾರತಸ್ಸ, ಯಂ ಫಸ್ಸಯೇ [ಫುಸ್ಸಯೇ (ಸ್ಯಾ.)] ಸಾಮಯಿಕಂ ವಿಮುತ್ತಿಂ;

ಆದಿಚ್ಚಬನ್ಧುಸ್ಸ ವಚೋ ನಿಸಮ್ಮ, ಏಕೋ ಚರೇ ಖಗ್ಗವಿಸಾಣಕಪ್ಪೋ.

೧೧೧. ‘‘‘ದಿಟ್ಠೀವಿಸೂಕಾನಿ ಉಪಾತಿವತ್ತೋ, ಪತ್ತೋ ನಿಯಾಮಂ ಪಟಿಲದ್ಧಮಗ್ಗೋ;

ಉಪ್ಪನ್ನಞಾಣೋಮ್ಹಿ ಅನಞ್ಞನೇಯ್ಯೋ, ಏಕೋ ಚರೇ ಖಗ್ಗವಿಸಾಣಕಪ್ಪೋ.

೧೧೨. ‘‘‘ನಿಲ್ಲೋಲುಪೋ ನಿಕ್ಕುಹೋ ನಿಪ್ಪಿಪಾಸೋ, ನಿಮ್ಮಕ್ಖ [ನಿಮ್ಮಕ್ಖೋ (ಸ್ಯಾ.)] ನಿದ್ಧನ್ತಕಸಾವಮೋಹೋ;

ನಿರಾಸಯೋ [ನಿರಾಸಾಸೋ (ಕ.)] ಸಬ್ಬಲೋಕೇ ಭವಿತ್ವಾ, ಏಕೋ ಚರೇ ಖಗ್ಗವಿಸಾಣಕಪ್ಪೋ.

೧೧೩. ‘‘‘ಪಾಪಂ ಸಹಾಯಂ ಪರಿವಜ್ಜಯೇಥ, ಅನತ್ಥದಸ್ಸಿಂ ವಿಸಮೇ ನಿವಿಟ್ಠಂ;

ಸಯಂ ನ ಸೇವೇ ಪಸುತಂ ಪಮತ್ತಂ, ಏಕೋ ಚರೇ ಖಗ್ಗವಿಸಾಣಕಪ್ಪೋ.

೧೧೪. ‘‘‘ಬಹುಸ್ಸುತಂ ಧಮ್ಮಧರಂ ಭಜೇಥ, ಮಿತ್ತಂ ಉಳಾರಂ ಪಟಿಭಾನವನ್ತಂ;

ಅಞ್ಞಾಯ ಅತ್ಥಾನಿ ವಿನೇಯ್ಯ ಕಙ್ಖಂ, ಏಕೋ ಚರೇ ಖಗ್ಗವಿಸಾಣಕಪ್ಪೋ.

೧೧೫. ‘‘‘ಖಿಡ್ಡಂ ರತಿಂ ಕಾಮಸುಖಞ್ಚ ಲೋಕೇ, ಅನಲಙ್ಕರಿತ್ವಾ ಅನಪೇಕ್ಖಮಾನೋ;

ವಿಭೂಸಟ್ಠಾನಾ ವಿರತೋ ಸಚ್ಚವಾದೀ, ಏಕೋ ಚರೇ ಖಗ್ಗವಿಸಾಣಕಪ್ಪೋ.

೧೧೬. ‘‘‘ಪುತ್ತಞ್ಚ ದಾರಂ ಪಿತರಞ್ಚ ಮಾತರಂ, ಧನಾನಿ ಧಞ್ಞಾನಿ ಚ ಬನ್ಧವಾನಿ;

ಹಿತ್ವಾನ ಕಾಮಾನಿ ಯಥೋಧಿಕಾನಿ, ಏಕೋ ಚರೇ ಖಗ್ಗವಿಸಾಣಕಪ್ಪೋ.

೧೧೭. ‘‘‘ಸಙ್ಗೋ ಏಸೋ ಪರಿತ್ತಮೇತ್ಥ ಸೋಖ್ಯಂ, ಅಪ್ಪಸ್ಸಾದೋ ದುಕ್ಖಮೇವೇತ್ಥ ಭಿಯ್ಯೋ;

ಗಳೋ [ಗಾಹೋ (ಸೀ.) ಕಣ್ಡೋ (ಸ್ಯಾ.) ಗಾಳ್ಹೋ (ಕ.)] ಏಸೋ ಇತಿ ಞತ್ವಾ ಮತಿಮಾ, ಏಕೋ ಚರೇ ಖಗ್ಗವಿಸಾಣಕಪ್ಪೋ.

