೩-೧. ಸಾರಿಪುತ್ತತ್ಥೇರಅಪದಾನಂ

ಅಥ ಥೇರಾಪದಾನಂ ಸುಣಾಥ –

೧೪೧. ‘‘ಹಿಮವನ್ತಸ್ಸ ಅವಿದೂರೇ, ಲಮ್ಬಕೋ ನಾಮ ಪಬ್ಬತೋ;

ಅಸ್ಸಮೋ ಸುಕತೋ ಮಯ್ಹಂ, ಪಣ್ಣಸಾಲಾ ಸುಮಾಪಿತಾ.

೧೪೨. ‘‘ಉತ್ತಾನಕೂಲಾ ನದಿಕಾ, ಸುಪತಿತ್ಥಾ ಮನೋರಮಾ;

ಸುಸುದ್ಧಪುಳಿನಾಕಿಣ್ಣಾ, ಅವಿದೂರೇ ಮಮಸ್ಸಮಂ.

೧೪೩. ‘‘ಅಸಕ್ಖರಾ ಅಪಬ್ಭಾರಾ, ಸಾದು ಅಪ್ಪಟಿಗನ್ಧಿಕಾ;

ಸನ್ದತೀ ನದಿಕಾ ತತ್ಥ, ಸೋಭಯನ್ತಾ ಮಮಸ್ಸಮಂ.

೧೪೪. ‘‘ಕುಮ್ಭೀಲಾ ಮಕರಾ ಚೇತ್ಥ, ಸುಸುಮಾರಾ [ಸುಂಸುಮಾರಾ (ಸೀ. ಸ್ಯಾ. )] ಚ ಕಚ್ಛಪಾ;

ಚರನ್ತಿ ನದಿಯಾ ತತ್ಥ, ಸೋಭಯನ್ತಾ ಮಮಸ್ಸಮಂ.

೧೪೫. ‘‘ಪಾಠೀನಾ ಪಾವುಸಾ ಮಚ್ಛಾ, ಬಲಜಾ [ವಜಲಾ (ಸೀ. ಸ್ಯಾ.) ಜಲಜಾ (ಪೀ.)] ಮುಞ್ಜರೋಹಿತಾ;

ವಗ್ಗಳಾ [ವಗ್ಗುಲಾ (ಸೀ.) ವಗ್ಗುಳಾ (ಸ್ಯಾ.) ಮಗ್ಗುರಾ (ಥೇರಗಾಥಾ)] ಪಪತಾಯನ್ತಾ, ಸೋಭಯನ್ತಿ [ಪಪತಾಯನ್ತಿ, ಸೋಭಯನ್ತಾ (ಕ.)] ಮಮಸ್ಸಮಂ.

೧೪೬. ‘‘ಉಭೋ ಕೂಲೇಸು ನದಿಯಾ, ಪುಪ್ಫಿನೋ ಫಲಿನೋ ದುಮಾ;

ಉಭತೋ ಅಭಿಲಮ್ಬನ್ತಾ, ಸೋಭಯನ್ತಿ [ಅಭಿಲಮ್ಬನ್ತಿ ಸೋಭಯನ್ತಾ (ಕ.)] ಮಮಸ್ಸಮಂ.

೧೪೭. ‘‘ಅಮ್ಬಾ ಸಾಲಾ ಚ ತಿಲಕಾ, ಪಾಟಲೀ ಸಿನ್ದುವಾರಕಾ [ಸಿನ್ದುವಾರಿಕಾ (ಬಹೂಸು)];

ದಿಬ್ಬಗನ್ಧಾ ಸಮ್ಪವನ್ತಿ, ಪುಪ್ಫಿತಾ ಮಮ ಅಸ್ಸಮೇ.