೧೧೮. ‘‘‘ಸನ್ದಾಲಯಿತ್ವಾನ ಸಂಯೋಜನಾನಿ, ಜಾಲಂವ ಭೇತ್ವಾ ಸಲಿಲಮ್ಬುಚಾರೀ;

ಅಗ್ಗೀವ ದಡ್ಢಂ ಅನಿವತ್ತಮಾನೋ, ಏಕೋ ಚರೇ ಖಗ್ಗವಿಸಾಣಕಪ್ಪೋ.

೧೧೯. ‘‘‘ಓಕ್ಖಿತ್ತಚಕ್ಖೂ ನ ಚ ಪಾದಲೋಲೋ, ಗುತ್ತಿನ್ದ್ರಿಯೋ ರಕ್ಖಿತಮಾನಸಾನೋ;

ಅನವಸ್ಸುತೋ ಅಪರಿಡಯ್ಹಮಾನೋ, ಏಕೋ ಚರೇ ಖಗ್ಗವಿಸಾಣಕಪ್ಪೋ.

೧೨೦. ‘‘‘ಓಹಾರಯಿತ್ವಾ ಗಿಹಿಬ್ಯಞ್ಜನಾನಿ, ಸಞ್ಛನ್ನಪತ್ತೋ ಯಥಾ ಪಾರಿಛತ್ತೋ;

ಕಾಸಾಯವತ್ಥೋ ಅಭಿನಿಕ್ಖಮಿತ್ವಾ, ಏಕೋ ಚರೇ ಖಗ್ಗವಿಸಾಣಕಪ್ಪೋ.

೧೨೧. ‘‘‘ರಸೇಸು ಗೇಧಂ ಅಕರಂ ಅಲೋಲೋ, ಅನಞ್ಞಪೋಸೀ ಸಪದಾನಚಾರೀ;

ಕುಲೇ ಕುಲೇ ಅಪ್ಪಟಿಬದ್ಧಚಿತ್ತೋ, ಏಕೋ ಚರೇ ಖಗ್ಗವಿಸಾಣಕಪ್ಪೋ.

೧೨೨. ‘‘‘ಪಹಾಯ ಪಞ್ಚಾವರಣಾನಿ ಚೇತಸೋ, ಉಪಕ್ಕಿಲೇಸೇ ಬ್ಯಪನುಜ್ಜ ಸಬ್ಬೇ;

ಅನಿಸ್ಸಿತೋ ಛೇಜ್ಜ ಸಿನೇಹದೋಸಂ, ಏಕೋ ಚರೇ ಖಗ್ಗವಿಸಾಣಕಪ್ಪೋ.

೧೨೩. ‘‘‘ವಿಪಿಟ್ಠಿಕತ್ವಾನ ಸುಖಞ್ಚ ದುಕ್ಖಂ, ಪುಬ್ಬೇವ ಸೋಮನಸ್ಸದೋಮನಸ್ಸಂ;

ಲದ್ಧಾನುಪೇಕ್ಖಂ ಸಮಥಂ ವಿಸುದ್ಧಂ, ಏಕೋ ಚರೇ ಖಗ್ಗವಿಸಾಣಕಪ್ಪೋ.

೧೨೪. ‘‘‘ಆರದ್ಧವೀರಿಯೋ ಪರಮತ್ಥಪತ್ತಿಯಾ, ಅಲೀನಚಿತ್ತೋ ಅಕುಸೀತವುತ್ತಿ;

ದಳ್ಹನಿಕ್ಕಮೋ ಥಾಮಬಲೂಪಪನ್ನೋ, ಏಕೋ ಚರೇ ಖಗ್ಗವಿಸಾಣಕಪ್ಪೋ.

೧೨೫. ‘‘‘ಪಟಿಸಲ್ಲಾನಂ ಝಾನಮರಿಞ್ಚಮಾನೋ, ಧಮ್ಮೇಸು ನಿಚ್ಚಂ ಅನುಧಮ್ಮಚಾರೀ;

ಆದೀನವಂ ಸಮ್ಮಸಿತಾ ಭವೇಸು, ಏಕೋ ಚರೇ ಖಗ್ಗವಿಸಾಣಕಪ್ಪೋ.

೧೨೬. ‘‘‘ತಣ್ಹಕ್ಖಯಂ ಪತ್ಥಯಮಪ್ಪಮತ್ತೋ, ಅನೇಳಮೂಗೋ ಸುತವಾ ಸತೀಮಾ;

ಸಙ್ಖಾತಧಮ್ಮೋ ನಿಯತೋ ಪಧಾನವಾ, ಏಕೋ ಚರೇ ಖಗ್ಗವಿಸಾಣಕಪ್ಪೋ.

೧೨೭. ‘‘‘ಸೀಹೋವ ಸದ್ದೇಸು ಅಸನ್ತಸನ್ತೋ, ವಾತೋವ ಜಾಲಮ್ಹಿ ಅಸಜ್ಜಮಾನೋ;

ಪದುಮಂವ ತೋಯೇನ ಅಲಿಮ್ಪಮಾನೋ, ಏಕೋ ಚರೇ ಖಗ್ಗವಿಸಾಣಕಪ್ಪೋ.

೧೨೮. ‘‘‘ಸೀಹೋ ಯಥಾ ದಾಠಬಲೀ ಪಸಯ್ಹ, ರಾಜಾ ಮಿಗಾನಂ ಅಭಿಭುಯ್ಯ ಚಾರೀ;

ಸೇವೇಥ ಪನ್ತಾನಿ ಸೇನಾಸನಾನಿ, ಏಕೋ ಚರೇ ಖಗ್ಗವಿಸಾಣಕಪ್ಪೋ.

೧೨೯. ‘‘‘ಮೇತ್ತಂ ಉಪೇಕ್ಖಂ ಕರುಣಂ ವಿಮುತ್ತಿಂ, ಆಸೇವಮಾನೋ ಮುದಿತಞ್ಚ ಕಾಲೇ;

ಸಬ್ಬೇನ ಲೋಕೇನ ಅವಿರುಜ್ಝಮಾನೋ, ಏಕೋ ಚರೇ ಖಗ್ಗವಿಸಾಣಕಪ್ಪೋ.

೧೩೦. ‘‘‘ರಾಗಞ್ಚ ದೋಸಞ್ಚ ಪಹಾಯ ಮೋಹಂ, ಸನ್ದಾಲಯಿತ್ವಾನ ಸಂಯೋಜನಾನಿ;

ಅಸನ್ತಸಂ ಜೀವಿತಸಙ್ಖಯಮ್ಹಿ, ಏಕೋ ಚರೇ ಖಗ್ಗವಿಸಾಣಕಪ್ಪೋ.

೧೩೧. ‘‘‘ಭಜನ್ತಿ ಸೇವನ್ತಿ ಚ ಕಾರಣತ್ಥಾ, ನಿಕ್ಕಾರಣಾ ದುಲ್ಲಭಾ ಅಜ್ಜ ಮಿತ್ತಾ;

ಅತ್ತತ್ಥಪಞ್ಞಾ ಅಸುಚೀಮನುಸ್ಸಾ, ಏಕೋ ಚರೇ ಖಗ್ಗವಿಸಾಣಕಪ್ಪೋ.

೧೩೨. ‘‘‘ವಿಸುದ್ಧಸೀಲಾ ಸುವಿಸುದ್ಧಪಞ್ಞಾ, ಸಮಾಹಿತಾ ಜಾಗರಿಯಾನುಯುತ್ತಾ;

ವಿಪಸ್ಸಕಾ ಧಮ್ಮವಿಸೇಸದಸ್ಸೀ, ಮಗ್ಗಙ್ಗಬೋಜ್ಝಙ್ಗಗತೇ ವಿಜಞ್ಞಾ.

೧೩೩. ‘‘‘ಸುಞ್ಞಪ್ಪಣಿಧಿಞ್ಚ ತಥಾನಿಮಿತ್ತಂ [ಸುಞ್ಞತಪ್ಪಣೀಹಿತಞ್ಚಾನಿಮಿತ್ತಂ (ಸೀ.)], ಆಸೇವಯಿತ್ವಾ ಜಿನಸಾಸನಮ್ಹಿ;

ಯೇ ಸಾವಕತ್ತಂ ನ ವಜನ್ತಿ ಧೀರಾ, ಭವನ್ತಿ ಪಚ್ಚೇಕಜಿನಾ ಸಯಮ್ಭೂ.