೧೪೮. ‘‘ಚಮ್ಪಕಾ ಸಳಲಾ ನೀಪಾ [ನಿಮ್ಬಾ (ಕ.)], ನಾಗಪುನ್ನಾಗಕೇತಕಾ;

ದಿಬ್ಬಗನ್ಧಾ ಸಮ್ಪವನ್ತಿ, ಪುಪ್ಫಿತಾ ಮಮ ಅಸ್ಸಮೇ.

೧೪೯. ‘‘ಅತಿಮುತ್ತಾ ಅಸೋಕಾ ಚ, ಭಗಿನೀಮಾಲಾ ಚ ಪುಪ್ಫಿತಾ;

ಅಙ್ಕೋಲಾ ಬಿಮ್ಬಿಜಾಲಾ [ಬಿಮ್ಬಜಾಲಾ (ಕ.)] ಚ, ಪುಪ್ಫಿತಾ ಮಮ ಅಸ್ಸಮೇ.

೧೫೦. ‘‘ಕೇತಕಾ ಕನ್ದಲಿ [ಕದಲೀ (ಸ್ಯಾ.)] ಚೇವ, ಗೋಧುಕಾ ತಿಣಸೂಲಿಕಾ;

ದಿಬ್ಬಗನ್ಧಂ ಸಮ್ಪವನ್ತಾ, ಸೋಭಯನ್ತಿ ಮಮಸ್ಸಮಂ.

೧೫೧. ‘‘ಕಣಿಕಾರಾ ಕಣ್ಣಿಕಾ ಚ, ಅಸನಾ ಅಜ್ಜುನಾ ಬಹೂ;

ದಿಬ್ಬಗನ್ಧಂ ಸಮ್ಪವನ್ತಾ, ಸೋಭಯನ್ತಿ ಮಮಸ್ಸಮಂ.

೧೫೨. ‘‘ಪುನ್ನಾಗಾ ಗಿರಿಪುನ್ನಾಗಾ, ಕೋವಿಳಾರಾ ಚ ಪುಪ್ಫಿತಾ;

ದಿಬ್ಬಗನ್ಧಂ ಸಮ್ಪವನ್ತಾ, ಸೋಭಯನ್ತಿ ಮಮಸ್ಸಮಂ.

೧೫೩. ‘‘ಉದ್ಧಾಲಕಾ ಚ ಕುಟಜಾ, ಕದಮ್ಬಾ ವಕುಲಾ ಬಹೂ;

ದಿಬ್ಬಗನ್ಧಂ ಸಮ್ಪವನ್ತಾ, ಸೋಭಯನ್ತಿ ಮಮಸ್ಸಮಂ.

೧೫೪. ‘‘ಆಳಕಾ ಇಸಿಮುಗ್ಗಾ ಚ, ಕದಲಿಮಾತುಲುಙ್ಗಿಯೋ;

ಗನ್ಧೋದಕೇನ ಸಂವಡ್ಢಾ, ಫಲಾನಿ ಧಾರಯನ್ತಿ ತೇ.

೧೫೫. ‘‘ಅಞ್ಞೇ ಪುಪ್ಫನ್ತಿ ಪದುಮಾ, ಅಞ್ಞೇ ಜಾಯನ್ತಿ ಕೇಸರೀ;

ಅಞ್ಞೇ ಓಪುಪ್ಫಾ ಪದುಮಾ, ಪುಪ್ಫಿತಾ ತಳಾಕೇ ತದಾ.

೧೫೬. ‘‘ಗಬ್ಭಂ ಗಣ್ಹನ್ತಿ ಪದುಮಾ, ನಿದ್ಧಾವನ್ತಿ ಮುಲಾಳಿಯೋ;

ಸಿಂಘಾಟಿಪತ್ತಮಾಕಿಣ್ಣಾ, ಸೋಭನ್ತಿ ತಳಾಕೇ ತದಾ.

೧೫೭. ‘‘ನಯಿತಾ ಅಮ್ಬಗನ್ಧೀ ಚ, ಉತ್ತಲೀ ಬನ್ಧುಜೀವಕಾ;

ದಿಬ್ಬಗನ್ಧಾ ಸಮ್ಪವನ್ತಿ, ಪುಪ್ಫಿತಾ ತಳಾಕೇ ತದಾ.

೧೫೮. ‘‘ಪಾಠೀನಾ ಪಾವುಸಾ ಮಚ್ಛಾ, ಬಲಜಾ ಮುಞ್ಜರೋಹಿತಾ;

ಸಂಗುಲಾ ಮಗ್ಗುರಾ [ಮಙ್ಗುರಾ (ಸೀ. ಕ.)] ಚೇವ, ವಸನ್ತಿ ತಳಾಕೇ ತದಾ.

೧೫೯. ‘‘ಕುಮ್ಭೀಲಾ ಸುಸುಮಾರಾ ಚ, ತನ್ತಿಗಾಹಾ ಚ ರಕ್ಖಸಾ;

ಓಗುಹಾ [ಓಗಾಹಾ (ಸ್ಯಾ.)] ಅಜಗರಾ ಚ, ವಸನ್ತಿ ತಳಾಕೇ ತದಾ.

೧೬೦. ‘‘ಪಾರೇವತಾ ರವಿಹಂಸಾ, ಚಕ್ಕವಾಕಾ ನದೀಚರಾ;

ಕೋಕಿಲಾ ಸುಕಸಾಳಿಕಾ, ಉಪಜೀವನ್ತಿ ತಂ ಸರಂ.

೧೬೧. ‘‘ಕುಕ್ಕುತ್ಥಕಾ ಕುಳೀರಕಾ, ವನೇ ಪೋಕ್ಖರಸಾತಕಾ;

ದಿನ್ದಿಭಾ ಸುವಪೋತಾ ಚ, ಉಪಜೀವನ್ತಿ ತಂ ಸರಂ.

೧೬೨. ‘‘ಹಂಸಾ ಕೋಞ್ಚಾ ಮಯೂರಾ ಚ, ಕೋಕಿಲಾ ತಮ್ಬಚೂಳಕಾ [ತಮ್ಬಚೂಳಿಕಾ (ಸೀ.)];

ಪಮ್ಪಕಾ ಜೀವಂಜೀವಾ ಚ, ಉಪಜೀವನ್ತಿ ತಂ ಸರಂ.

೧೬೩. ‘‘ಕೋಸಿಕಾ ಪೋಟ್ಠಸೀಸಾ ಚ, ಕುರರಾ ಸೇನಕಾ ಬಹೂ;

ಮಹಾಕಾಳಾ ಚ ಸಕುಣಾ, ಉಪಜೀವನ್ತಿ ತಂ ಸರಂ.

೧೬೪. ‘‘ಪಸದಾ ಚ ವರಾಹಾ ಚ, ಚಮರಾ ಗಣ್ಡಕಾ ಬಹೂ [ವಕಾ ಭೇರಣ್ಡಕಾ ಬಹೂ (ಸೀ. ಸ್ಯಾ.)];

ರೋಹಿಚ್ಚಾ ಸುಕಪೋತಾ [ಸುತ್ತಪೋತಾ (ಸ್ಯಾ.)] ಚ, ಉಪಜೀವನ್ತಿ ತಂ ಸರಂ.

೧೬೫. ‘‘ಸೀಹಬ್ಯಗ್ಘಾ ಚ ದೀಪೀ ಚ, ಅಚ್ಛಕೋಕತರಚ್ಛಕಾ;

ತಿಧಾ ಪಭಿನ್ನಮಾತಙ್ಗಾ, ಉಪಜೀವನ್ತಿ ತಂ ಸರಂ.

೧೬೬. ‘‘ಕಿನ್ನರಾ ವಾನರಾ ಚೇವ, ಅಥೋಪಿ ವನಕಮ್ಮಿಕಾ;

ಚೇತಾ ಚ ಲುದ್ದಕಾ ಚೇವ, ಉಪಜೀವನ್ತಿ ತಂ ಸರಂ.