೧೩೪. ‘‘‘ಮಹನ್ತಧಮ್ಮಾ ಬಹುಧಮ್ಮಕಾಯಾ, ಚಿತ್ತಿಸ್ಸರಾ ಸಬ್ಬದುಕ್ಖೋಘತಿಣ್ಣಾ;

ಉದಗ್ಗಚಿತ್ತಾ ಪರಮತ್ಥದಸ್ಸೀ, ಸೀಹೋಪಮಾ ಖಗ್ಗವಿಸಾಣಕಪ್ಪಾ.

೧೩೫. ‘‘‘ಸನ್ತಿನ್ದ್ರಿಯಾ ಸನ್ತಮನಾ ಸಮಾಧೀ, ಪಚ್ಚನ್ತಸತ್ತೇಸು ಪತಿಪ್ಪಚಾರಾ [ಪಚ್ಚತ್ತಗಮ್ಭೀರಮತಪ್ಪಚಾರಾ (ಸೀ.)];

ದೀಪಾ ಪರತ್ಥ ಇಧ ವಿಜ್ಜಲನ್ತಾ, ಪಚ್ಚೇಕಬುದ್ಧಾ ಸತತಂ ಹಿತಾಮೇ.

೧೩೬. ‘‘‘ಪಹೀನಸಬ್ಬಾವರಣಾ ಜನಿನ್ದಾ, ಲೋಕಪ್ಪದೀಪಾ ಘನಕಞ್ಚನಾಭಾ;

ನಿಸ್ಸಂಸಯಂ ಲೋಕಸುದಕ್ಖಿಣೇಯ್ಯಾ, ಪಚ್ಚೇಕಬುದ್ಧಾ ಸತತಪ್ಪಿತಾಮೇ.

೧೩೭. ‘‘‘ಪಚ್ಚೇಕಬುದ್ಧಾನಂ ಸುಭಾಸಿತಾನಿ, ಚರನ್ತಿ ಲೋಕಮ್ಹಿ ಸದೇವಕಮ್ಹಿ;

ಸುತ್ವಾ ತಥಾ ಯೇ ನ ಕರೋನ್ತಿ ಬಾಲಾ, ಚರನ್ತಿ ದುಕ್ಖೇಸು ಪುನಪ್ಪುನಂ ತೇ.

೧೩೮. ‘‘‘ಪಚ್ಚೇಕಬುದ್ಧಾನಂ ಸುಭಾಸಿತಾನಿ, ಮಧುಂ ಯಥಾ ಖುದ್ದಮವಸ್ಸವನ್ತಂ;

ಸುತ್ವಾ ತಥಾ ಯೇ ಪಟಿಪತ್ತಿಯುತ್ತಾ, ಭವನ್ತಿ ತೇ ಸಚ್ಚದಸಾ ಸಪಞ್ಞಾ’.

೧೩೯. ‘‘ಪಚ್ಚೇಕಬುದ್ಧೇಹಿ ಜಿನೇಹಿ ಭಾಸಿತಾ, ಕಥಾ [ಗಾಥಾ (ಸೀ. ಸ್ಯಾ.)] ಉಳಾರಾ ಅಭಿನಿಕ್ಖಮಿತ್ವಾ;

ತಾ ಸಕ್ಯಸೀಹೇನ ನರುತ್ತಮೇನ, ಪಕಾಸಿತಾ ಧಮ್ಮವಿಜಾನನತ್ಥಂ.

೧೪೦. ‘‘ಲೋಕಾನುಕಮ್ಪಾಯ ಇಮಾನಿ ತೇಸಂ, ಪಚ್ಚೇಕಬುದ್ಧಾನ ವಿಕುಬ್ಬಿತಾನಿ;

ಸಂವೇಗಸಙ್ಗಮತಿವಡ್ಢನತ್ಥಂ, ಸಯಮ್ಭುಸೀಹೇನ ಪಕಾಸಿತಾನೀ’’ತಿ.

ಪಚ್ಚೇಕಬುದ್ಧಾಪದಾನಂ ಸಮತ್ತಂ.