೧೬೭. ‘‘ತಿನ್ದುಕಾನಿ ಪಿಯಾಲಾನಿ, ಮಧುಕಾ ಕಾಸುಮಾರಯೋ [ಕಾಸಮಾರಿಯೋ (ಸ್ಯಾ.)];

ಧುವಂ ಫಲಾನಿ ಧಾರೇನ್ತಿ, ಅವಿದೂರೇ ಮಮಸ್ಸಮಂ.

೧೬೮. ‘‘ಕೋಸಮ್ಬಾ [ಕೋಸುಮ್ಭಾ (ಸೀ. ಸ್ಯಾ.)] ಸಳಲಾ ನಿಮ್ಬಾ [ಸಳಲಾ ನೀಪಾ (ಸೀ. ಸ್ಯಾ.) ಪನಸಾ ಅಮ್ಬಾ (?)], ಸಾದುಫಲಸಮಾಯುತಾ;

ಧುವಂ ಫಲಾನಿ ಧಾರೇನ್ತಿ, ಅವಿದೂರೇ ಮಮಸ್ಸಮಂ.

೧೬೯. ‘‘ಹರೀತಕಾ ಆಮಲಕಾ, ಅಮ್ಬಜಮ್ಬುವಿಭೀತಕಾ;

ಕೋಲಾ ಭಲ್ಲಾತಕಾ ಬಿಲ್ಲಾ, ಫಲಾನಿ ಧಾರಯನ್ತಿ ತೇ.

೧೭೦. ‘‘ಆಲುವಾ ಚ ಕಳಮ್ಬಾ ಚ, ಬಿಳಾಲೀತಕ್ಕಳಾನಿ ಚ;

ಜೀವಕಾ ಸುತಕಾ ಚೇವ, ಬಹುಕಾ ಮಮ ಅಸ್ಸಮೇ.

೧೭೧. ‘‘ಅಸ್ಸಮಸ್ಸಾವಿದೂರಮ್ಹಿ, ತಳಾಕಾಸುಂ ಸುನಿಮ್ಮಿತಾ;

ಅಚ್ಛೋದಕಾ ಸೀತಜಲಾ, ಸುಪತಿತ್ಥಾ ಮನೋರಮಾ.

೧೭೨. ‘‘ಪದುಮುಪ್ಪಲಸಞ್ಛನ್ನಾ, ಪುಣ್ಡರೀಕಸಮಾಯುತಾ;

ಮನ್ದಾಲಕೇಹಿ ಸಞ್ಛನ್ನಾ, ದಿಬ್ಬಗನ್ಧೋ ಪವಾಯತಿ.

೧೭೩. ‘‘ಏವಂ ಸಬ್ಬಙ್ಗಸಮ್ಪನ್ನೇ, ಪುಪ್ಫಿತೇ ಫಲಿತೇ ವನೇ;

ಸುಕತೇ ಅಸ್ಸಮೇ ರಮ್ಮೇ, ವಿಹರಾಮಿ ಅಹಂ ತದಾ.

೧೭೪. ‘‘ಸೀಲವಾ ವತಸಮ್ಪನ್ನೋ [ವತ್ತಸಮ್ಪನ್ನೋ (ಸ್ಯಾ.)], ಝಾಯೀ ಝಾನರತೋ ಸದಾ;

ಪಞ್ಚಾಭಿಞ್ಞಾಬಲಪ್ಪತ್ತೋ, ಸುರುಚಿ ನಾಮ ತಾಪಸೋ.

೧೭೫. ‘‘ಚತುವೀಸಸಹಸ್ಸಾನಿ, ಸಿಸ್ಸಾ ಮಯ್ಹಂ ಉಪಟ್ಠಹು;

ಸಬ್ಬೇವ ಬ್ರಾಹ್ಮಣಾ ಏತೇ, ಜಾತಿಮನ್ತೋ ಯಸಸ್ಸಿನೋ.

೧೭೬. ‘‘ಲಕ್ಖಣೇ ಇತಿಹಾಸೇ ಚ, ಸನಿಘಣ್ಟುಸಕೇಟುಭೇ;

ಪದಕಾ ವೇಯ್ಯಾಕರಣಾ, ಸಧಮ್ಮೇ ಪಾರಮಿಂ ಗತಾ.

೧೭೭. ‘‘ಉಪ್ಪಾತೇಸು ನಿಮಿತ್ತೇಸು, ಲಕ್ಖಣೇಸು ಚ ಕೋವಿದಾ;

ಪಥಬ್ಯಾ ಭೂಮನ್ತಲಿಕ್ಖೇ, ಮಮ ಸಿಸ್ಸಾ ಸುಸಿಕ್ಖಿತಾ.

೧೭೮. ‘‘ಅಪ್ಪಿಚ್ಛಾ ನಿಪಕಾ ಏತೇ, ಅಪ್ಪಾಹಾರಾ ಅಲೋಲುಪಾ;

ಲಾಭಾಲಾಭೇನ ಸನ್ತುಟ್ಠಾ, ಪರಿವಾರೇನ್ತಿ ಮಂ ಸದಾ.

೧೭೯. ‘‘ಝಾಯೀ ಝಾನರತಾ ಧೀರಾ, ಸನ್ತಚಿತ್ತಾ ಸಮಾಹಿತಾ;

ಆಕಿಞ್ಚಞ್ಞಂ ಪತ್ಥಯನ್ತಾ, ಪರಿವಾರೇನ್ತಿ ಮಂ ಸದಾ.

೧೮೦. ‘‘ಅಭಿಞ್ಞಾಪಾರಮಿಪ್ಪತ್ತಾ, ಪೇತ್ತಿಕೇ ಗೋಚರೇ ರತಾ;

ಅನ್ತಲಿಕ್ಖಚರಾ ಧೀರಾ, ಪರಿವಾರೇನ್ತಿ ಮಂ ಸದಾ.

೧೮೧. ‘‘ಸಂವುತಾ ಛಸು ದ್ವಾರೇಸು, ಅನೇಜಾ ರಕ್ಖಿತಿನ್ದ್ರಿಯಾ;

ಅಸಂಸಟ್ಠಾ ಚ ತೇ ಧೀರಾ, ಮಮ ಸಿಸ್ಸಾ ದುರಾಸದಾ.

೧೮೨. ‘‘ಪಲ್ಲಙ್ಕೇನ ನಿಸಜ್ಜಾಯ, ಠಾನಚಙ್ಕಮನೇನ ಚ;

ವೀತಿನಾಮೇನ್ತಿ ತೇ ರತ್ತಿಂ, ಮಮ ಸಿಸ್ಸಾ ದುರಾಸದಾ.

೧೮೩. ‘‘ರಜನೀಯೇ ನ ರಜ್ಜನ್ತಿ, ದುಸ್ಸನೀಯೇ ನ ದುಸ್ಸರೇ;

ಮೋಹನೀಯೇ ನ ಮುಯ್ಹನ್ತಿ, ಮಮ ಸಿಸ್ಸಾ ದುರಾಸದಾ.

೧೮೪. ‘‘ಇದ್ಧಿಂ ವೀಮಂಸಮಾನಾ ತೇ, ವತ್ತನ್ತಿ ನಿಚ್ಚಕಾಲಿಕಂ;

ಪಥವಿಂ [ಪಠವಿಂ (ಸೀ. ಸ್ಯಾ.)] ತೇ ಪಕಮ್ಪೇನ್ತಿ, ಸಾರಮ್ಭೇನ ದುರಾಸದಾ.

೧೮೫. ‘‘ಕೀಳಮಾನಾ ಚ ತೇ ಸಿಸ್ಸಾ, ಕೀಳನ್ತಿ ಝಾನಕೀಳಿತಂ;

ಜಮ್ಬುತೋ ಫಲಮಾನೇನ್ತಿ, ಮಮ ಸಿಸ್ಸಾ ದುರಾಸದಾ.

೧೮೬. ‘‘ಅಞ್ಞೇ ಗಚ್ಛನ್ತಿ ಗೋಯಾನಂ, ಅಞ್ಞೇ ಪುಬ್ಬವಿದೇಹಕಂ [ಪುಬ್ಬವಿದೇಹನಂ (ಸ್ಯಾ. ಕ.)];

ಅಞ್ಞೇ ಚ ಉತ್ತರಕುರುಂ, ಏಸನಾಯ ದುರಾಸದಾ.

೧೮೭. ‘‘ಪುರತೋ ಪೇಸೇನ್ತಿ ಖಾರಿಂ, ಪಚ್ಛತೋ ಚ ವಜನ್ತಿ ತೇ;

ಚತುವೀಸಸಹಸ್ಸೇಹಿ, ಛಾದಿತಂ ಹೋತಿ ಅಮ್ಬರಂ.

೧೮೮. ‘‘ಅಗ್ಗಿಪಾಕೀ ಅನಗ್ಗೀ ಚ, ದನ್ತೋದುಕ್ಖಲಿಕಾಪಿ ಚ;

ಅಸ್ಮೇನ ಕೋಟ್ಟಿತಾ ಕೇಚಿ, ಪವತ್ತಫಲಭೋಜನಾ.

೧೮೯. ‘‘ಉದಕೋರೋಹಣಾ ಕೇಚಿ, ಸಾಯಂ ಪಾತೋ ಸುಚೀರತಾ;

ತೋಯಾಭಿಸೇಚನಕರಾ, ಮಮ ಸಿಸ್ಸಾ ದುರಾಸದಾ.

೧೯೦. ‘‘ಪರೂಳ್ಹಕಚ್ಛನಖಲೋಮಾ, ಪಙ್ಕದನ್ತಾ ರಜಸ್ಸಿರಾ;

ಗನ್ಧಿತಾ ಸೀಲಗನ್ಧೇನ, ಮಮ ಸಿಸ್ಸಾ ದುರಾಸದಾ.

೧೯೧. ‘‘ಪಾತೋವ ಸನ್ನಿಪತಿತ್ವಾ, ಜಟಿಲಾ ಉಗ್ಗತಾಪನಾ;

ಲಾಭಾಲಾಭಂ ಪಕಿತ್ತೇತ್ವಾ, ಗಚ್ಛನ್ತಿ ಅಮ್ಬರೇ ತದಾ.

೧೯೨. ‘‘ಏತೇಸಂ ಪಕ್ಕಮನ್ತಾನಂ, ಮಹಾಸದ್ದೋ ಪವತ್ತತಿ;

ಅಜಿನಚಮ್ಮಸದ್ದೇನ, ಮುದಿತಾ ಹೋನ್ತಿ ದೇವತಾ.

೧೯೩. ‘‘ದಿಸೋದಿಸಂ ಪಕ್ಕಮನ್ತಿ, ಅನ್ತಲಿಕ್ಖಚರಾ ಇಸೀ;

ಸಕೇ ಬಲೇನುಪತ್ಥದ್ಧಾ, ತೇ ಗಚ್ಛನ್ತಿ ಯದಿಚ್ಛಕಂ.

೧೯೪. ‘‘ಪಥವೀಕಮ್ಪಕಾ ಏತೇ, ಸಬ್ಬೇವ ನಭಚಾರಿನೋ;

ಉಗ್ಗತೇಜಾ ದುಪ್ಪಸಹಾ, ಸಾಗರೋವ ಅಖೋಭಿಯಾ.

೧೯೫. ‘‘ಠಾನಚಙ್ಕಮಿನೋ ಕೇಚಿ, ಕೇಚಿ ನೇಸಜ್ಜಿಕಾ ಇಸೀ;

ಪವತ್ತಭೋಜನಾ ಕೇಚಿ, ಮಮ ಸಿಸ್ಸಾ ದುರಾಸದಾ.

೧೯೬. ‘‘ಮೇತ್ತಾವಿಹಾರಿನೋ ಏತೇ, ಹಿತೇಸೀ ಸಬ್ಬಪಾಣಿನಂ;

ಅನತ್ತುಕ್ಕಂಸಕಾ ಸಬ್ಬೇ, ನ ತೇ ವಮ್ಭೇನ್ತಿ ಕಸ್ಸಚಿ.

೧೯೭. ‘‘ಸೀಹರಾಜಾವಸಮ್ಭೀತಾ, ಗಜರಾಜಾವ ಥಾಮವಾ;

ದುರಾಸದಾ ಬ್ಯಗ್ಘಾರಿವ, ಆಗಚ್ಛನ್ತಿ ಮಮನ್ತಿಕೇ.

೧೯೮. ‘‘ವಿಜ್ಜಾಧರಾ ದೇವತಾ ಚ, ನಾಗಗನ್ಧಬ್ಬರಕ್ಖಸಾ;

ಕುಮ್ಭಣ್ಡಾ ದಾನವಾ ಗರುಳಾ, ಉಪಜೀವನ್ತಿ ತಂ ಸರಂ.

೧೯೯. ‘‘ತೇ ಜಟಾಖಾರಿಭರಿತಾ, ಅಜಿನುತ್ತರವಾಸನಾ;

ಅನ್ತಲಿಕ್ಖಚರಾ ಸಬ್ಬೇ, ಉಪಜೀವನ್ತಿ ತಂ ಸರಂ.

೨೦೦. ‘‘ಸದಾನುಚ್ಛವಿಕಾ [ತದಾನುಚ್ಛವಿಕಾ (ಸ್ಯಾ. ಕ.)] ಏತೇ, ಅಞ್ಞಮಞ್ಞಂ ಸಗಾರವಾ;

ಚತುಬ್ಬೀಸಸಹಸ್ಸಾನಂ, ಖಿಪಿತಸದ್ದೋ ನ ವಿಜ್ಜತಿ.

೨೦೧. ‘‘ಪಾದೇ ಪಾದಂ ನಿಕ್ಖಿಪನ್ತಾ, ಅಪ್ಪಸದ್ದಾ ಸುಸಂವುತಾ;

ಉಪಸಙ್ಕಮ್ಮ ಸಬ್ಬೇವ [ಸಬ್ಬೇ ತೇ (ಸ್ಯಾ.)], ಸಿರಸಾ ವನ್ದರೇ ಮಮಂ.

೨೦೨. ‘‘ತೇಹಿ ಸಿಸ್ಸೇಹಿ ಪರಿವುತೋ, ಸನ್ತೇಹಿ ಚ ತಪಸ್ಸಿಭಿ;

ವಸಾಮಿ ಅಸ್ಸಮೇ ತತ್ಥ, ಝಾಯೀ ಝಾನರತೋ ಅಹಂ.

೨೦೩. ‘‘ಇಸೀನಂ ಸೀಲಗನ್ಧೇನ, ಪುಪ್ಫಗನ್ಧೇನ ಚೂಭಯಂ;

ಫಲೀನಂ ಫಲಗನ್ಧೇನ, ಗನ್ಧಿತೋ ಹೋತಿ ಅಸ್ಸಮೋ.

೨೦೪. ‘‘ರತ್ತಿನ್ದಿವಂ ನ ಜಾನಾಮಿ, ಅರತಿ ಮೇ ನ ವಿಜ್ಜತಿ;

ಸಕೇ ಸಿಸ್ಸೇ ಓವದನ್ತೋ, ಭಿಯ್ಯೋ ಹಾಸಂ ಲಭಾಮಹಂ.

೨೦೫. ‘‘ಪುಪ್ಫಾನಂ ಪುಪ್ಫಮಾನಾನಂ, ಫಲಾನಞ್ಚ ವಿಪಚ್ಚತಂ;

ದಿಬ್ಬಗನ್ಧಾ ಪವಾಯನ್ತಿ, ಸೋಭಯನ್ತಾ ಮಮಸ್ಸಮಂ.

೨೦೬. ‘‘ಸಮಾಧಿಮ್ಹಾ ವುಟ್ಠಹಿತ್ವಾ, ಆತಾಪೀ ನಿಪಕೋ ಅಹಂ;

ಖಾರಿಭಾರಂ ಗಹೇತ್ವಾನ, ವನಂ ಅಜ್ಝೋಗಹಿಂ ಅಹಂ.

೨೦೭. ‘‘ಉಪ್ಪಾತೇ ಸುಪಿನೇ ಚಾಪಿ, ಲಕ್ಖಣೇಸು ಸುಸಿಕ್ಖಿತೋ;

ಪವತ್ತಮಾನಂ [ವತ್ತಮಾನಂ (ಕ.)] ಮನ್ತಪದಂ, ಧಾರಯಾಮಿ ಅಹಂ ತದಾ.

೨೦೮. ‘‘ಅನೋಮದಸ್ಸೀ ಭಗವಾ, ಲೋಕಜೇಟ್ಠೋ ನರಾಸಭೋ;

ವಿವೇಕಕಾಮೋ ಸಮ್ಬುದ್ಧೋ, ಹಿಮವನ್ತಮುಪಾಗಮಿ.

೨೦೯. ‘‘ಅಜ್ಝೋಗಾಹೇತ್ವಾ ಹಿಮವನ್ತಂ, ಅಗ್ಗೋ ಕಾರುಣಿಕೋ ಮುನಿ;

ಪಲ್ಲಙ್ಕಂ ಆಭುಜಿತ್ವಾನ, ನಿಸೀದಿ ಪುರಿಸುತ್ತಮೋ.

೨೧೦. ‘‘ತಮದ್ದಸಾಹಂ ಸಮ್ಬುದ್ಧಂ, ಸಪ್ಪಭಾಸಂ ಮನೋರಮಂ;

ಇನ್ದೀವರಂವ ಜಲಿತಂ, ಆದಿತ್ತಂವ ಹುತಾಸನಂ.

೨೧೧. ‘‘ಜಲನ್ತಂ ದೀಪರುಕ್ಖಂವ, ವಿಜ್ಜುತಂ ಗಗಣೇ ಯಥಾ;

ಸುಫುಲ್ಲಂ ಸಾಲರಾಜಂವ, ಅದ್ದಸಂ ಲೋಕನಾಯಕಂ.

೨೧೨. ‘‘ಅಯಂ ನಾಗೋ ಮಹಾವೀರೋ, ದುಕ್ಖಸ್ಸನ್ತಕರೋ ಮುನಿ;

ಇಮಂ ದಸ್ಸನಮಾಗಮ್ಮ, ಸಬ್ಬದುಕ್ಖಾ ಪಮುಚ್ಚರೇ.

೨೧೩. ‘‘ದಿಸ್ವಾನಾಹಂ ದೇವದೇವಂ, ಲಕ್ಖಣಂ ಉಪಧಾರಯಿಂ;

ಬುದ್ಧೋ ನು ಖೋ ನ ವಾ ಬುದ್ಧೋ, ಹನ್ದ ಪಸ್ಸಾಮಿ ಚಕ್ಖುಮಂ.

೨೧೪. ‘‘ಸಹಸ್ಸಾರಾನಿ ಚಕ್ಕಾನಿ, ದಿಸ್ಸನ್ತಿ ಚರಣುತ್ತಮೇ;

ಲಕ್ಖಣಾನಿಸ್ಸ ದಿಸ್ವಾನ, ನಿಟ್ಠಂ ಗಚ್ಛಿಂ ತಥಾಗತೇ.